يا صاحبات الكيد العظيم ساعدوني نرجع مره لزوجها

قوه بنات شلونكم ..

ان شاء الله طيبين .. اول شي الحمد لله اني ارتحت منزمااان من عوار القلب الي ايي من ورا الريال وكلما شفت وحده تعاني مع ريلها قلت الحمد لله على حالتي .. صح الطلاق صعب بس راحة الباااااااااااااااااااااال وااايد اهم على الاقل تنامين على المخده مرتاااااحه ولله الحمد .. على اية حال مو هذا موضوعنا ..

السالفه يا بنات عندي رفيجتي واختي وحبيبتي من اولى ثنوي واحنا مع بعض .. ورفيجتي الحمد لله مره عاجله مالها الا بيتها وعيالها ووظيفتها وبيت اهلها بس لاتحب الطلعه ولا تعرف خواره ودواره متدينه وتخاف الله وفقيره حيل وعلى نياتها ..

وسبحان الله مثل مانتو عارفين الفقير اللي على نياته ما يعيش بهالدنيا للاسف وتستغل طيبته دااااائما ..

خواتي رفيجتي متزوجه وعندها عيال اسم الله عليهم .. عانت من مشاكل مع ريلها بالبدايه وتطلقت منه بس لما جرب غيرها عرف قديرها فرد لها عقب ما طلق الثانيه .. الحين عقب ما ردت له صارلها معاه حول 8 سنين الحمد لله ..

المشكله اني اليوم زرتها .. وانا ادري انها زعلانه ببيت اهلها من زمان لكن امس حيييل كسرت خاطري قاعده تبجي تقول ارمضان هذا نكمل سنة من انفصلنا .. ( ما تطلقوا بس منفصلين ) اهو مسوي فيها حركه باااااااااايخه حدها وعلى هالاساس زعلت عليه زعله جايده ولان ريلها راسه ياااااابس قطيعه ما يبي يتنزل يردها .. مع انها تقولي انا ادري وابصم لج بالعشر انه متحسف ويبيني ارد ريلي واعرفه وتقول لان هو عارف نفسه غلطان ماله ويه يتنزل يقولي رجعي ( هو من النوع اللي ما يتحرك الا لما احد يدزه ) يعني تقول لو انا ادزله مسج المح له او مسج غزل مثلا بتشوفينه بلحظتها يدق علي ويتعذر ويردني .. بس انا ما ابي ادز له مسج ولا ابي ابين له شي ابيه هو يتنزل وايي من نفسه بدون ما انا اساعده وانزل نفسي وابادر مثل كل مره .. عرفتوا بنات ..

هي تقول انا احبه واموت عليه وماقدر اعيش بدونه وعيالي تشحططوا خلاص ابي ارد بيتي .. بس ابي ارد بشروطي ما ابي ارجع وباجر يعايرني انتي رديتي .. تقول ابي ارجع عقب ما اشرط عليه جم شرط بسيط ( قالتهم لي والله ما طلبت شي البنت شروط عاديه كلمره تتوقعهم من ريلها )..

المهم .. سؤالي لكم .. شنو ممكن تسوي البنت بحيث ترجع لها ريلها بدون ما يحس ؟؟ لان اذا حس انها تبي ترجع ما راح تقدر تشرط عليه ؟؟ لا ويمكن هو يشرط عليها بعد .. شتسوي بنات ؟؟ شنو الحيله ؟؟

على فكره علاقتها بام زوجها وخواته مقطوعه .. هم من النوع اللي مالنا شغل .. ولانهم عارفين خمال ولدهم فمالهم ويه يدقون عليها او على امها ..وهي ما تبي تلمح لهم او تقولهم حاجوه لانهم من النوع اللي يمنون على الواحد ويتفضلون عليه فقتول ما ابي ادخلهم بالموضوع بالمره باجر ما يظل بيت ما يحجون فيه عني وعن سالفتي مع ريلي .. ( واااااااي شهالناس الله يعينها ) ..

انا ماقدرت افيدها وايد صراحه وما عرفت اساعدها للاسف .. قلت استشيركم يمكن تلقون حل ..

وتسلمون

حياتي الله يعينها بس خل لبوها او واحد من اخوانها يدق عليه ويقوله المره اللي عندنا بيت ابوها مو عيزان عنها بس نبيلها حل يا تطلق ولا تجي تاخذها وما نبيها تظل معلقه وزوجها موجود

ابوها داق عليه ما يرد طرش عليه عند اهله مو راضي ايي تقول ماله ويه مستحيي حده خصوصا انه مسوي حركه بايخه حييل فيهم ..

الصراحه هي قالت لي هو مو من هالنوع بس شغله صارت واضطرته يسوي هالحركه ولا هو من هالنوع كلش وهذا اللي مخليه مستحي وماله ويه .. متنحش من اخوانه شفيج ..

اقولج اليوم احتررررررررررررت ما عرفت شرد عليها ..

