يحق لرئيسة القسم تكرفني بهالإجازة ؟ واايد شايلة الهم

حبايبي معلمات أبي منكم كلمتين بس ،
رئيسة القسم طالبة مني أسوي امتحانات الفاينل حق الكورس الياي خلال هالإجازة (اسبوعين ) اللي بتنفس فيها

هل يحق لها تشغلني في هالإجازة ، وللعلم انا تعيين جديد صارلي كورس واحد بس بالتدريس وما عندي أي فكرة بالمنهج لاني طبعا اول مره أدرسه

شنو رايكم ؟؟

انا نفس حالتج صارلي كورس بس
ورئيسة قسمي طلبت مني امتحان فاينل بس سلمته قبل ماينتهي
الدوام عشان ارتاااااااااااااح بالاجازة

والله المشكله احنا موعارفين اللي لنا واللي علينا
كل شي يطلبونه نسوي

لا ما يحق لها ..
بس شسوي ..

احنا بعد مو مقصرة معانا كلش ..
مسوية لنا اجتماع اخر يوووم .. وطلبت منا شغل امتحانات واستعدادات لانشطة الكورس الثاني ..
وتقول ما نجي الكورس الثاني .. الا كل وحده موريتنا نموذج من شغلها ..

الله يعين

طبعا مالها حق

اذا طالبه منج الشغل قبل العطله ايام الدوام من حقها

لكن تطلبه بوقت العطله وتسليمنه بعد العطله طبعا لا

يعني اهي تعطل وانت لأ ؟؟؟؟

واحنا بعد طالبة منا اختبارات وانا راح اسوي اختبار للصف اللي عمري ماسويت له اختبار الله يهديها بس خلتني احااتي بالعطلة ياربي الواحد يبي يرتااح وينه ووين الاختبارات وعوار الراس .

نصيحة دقي على ربعج اللي معاج بالقسم القدم منهم سئليهم شسويتو
اذا سوو الامتحان سويه واذا لأ مردج بتسوينه ببداية الكورس
اذا فاضية سويه واذا مالج خلق قوليلها ما فضيت بالعطلة وسوييه اول الكورس وقدميه مبجر لها

بس كلمتين ؟؟

ياااااااااحبكم للتحلطم

الحل

انج تكشتين فيها و تقولين لها نسيت

لا تحاتين كل شي ملحوق عليه
ماراح تطير الدنيا اذا قدمتيه بداية الكورس
بس عاد انتي
شدي حيلج لاتطولين فيه

والله يعينا

انا اختي والله رئيستها كارفتها
وكل يوم تطلب طلب واحنا بالعطلة لا ستانست بالطلعات
والبر كل يوم تحاتي
والله لو انا مكانها جان اقولها انتي مالج حق علي بالعطلة اما بالدوام تطلب الي تبيه

أغلب رئيسات الأقسام يطلبون الامتحانات بعد العطلة مباشرة عشان يسلمونها للتوجيه ويفتكون

سويه وريحي عمرج وإذا قصدج إن ماعندج خبرة تقدرين تستعينين بامتحانات قديمة وتغيرين في الأسئلة

لا حبوبة ما يحقلها تطلبه منج بوقت الإجازة

بالمنطق .. ما يحقلها هالشي

مثل ما اهي مرتاحه بالعطله … انتي من حقج ترتاحين .. و تستانسين

احنا طلبت منا نفس الشي … و انا ما فكرت حتى مجرد تفكير اني اسويه …

مع الاسف المسأله صارت استعباد … مو وظيفة .. ينهد حيلج فيها

كافي عليها ان احنا نسوي الشغل اللي مطلوب منها .. و اهي مرتاحه ..!!

استغفر الله العلي العظيم و اتوب اليه

ياترى الاحساس ليش انعدم عند البعض .. !!

كوني رئيسة قسم اقولج مالها حق بس طيبة خاطر منج اذا كنت حابه تبرزين نفسج وتبينين نشاطج واذا ماتقدرين لا تسوين وعتذري منها بسلوب لبق بانج ماقدرتي لضروفج العائليه وان زوجج او اهلج ماخلوج اتقعدين بالبيت كله طلعات وقالولج شغل المدرسه بالمدرسه وشغل البيت بالبيت

لا مو من حقها

حسبي الله ونعم الوكيل عسى ربي لا يسعدهم ولا يوفقهم آآآآآآآآآآمين

حبيبتي لا تتضايقين ولا تشيلين في خاطرج لا تسوين الامتحانات الا اسبوع الياي

واستانسي بالعطله وتهني

وصدقيني ماراح تكلمج ولا راح تسألج عن الامتحانات

واذا سألتج قوليلها كنت مشغوله بالعطله

وماتقدر تحاسبج ولا تسويلج شي مومن حقها لان اهيا الغلطانه