مشاكل اهل الزوج و تاثيرها على الزواج << دعوه للنقاش

مرحبا بنــــــــات شلونـكم؟؟؟!!
عساااكم بخير !!
حبايبي حبيت اتناقش معاكم بموضوع كنت قاعده اليوم مع رفيجاتي نتكلم فيه و اللي اهوا تاثير اهل الزوج باستقرار الزوجه و حياتها مع زوجه يعني اللي بوصله
اذا كانت ام الزوج او اخته كارهه الزوجه هل بياثر هالشي على الزواج و خصوصا اذا كان فيه ابناء على و هل بياثر ايضا على الزوجه و على حياتها و معاملتها للزوج و توقعين ان الزواج بيستمر اذا كانت هناك خلافات و يلا خلونا نتناقش و نستفيد و انا عن نفسي اتوقع ان اسرة الزوج و تقبلهم للزوجه و حبهم لها يشكل نسبه 80 بالميه باستقرار زواجها لانه مهما يكون اكيد الولد بيتبع اهله و بياثرون على حياته

و يلا انطر اراءكم حبيباتي

شوفي حبيبتي أكيد في خالة أو حماة تكره مرت الولد أو مرت اخوها والأسباب مختلفة بس لازم تعرفين كلا يعتمد على الريال نفسة وهم على الاهل يعني مثلا في ام اذا كرهت جنتها تشوفينها كلا مشيشة ولدها عليها أو تغصبه يطلقها والله تدرين أخت رفيجتي تطلقت من ريلها لأن خالتها ما تبيها مع انها مسكينة وايد بس الخالة تشيش وفي ناس أو رياييل يسكت امة يعني اذا شيشتة يقولها انشالله مالج الا طيبة الخاطر أنا أعرف شلون اأدبها … وشي طبيعي بتأثر على حياتهم الاسرية وأتمنى وصلتلج اللي تبين …

انا وحده من الناس عانيت من خالتي وحماتي الله يسامحهم مع اني تزوجت ريلي عقب قصه حب عنيفه بس حسيت اول مادخلت بيتهم جني غريبه لانهم كارهيني وسويت المستحيل علشان اقرب منهم بس مابين بعينهم شى الله يغفر لهم والنتيجه خربوا بيتي حسبي الله علي ذيج الايام وطلقوني منه الحين عقب ماكبروا وعقلوا وصاروا خوش اوادم رديت علي بوعيالي الحمدلله وخالتي تموت فيني وحمااااااااااااااااااااااااتي كل يوم تطرش لي رهش وكستنه ومرات تطرش لي يريش هههههههههههههههههههههه وناااااااسه لي حبتج خالتج وحماتج وقراااااااااااااااااااااااده لي كرهتج سيلانيتهم يعفسووون دنيتج فوق تحت

اهل الزوج لهم تاثير وايد وياد على الزوج خاصة اذا الريال يسمع كلام امه وايد احب اقولج ان جيران بيت حمولتي اسمع ان خالتهم ميننة الجناين وكل يوم لها سالفة وقصة معاهم حتى انها طردت عيالها من البيت وقعدت الصغير عندها وهم يوم طلعوا منها زوجة ولها مرة ثانية وسببت مشاكل مع الزوجة وقالت انا بعيدة عن الموضوع ومالي شغل بولدي هو اللي يبي من زمان وانا كنت ارده بس الحين ما قدرت عليه والمصيبة تقول حق جنتها شوفي قضبي عيالج وريلج ولا تهدينا وتخلين زوجته الثانية تتوحد فيه وانا لما ازور حمولتي يوم الخميس مرة شفتها كانت تزور خالتي تعبانة كانت طالعة من المستشفى ولما شفتها ويها يخرع وكلها شر سبحان الله وقلت بقلبي الله يكفينا شرها يا حسرتي لا تشيش خالتي علينا……….ومثل ما قلت ان اهل الريل لهم 99% نسبة من المشاكل

والله لو علي لا اقوووووووول لهم تأثير 100 %

وبصراحه ما جبته من فراغ لاني اعيشه

الصراحة انا شفت ناس نعرفهم للاسف شوف عيني ام الزوج واخته حسروا في المرة لما قالت بس
شي عجيب والله نسمع قصص خيال والله كانت تطالعها في لقمتها اعوذ بالله

كانت اخته تقول نبي اخونا يكون له عيال بدون زوجة!!!!
واحنا كنا نسمعها ونضحك اثر الاخت من صجها وفعلا الولد لليوم مطلق مرتين والحين يشيشونة علي الثالثة علشان يطلقها ويقولن له "انت ماعندك حظ مع الحريم" !!!!!!!!!!!!
واكيد طبعا اكو ناس سنع ومنع ماتطلع منهم العيبه والجنة عندهم مثل بنتهم
الله يهدي الخالات والحموات والجناين

والله هالسالفة وايد معقدة يعني صج انه فيه خلاات ياكافي يخرعون بس هم الجزء الكبير من معالجة هالموضوع على الزوجة اللي اهي بدورها عن طريق معاملتها للاهل اذا صار موقف شين لا سمح الله تقدر تعود الزوج على طريقة معينه يتعامل فيها بالمشاكل مع أهله ( مو قصدي اهني التشيش والضغط على الزوج) يعني المفروض الزوجة لو شنو سووا لها أهل الريل تحاول تخلي كل هذا يصير جدامه يعني بعينه ويشوف وبنفس الوقت ما تتناجر معاه وليش سووا وليش قالوا مجرد انها تتغاضى عن الموضوع او تبين له انه هالشي ضايقني بس ما تتهااااوش وياه عشانهم لأن هالشي اهم يبونه أنه يخلقون جو من التوتر والضيقه والنفور بين الزوجة وزوجته فشحقه أعطيهم هالشي مجرد اني أصلي ركعتين أطلب الله يبرد قلبي فيهم من الضقه وتطلب انه الله يهديهم ويصبرها بنفس الوقت اهو كفيل بأنه يرد لها حقها مهما صار ويهديها ولا تصعد المشكلة وبنفس الوقت تكون اكسبت ريلها لانه شافها انها بنت سنعه بس هذا مايمنع اني أبين له انه هالشي سكت عنه انا عشانك ومو معناته اني راح أقبل بهالشي يصير مرة ثانية . يعني الزوجة يبي لها سعه البال اذا صج فكرت صح بالموضوع.

