يمه أنتي الدوا أبي منج الثقه

السلام عليكم ورحمة الله وبركاته … شلونكم خواتي أمهات التحدي والصبر ..
هذا الموضوع تعبت عليه واايد وأتمنى يحوز على إعجابكم
رساله أوجها لأكبر دكتورة بعيوني .. وهي الأم (( خاصة ))

::

::
أم المعاق

أنا بقولها لج ووصليها للكل المعاق محتاج الثقه .. وليس الشفقه .. أنتي عارفه طبعا بقرارة نفسج هالكلام
لكن صعب التطبيق .. صعبه تقولين وتوصلين للناس اللي حولج وبكل ثقه … هذا المعاق أنا أمه !!

قوليها فديتج وبكل فخر وصليها .. للي ما عنده ثقه فيج .. هذا المعاق أنا أمه !!
علميهم منو هي أمه .. وشلون خلقت إنسان من المرض .. خليه يمشي يمج وين ما رحتي لأن هو محتاجج ..
محتاج نظرتج ولمستج له .. إنتي العالم بالنسبه له .. وانتي سمعه وبصره
لا يهمج من يكون .. وخلي الشفقه في عيونهم تزرع فيج الثقه .. ثقي فيه وعززي شخصيته .. ولا تقولين
مافي وعي أو إدراك .. لا تستندين على كلام الدكتور وتوقفين !! لا تكتفين .. جاهدي معاه وعطيه اللي يبي ..
والسمع والبصر والنطق .. كلهم مرتبطين بشي واحد … وهو اللمسه .. (( لمسة الحب والحنان ))
اللي منبعها انتي .. مصدر القوه والثقه له .. أنظري له بعين الثقه .. بعد اليقين بأمر الله وإستجابته لدعائج ..
ولا تنظرين له بعين الشفقه اللي الناس تشوفها فيه

المعاق طفل كبير .. يكبر جسده ويبقى .. بعقل الطفل

::
::

ياخادم الجسم كم تشقى بخدمته *** أتطلب الربح فيما فيه خسران
أقبل على النفس واستكمل فضائلها *** فأنت بالنفس لا بالجسم إنسان

مشكوره ياقلبي على هالموضوع صج والله محتاجين هالكلمات لان احنا مرات يحوشنا ضعف نفس ومانشوف نفسنا الا ذابحتنا الشفقه عليهم

تدرين ام عزوز والله يوم العيد انهرت يوم شفت الاطفال حوالينه مستانسين وهو ياقلبي مو داري بالسالفه يعني حتى انا ودي اثق بقدراتي

واني قادره اوصل ولدي لمراحل كبيره

نعم كلااااااااااام سليم الام هي الدواء وهم هي الداء اذا ماعطت طفلهاا الثقه بنفسه وحسسته بالحب والامان وانها تفتخر فيه وماتخشه وبالبيت وتقطه على الخدم وهي تطلع تستانس عتبي عليهم بعض الامهاات

مشكوره حبيبة قلبي
ماأقول إلا الله يعطيك العافيه ولا يحرمك الأجر
كلمات رائعه

يعطيج العافية على هالكلام المشجع
وفعلا الأم حضنها واحساسها بضناها غير والله لما تلمينه وتحضنينه من كل قلبج تحسين فيها وهو يحس حتى لو ما تكلم ااااه يقلبي عليهم نظراتهم تكفي تعرفين انتي يالأم شنو محتاج جان محتاج لمة ولا حضن ولا تمسحين عليه وتسمين يارب ياكريم ان تعطي كل ام الصحة والعافية لتربيتهم ومساعدتهم يارب.

مشكووورة

يا بعد قلبي يا أم صالح .. لا تقولين جذي صدقيني هم يحسون .. لكن الإحساس ما يقدروت يعبرون فيه
تلقينه داخلي .. ما يعرف يعبر عنه بالصورة الطبيعيه وهذا شي غصبن عنه

وراح تقدرين بس توكلي عليه سبحانه المتوكل .. وأتركي الأمل يفرش بدربه ودربج النور .. وإبدي بالخطوه
ومو كل خطوه ناجحه اللي ينجح معاي مو بالضرورة ينجح مع غيري .. أجرب خطوه غيرها
والأهم أن يكون بدون يأس .. بالعكس بقوه أكبر وتحدي أقوى

ربي يقر عويناتج فيه ويفرحج فيه أحسن الناس

نحترم رايج أم أسووم .. وما يضر الأم تروح تستانس .. بس وهي مأمنه على حشاشة يوفها
حنا نبي نتكلم بالواقع .. الأم محتاجه والمعاق محتاج .. وشتان ما بين الأثنين

لكن ثقتي وفخري بأنه ضناي أكبر من أي نظرة إنسان .. تخليني أحبسه داخل البيت .. كل نهايه اسبوع يطلع معانا
أذا الأجواء طيبه والمكان يناسبه .. ويقعد يمي ويكفي يتمشى معاي ويدي بيده أمشي يمه وأرفع راسي

ويعطيني وياج يا أم جود .. وربي لا يحرمك حبوبه

اللهم آمين فديتج

اكيد فديتج الام لهاا الحق انهاا تطلع وتستانس
بس انا اقصد فئه من الامهاات ماتطلع مع طفلهاا كلش وقاطتة على الخدم وفيه ناس تفاجات ان عندهم طفل من ذوي الاحتياجات الخاصه لانهم خاشينه وقاطينه على الخادمه حتى لماا يحتاج يتنوم بالمستشفى الخادمه هي المرافق معه والام تجي تزوره وقت فراغهاا وانا احكي من واااقع

مع احترامي للجميع

رفع

فعلا كلمج منطقي وبمكانه والام لازم تكون مصدر الحنان والطاقه والارادة لطفلها
وعمره الانسان ماعطه شي حقه وخسر
تغير يويو من مقبول للاحسن للامتياز في حياته
كان اهو دافع الاراده داخلي
هو اللي حط فيني الثقه وزرعها مو انا ولله الحمد والمنه

رفع