خليها تدز مسج تبارك لة للرمضان وراح يكلمها صدقيني

عسى الله يرجعهم حق بعض ان شاء الله

شرايج انكم ادزون وحده تدق على امه وتقول لها ولدي يبي يخطب المره (رفيجتج)
على اساس ان عبالها انها تطلقت وخل تسألها عاد شنو سبب طلاقهم ؟ وان ولدها شافها في مكان وقاعد يسأل عنها قبل لا يخطبها ؟
وطبعا راح تنصدم أم الزوج وراح تدافع عنهم وتقولها ان ما طلقها

ان شاءالله هالخطه تنفع

حليب كاكاو رافضه تدز مسجات اليوم قلتلها انا بس ما تبي تقول لي متى انا ابادر خل يتعذب شوي ابيه يحس بمعاناتي معاه ابيه يتحسر شوي عقب ما كان في مره مجابلته ودافنه روحي عشانه وعشان عياله والحين بروحه .. امه يالله نفسي يعني محد مداريه ..

نور عيوني .. فكره بس اتوقع صعبه شوي ماراح تجرأ عليها رفيجتي انا بقولها بس عارفه الرد من الحين ..

وتسلون

مادري شقولج .. يارب يحنن قلب زوجها عليها انشالله … هالرياييل عقد الحمدلله والشكر كله يبون الحريم اهما اللي يراضونهم

اي والله مشكله عويصه الله يحنن قلوبهم ويردهم لبعض ان شاء الله ..

خلي احد من اعيالها يدق على ابوه
يكلمه يقول له يبا اشتقنا لك . او اي شي .. يمكن قلبه يحن

خل احد من عياله يدق عليه يكلمة يمكن يحن قلبة

هلا حبيبتي

والله سهله حيييييييييييل سهله

فكره نور عيوني مع احترامي لها تودي بداهيه بتقول امه شنو انتي مشهره بولدي ان مسوي فيج شي ؟؟

والا انج زعلانه عند اهلج

وبعدين بتقول حق رفيجتج استحي متزوجه ويخطبونج

راح تتعقد المسأله

حبيبتي

الريال اذا

اذا

اذا يبيها

دزه صغيره ويتحرك

مع اني شاكه بهالشي اشدعوه كل هذا مستحى يخليه يخلي مرته سنه كامله

شنو ماشتاق لها !!

السالفه ببساطه تشوفيها علاق يتعلق فيه ويغطي على كرامته ويبين ان انا ياي بسبب مو مني والطريج

يعني

خلي رفيجتج تسوي روحها مريضه

ولو ادش المستشفى يكون احسن

وادق عليه تقوله تعال اخذ اليهال انا تعبانه ومحد معاهم

او

واحد من عيالها الي تعرف ما يفتن يقوم بهالدور

واذا يا عشان يشوف ولده ابتسامه خفيفه واشلونك وشخبارك وبسسسسس

لاتكشر بويهه ولا تعطي وي زياده خلي الوضع عادي

واذا ماتحرك ولا سوا شي

لاتكررها

لان ما يبيها

عياله صغار اكبر واحد يروح اولى ابتدائي .. لان هي ما احملت بسرعه قعدت جم سنه تعالج .. ثانيا اهو ايي ياخذ عياله يشوفهم يعني مو منقطع عنهم بس على كلام امهم ما بينه وبينها حوار يسوى اذا يبي شي مسجات اكثر شي على الجايد يدق او تدق تليفون ..

شنو الحل يا ربي الله يعين ..

الله سوفت ليدي خووووووش فكره تصدقين ..

عاد بنتها الصغيره تعبان صدرها شوي مع الغبار امس ..

ماكو الا اقولها تروح خاص وتعرفين الخاص على اي شي يحطولج درب مثل ما سوو بولدي وهو بس صخونه عاديه ..

فبقولها تروح وتشوف اذا قالوا لازم درب تدق عليه وتقوله بنتك تعبانه منومينها وحاطيلها درب جوووووووووود تظبط السالفه ..

يا ربي مادري اضحك ولا ابجي ..كل هالدوابير عشان هالرياييل .. الله يعين ..

بس على فكره ريلها يموووووت عليها ويبيها والادله على ذلك وايد بس مو كلشي ينقال بالمنتدى .. وتسلمين

انا شاكة ان هالمرة اللي تتكلمين عنها اعرفهاااااااا عدددددددل مددددددل

والله مدري

بس دايم اذكر.

دع الايام تفعل ماتشاء..

احسن احسن بلا دوابير ولا يحزنون

خيرته بيحن لها

اذا هو مطنش هي ليش تحر عمرهااذا مو متوظفه

خل تروح تدورلها وظيفه او شي تلهي عمرها فيه بدل التفكير..

وان شاء لو ربي كاتب لهم الرده بيردون ..

بس اذا هي حيل ماتقدر عنه

خل تنستنى يوم زواجهم ..

وترسله مسج عن هاليوم

مسج حلو يعني

تكتب بهاليوم كنا سوى

وكنا احلى عروسين

واليوم كلن في طريقه..

وبس..

الله ييصلح بينهم..

عاد طمنينا عليها..