|
|
عندي استفسار عن كليه البنات الجامعيه ..
شنو التخصصات اللي فيها ؟؟
جم نسبه القبول ؟؟
و شنو شهادتهم ؟؟ باكلوريوس و لا دبلوم ؟؟
و يعطيكم العافيه
التخصصات كلها علمية .. يقبلون العلمي بس
والنسبة نفس نسبة قبول الجامعة يعني 70 وفوق .. هذا اذا مارفعوا النسب السنة الياية
وطبعا يحسبون لج النسبة مع المكافئ .. يعني لازم تقدمين امتحان قدرات انقلش ورياضيات
الدراسة كلها بالانقلش العربي تنسينه بكليتنا .. يعني طول فترة دراستج بالكلية بس راح تاخذين 3 مواد بالعربي
اللي اهما ( تاريخ حضارة + عربي + عربي كتابة وعرض شفوي )
اما الباجي كل شي كل شي بالانقلش وطبعا هذا شي حلو عشان اللغة عندج تصير قوية ولما تتوظفين ماتواجهين اي مشاكل
تخصصاتها : 1- علوم المعلومات اللي اهوه يتعلق بالكمبيوتر
2- علم التغذية .. وفي بعد علم الاغذية ( تغذية تشتغلين اخصائية تغذية تتعاملين مع مرضى بمستشفيات او عيادات .. اغذية تشتغلين بمصانع او شركات اغذية مثل شركات الريجيم دايت كير وهالسوالف وهم تقدرين بالمستشفيات ومعهد الابحاث )
3- ادارة التقنية البيئية
4- علم التواصل واللغات ( حاليا مسكر عشان نقص الدكاترة بس كل سنة يفتحون مجال لطالبات يدشون يعني اذا تبينه التخصص سئلي رئيس القسم اول في مجال ولا لأ )
5- التصميم الداخلي والغرافيك وهالسوالف << ماعرف اسم التخصص بالضبط بس اهوه يتعلق بالـ art ( وهم مسكرينه عشان نقص الدكاترة بس مادري سمعت ان بيتبطل ! )