ولدي والخوف

بنات ولدي مادري شفيه ايكون قاعد يلعب ومستانس فجأة يهد كل شي واييني ركض ويصارخ مخترع جنه شايف شي ؟؟!! حتى لو اخته الصغيرة اتمر يمه ايخاف منها لاتشوفون تعابير ويهه جنه شايف وحش مو اخته ..وتكرمون حتى بالحمام يرفع راسه فوق وفجأة يخترع يقط نفسه علي !!
انا ملاحظة عليه هالسالفة فوق الشهر الحين والخدامة اليوم قاعدة تقولي عن سوالفه مع التخرع تقول حتى بالحمام قمت اخاف واخلص واطلع بسرعة ..

والله حده ضايق خلقي عليه والمشكلة ان عمره سنتين و3 شهور ومايتحجى عدل عشان اعرف اشفيه .. منو مرت بنفس هالحالة ؟؟ شوري علي شسوي حبيباتي

اقري عليه قرآن والمعوذتين يمكن يحلم بالليل ..

منو ينام معاه ؟؟

تداومين ولا لأ واذا تداومين عند منو تخلينه ؟؟

الله يحفظه لج

الخدامة تنام عنده بليل واشغل قرآن حزة النوم والحمدلله بليل نومته هادية
وأداوم واخليه بالبيت عند الخدامات مع اخته الي أصغر منه

السلام عليكم اختي شفت موضوعج وتضايقت ياعمري لة اتخلينة ينام عند الخدامة ؟ نصيحةحطي كاميرا مراقبة

اكيد مخترع من شي احد مصرخ فجاه ولاشايف شي يخرع بالتلفزيون انتي اقري عليه المعوذات وسوره يس واذا تقدرين هاليومين خليه عند امج على مايهدا شويه وانتي حاولي تكلمينه حتى لومايتحجا عدل بس يفهم قولي له انت قوي وشاطر وحاولي تهدينه وتطبطبين عليه وتشوفين شنو يخاف منه وتقعدين معاه بنفس المكان ولعبي معاه وحسسيه ان هالمكان حلو مايخرع حطيله لعبه بنفس المكان والعبي معاه الى ان يتعود عليه ومايخاف منه

ياعمرى عمره ……….يعله مايشوف شر ان شاءالله………..

ياقلبي لاتخلينه مع الخدامه والله من كثر مانشوف ونسمع صرنا انخاف منهم …….. اقرى عليه المعوذات وحصنيه ترى احيانا الياهل يشوف شغلات احنا مانشوفها جذيه تقول امى عشان جذي سمى عليه والله يحفظه من كل شر

حبيبتي يزاج الله خير على الرد ودي احط كاميرا بس اخاف اشوف شي واتعقد من الخدم شسوي

والله انا اقعد احاجية على طول واقوله ما كو شي يخوف انت شاطر قوي بس قصدي ودي ايتحجى عشان يقولي شنو الي مخرعة انزين معقولة ايخاف من اخته الصغيرة !! هذا الي مو داش عقلي اهو عادي يحبها يلعب معاها فجأة جذي جنه شايف شي ايصارخ من قمة راسه ويبجي ويركض عندي مخترع لما المه واقرى عليه ويهدا .. يعني حتى حوض السمج الي عنده من عمره 3 شهور متعود عليه وايحب السمج الحين ملاحظة عليه يقعد اشزينة يلعب معاهم وفجأة اتييه نفس الحالة يصرخ وايين ركض
والله حالتة محيرتني

انا انومه عندي بداري لما يتعمق بالنومه بعدين اودية داره والخدامة خليتها تنام عنده لانه كان يقعد من النوم يبجي من الخوف ومن خليتها اتنام عنده الحمدلله نومته صارت احسن على الاقل يحس ان احد معاه مو بروحه وانا غرفتي مجابل غرفته واطل عليه ما خليه شسوي ياربي كاسر خاطري ودي اخليه ينام عندي وبفراشي بعد بس اكبير اسم الله عليه ما ابي اعوده

اذا خداماتج زينين يبا لا تشكين فيهم ولا توسوسين

وبالنسبة حق وليدج كل يوم حزة المغربية اخذيلج حرمل واقري عليه وفري على راس الولد وبخري مكانه والبيت كله على ما يهدى واقري على ماي سورة يس 7 مرات ورشي زوايا بيتج وفراش الياهل وحطي بماي البراد شربي وليدج منه

والله خير حافظ وهو ارحم الراحمين

يزاج الله خير اختي أم حيدر ومشكورة على الدعوة الحلوة

السلام عليكم

أختي بجد ضيقتي خلقي الله يحفظه ويخليه لج يارب

اختي معلومة اقولها لج وانتي اذا كلامي فيه شي من الصحة راح تعرفين

اذا انتي ملتزمة بصلواتج واذكار الصباح والمساء وكان في احد ينوي يضرج بسحر او حسد وماقدر لانج ملتزمة بدينج يتجهون لاحد الابناء علشان يشغلونج فيه ويوصلون لج عن طريقه هذا جانب اذا هذا الجانب خاطئ معناه ان ولدج احد مخوفه من شي وتم عالق براسه وهذي صارت مع ولدي لين مشيت معاه حبة حبة وخليته ينسى الامر اللي صار له والله يكون بعونج ويخليه لج يارب ويحفظه من كل شر

احس في انه بالسالفه !!

ياقلبي حطي بالج عليه جابليه وحاولي تشوفين تصرفاته ويات فتره هم جذي بولدي كله يطالع السقف ويقول عوو وانا اخاف معاه اقول ياربي شنو شايف ! بس بعدين شجعته قلت له لاتخاف من العوو انت بطل روح طقه وتميت معاه جذي لما بروحه نسى هالسالفه وسالفت انه يخاف من اخته يمكن كان يلعب معاها وخذت منه شي وانتي على بالج مخترع او نوعه من اي شي يصارخ ويخاف وهم حطي عينج عالخدامه يمكن مخرعته بشي والله اعلم

تسلمين انسانة حبيبتي على الكلام الحلو وبحاول معاه لما ان شاء الله يهدا حبيبي الله يحفظه والله اني من ارجع الداوم اجابله على طول حتى لو اضطريت اطلع مكان اخذه معاي ما اخليه بروحه كلش وربي كريم والله يحفظج ويحفظ كل من يعز عليج
بس ما علمتيني لو في شي مخرعه شنو أٍوي ؟؟ شنو الخطوات الي سويتيها مع ولدج الله يخليه لج

شوفي حبيبتي سوالف الحرمل و سورة يس ما وردت عن الرسول صلى الله عليه و سلم إللي تقول عنه الإخت أم حيدر و لازم يوميا تقرين على عيالج المعوذات 3 مرات و أية الكرسي و أذكار الصباح و المساء (تلقينهم بحصن المسلم) و في دعاء الرسول عليه السلام كان يحصن الحسن و الحسين رضي الله عنهم فيه و هو "أعيذك بكلمات الله التامه من كل شيطان و هامه و من كل عين لامه" و لما تقرين الأذكار نفثي عليهم، و لي طلعتي من البيت و خليتي عيالج قولي هدعاء "أستودعكم الله الذي لا تضيع ودائعه"
و الله يشافيهم و عافيهم و يصلحهم و يهديهم