مسموح غير مسموح موسوعة الأتكيت الكويتي للعرايس و المتزوجااات

شرايكم نسوي موسوعه للشغلات اللي تحسون ان المتزوجه او العروس ممنوع تسويها و مسمووح تسويها

نبي نتساعد بهالشي

انا اسميها مرحلة الدراسه التمهيديه لطبيعة الزوج و اهله و طبيعتج بعد الزواج مع اهلج:

مثلا

ممنوع تتكلمين عن خصوصياتج جدام الناس حتى لو خواتج او خالاتج او عماتج …
و حتى امج حاولي ما تعرف كل خصوصياتكم ..
يعني اقصد شنو قالج زوجج قبل النوم

شنو سويتو بينكم و بين بعض

شنو لبستيله

شنو سوالج

أول شي حرام

ثاني شي عيب

ثالث شي ترا راح تزرعين بذور الغيره للمتزوجه و الغير متزوجه لأنج بتفتحين عيونهم على حياتج السعيده و بالمقابل لو تناجرتي مع ريلج او تزاعلتو او سوالج شي احرجج ماراح تقولين لأنج ووبساطه ما تبين تقولين الشغلات البايخه بتطلعين جدامهم العروس اللي ميت فيها زوجها و مدلعها و مدللها

اهل زوجج و بالذات امه و خواته

لاتطيحين الميانه بينج و بينهم لدرجه انهم يقولون اشفيها هاذي ما صدقت عطيناها ويه و قامت انكتت علينا مره وحده

و لا تصيرين صخر جلمود معاهم بحيث يقولون اشفيها متضايقه او شكلها ما حبتنا او ما حبت ولدنا …

خلي كلامج مدروس ما تقولين كلمه الا و انتي عارفه شنو عشان ما تندمين على كلام ما تقصدينه و طلع بعفويه

توج يديه عليهم لا تكشفين اوراقج كلها لا تقولين احب الاكله الفلانيه او ما احب الاكله العلانيه ما احط شكر بالشاي ولا ما احب الطماط و امووت بالخيار … اللي ما تحبينه يمكن يحبونه و اللي تحبينه يمكن ما يحبونه عرفتي هالشي بينج و بين زوجج اما اهما مالهم دخل بهالموضوع …

يعني معزومه عندهم على غدا او عشا و حطو السفره على الارض لا تقولين ما اعرف آكل عالأرض
و هم لو العكس حطوها عالطاوله لا تقولين ما اعرف آكل عالكاوله عرفتو قصدي

لمن تشوفين الكل ياكل بإيده اكلي معاهم اذا مافي صحون و بس حاطين قفاش و شوك لا تطلبين صحون اكلي نفس الطريقه

خليج مع اهله نفس طبيعتهم اذا حسيتي انج مو متأقلمه او مو عارفه تاكلين سوي نفسج تاكلين و لا تقومين اول الناس نطري لمن اي احد من على السفره يقوم و ياحبا لو وحده من البنات او الحريم مو من الرياييل و مو شرط تنطرين ريلج بهالسالفه يمكن اذا قمتي ياخذ راحته بالأكل و السوالف مع اخوانه و خواته ..

اذا غرفتلج خالتج لا تقولين ابي من هذا و هذا و تتخيرين لا حبوبه ترا هالحركه حيل تنحسب عليج مو لج

قوليلها حطيلي على ذوقج او كل شي منج حلو حتى لو ما تحبين الاكله اللي بتغرفها لا تذوقينها لمن تنحط بالصحن

اذا قعدتي حاولي تقعدين على يمين زوجج احسن لو كان زوجج ماخذ راحته و ياكل و يسولف مع اهله و حيل مطيح الميانه لا تعلقين عليه و لا تقوليله قصر صوتك او تحاولين تتحكمين فيه خليه على كيفه هذول اهله و ما يبي يغير طبيعته جدامهم
هذا في حالة الغدا أو العشا خلط يعني الحريم و الرياييل مع بعض

في حالة الكل بصوب و نظام الريياييل بصاله و الحريم بصاله ثانيه نفس الطريقه اذا الخاله تغرفلج خليها تغرف على كيفها اذا الكل يغرف لنفسه غرفي شوي مو تترسين الصحن كانج ما شفتي اكل من قبل ترا العين عليييييج مو تقولين اسوي رجيم ما آكل بس ابي سلطه و لا لا ما ابي عشا مو يوعانه حبوبه انتي مو ابيت اهلج انتي ابيت اهل ريليج لازم تاكلين او على الأقل تسوين نفسج تاكلين … اكلي بس مجامله ترا اهم شي عند الخاله اهو الأكل لو ما أكلتي بتقول هاذي بتيوع ولدي لوووول

عينج على اكله او سلطه او ماي او عصير طلبي من ريلج لا تطلبين من اي احد ثاني او حاولي تطلبين من اقرب وحده قاعده قريبه منج لا تطلبين بنفسج ما ادري ليش احسها مو حلوه تطلبين و تعلين صوتج نصيحه لأنج ألحين في موقف الفحص و التدقيق

خلي ضحكج بصوت واطي لا تكركرين … و لا تحاولين تكونين ظريفه او تطيحين الميانه و تقلدين احد او تقولين نكت ترا يمكن اللي يضحكج ما يضحك غيرج … تو الناس على هالسوالف …
في حريم ينقدون على البنت اللي تسولف وايد و تسوي نفسها تعرف كل شي حتى لو تعرفين معلومات وايد لا تحاولين تصححين معلومه غلط قالها احد كبير بالعمر سواء خالتج ام زوجج او عمته او خالته او ابو ريلج او اخوه العود اذا بتبينين ان المعلومه غلط قوليها لزوجج بس بينج و بينه و بغرفتكم مو جدامهم …

هاذي اهم النصايح اللي قالوها لي امي و خالاتي بالنسبه لفن التعامل مع اهل الزوج و العزايم و العشيات ..
و في فن التعامل مع الزوج … بس تعبت بعدين أكمل …