هذا برايي الحل انا مادري عنكم اذا تخالفوني الراي ومشكورة عذاب العاشقينا على طرح الموضوع

اكيد لهم تأثير على الزوجين بس ماتوصل للطلاق اذا كان الزوج يحب زوجته وزوجته تحبه

صارت لوحدة اعرفها من بعيد اعيزوا خواته وامه طلقها طلقها وييبون له صور بنات حلوين بس كان معطيهم طاف لأنه يحبها وايد
ولدرجة انه امه طردتها ماتدخل عليها وهي ساكنه بالبيت عندهم فتحوا لها باب خارجي ومشااااااااااااااااااكل مالها اول ولاآخر الى يومج هذا بس الزوج وزوجته متمكسكين ابعض

فرايي انه متى ماكان الحب والتفاهم يسيطر على الزوجين ماتفرقهم مشاكل الأهل

انا اعرف وحده مسكينه خالتها تاخذ معاش ولدها ((اللي اهو ريل البنت المسكينه )) كلللله وتعطيهم بالقطاره واهيا تفسفس الفلوس على شغلات تااااافهه بس عشان تحر البنية جذيه تغار مو صاحيه

اكيد لهم تاثير على الزوجين
بس اذا كان الزوج يحب زوجته ماتوصل للطلااق
انا من رايي اذا كانت ام الزوج او اخته جذي ما يحبون الزوجه
من رايي الزوجه تبتعد عنهم وتروح بحالها
طبعااا مو قصدي انها تقطع على طول لا يعني ما تشوفهم الا بالزيارات الرسميه
مثل الاعياد ورمضان وبس
واظن هالشي يكفي

ولا شرايج ياااااعذاب العاشقينا؟؟؟؟

انا من راى انة الريال اهو مسؤؤؤل كل المسؤلية عن المشااااكل
اهم حريم لكن اهو ريال لازم يعرف يحط حدووود لأهلة ولزوجتة وماينحاز لاى طرق
واذا فعلا شخصيتة قوية بتلقين خواتة بعيد عن المشاكل وهم بتلقين مرتة تحترم او على الاقل تبعد عن المشاكل
بس وين الزوجة اللى تفطن للزوج دورة؟ ووين الزوج اللى يفهم حركااات وكيد الحريم؟
الريااال اللى مايعرف يوقف كل طرف عند حدة هذا اهو اللى اشرة علية

انا معاج يأثرون واااااااااااااااااااااااايد علي ولدهم
بس علي حسب الزوج اذا يحب مرته ما يهتم لاحد بس هذول اهله لازم يطاوعهم
انا باعتقادي ماكو وحده تحب جنتهااا يمكن اذا حبتهااا من جدامهااا بس

والله في أهل ايننون ولدهم من التشيش والصراحة خلو الخوات على صوب ..
بس اذا الأم كل يوم منادية الريال مرتك فعلتها وتركتها وتتبجبج ودمعتين حتى لو علاقة الريال اوكي مع مرته ولو هو مرتاح معاها ويدري فيها زينة بيصير خاطره ثجيل عليها وكل يوم بمشكلة لأن باله مو مرتاح هذا اذا ما ردها بيت اهلها من اولها عن المشاكل …

اما اذا مشاكل عادية الأم والا الاخت تقط كلمة عالجنة والجنة ترد عليها خلاص بروحهم يتفاهمون والمرة الذكية ماتدخل ريلها بالموضوع خلاص تتفاهم معاهم بطريقتها انشالله ينتفون بعض كيفهم وتخليه بالصورة بانها تقوله عن تصرف أهله بصيغة غشمرة علشان لي صار شي الا اهوه يدري بفعايلهم بس مو عدل انها تحمله نتيجة أغلاط اهله وكلما احد سوالها شي نكدت عيشته .. هم هاذي مو حالة تخسر ريلها وتهدم بيتها بسبة مشاكل حريم …

وترى نااااااااااااااااااااااااااااااااااااااااااااااااا اااااااااادر الريال اللي يوقف مع مرته بويه اهله حتى لو يدري انهم غلطانين مليون بالمية فالمره الشاطرة اللي توقفهم عند حدهم وبنفس الوقت تكسب زوجها ورضاه ..

والله يهديلكم ازواجكم كلكم ويسخرهم لكم اهمه واهلهم ..

اهل الزوج اكيد لهم تأثير

لكن الاساس الريال

بعض الرياييل مبطلين اذونهم لاهلهم واهما الصح والفقيرة دايما على غلط

انا اعرف ناس اذا اخت الزوج ما عندها خدامة تشيش اخوها ما ييب خدامه لزوجته

ليش الحسد ؟؟؟؟؟

الله اعلم……………لكن ما يمنع ان في خالات وحموات يعاملون جناينهم بما يرضي الله

مشكوريين خواتي عالمشاركه و انا بانتظار اراء الباقيات