عرايس قبل لا تشترينهم أقرأي هالكلمتين "هام جدا"

والصلاة والسلام على خير المرسلين

السلام عليكم ورحمة الله وبركاته

خواتي العرايس

صار معاكم هالموقف هنا في منتدى كويتيات

تدخل العروس المنتدى وتكتب محتاجة ساعة والا شرايكم بهالجنطة والا اكسسوراتي من وين

وطبعا بناتنا هني احلى خوات يهبون لمساعدتج

ولاحظت شغلة غريبة ومحزنة في الردود وحبيت أنبهكم عليها لأنكم خواتي وفضلكم علي كبير وساعدتوني بوايد شغلات

اقراوا هالكلام وراح تعرفون شنو هي الملاحظة.

الزواج نعمة ولا تدوم نعم الله إلا بالشكر قال تعالى: {لئن شكرتم لأزيدنكم ولئن كفرتم إن عذابي لشديد}

يعني بتحافظين وتبين الزيادة بالشكر
وعكس الشكر هو كفران النعم

طيب شعلاقة الشكر بردود البنات؟

وحدة تقول اشترى ماركة والا لا تلبسين
والثانية تقول شريتها ب2000 والثالثة كلفتني 1500 وأفكر واطالع شنو هالشغلة

والا هي جنطه والا ساعة والا اكسسوراه

وحتى قميص النوم وصل 200 و300

والجوتي تكرمون صار فوق ال50 وال60

ما اقول لاتشترون ولا من حقي أن احرم واحلل

لكن قلبي يحبكم وآتسأل هل نعتبر من المسرفين؟؟ هل شكرنا الله نعمة الزواج والمهر بهالطريقة؟ لأن الموضوع مو فلوس نقطها وينتهي لأ

الموضوع أكبر من جذي

الموضوع عمل محاسبين عليه وبنلاقي جزاءه

يا أما نعتبر شاكرين فيزيدنا الله من فضله ويديم نعمته علينا والا نعتبر مسرفين فيعذبنا الله بذنبنا لا سمح الله

لو سألتج من أفضل انتي والا الرسول صلى الله عليه وسلم؟
أكيد بتقولين الرسول صلى الله عليه وسلم

طيب الرسول صلى الله عليه وسلم كان في الحروب له جزء من الغنائم وتأتيه الهدايا ولكن مات عليه الصلاة والسلام ودرعه مرهون
يعني بس قوت يومه واحيانا تمر ثلاث ليالي لايوقد نار ببيته يعني اكله تمر وماء وشيء ما ينطبخ ويربط على بطنه من الجوع وهو بيده يملك الكون بأمر الله

واحنا الحمد لله كل شيء متوفر وقاعدين نبالغ في مشترياتنا

التوفيق ما تجيبه الجنطة الماركة ولا القميص بو 200

التوفيق بيد الله والحب الله وحده اللي يحطه بقلب زوجج فاطلبيه بطاعة الله

والله يا بنات بقلبي حجي وايد وأنا اختكم اتمنى تتقبلون كلامي لأن أقوله من قلبي وصادقة فييما احمله من حب لكم

أحبكم