ولادتي عالسريع .

شلووونكم حبايب قلبي………..

واخيرا ولدت…..

وهذي قصتي عالسريع..
____________________

انا اخر ايام حمالي كنت تعبانه وايد فماتحملت اقعد بالبيت ورحت عند اهلي ليما اولد وكنت كل يوم ادعي اني اولد..

ويوميا ماسكه هالرزنامه واطاع فيها…

ولا كان في بوادر ولاده نهائيا..

ليما في اليوم الموعوود يوم الثلاثاء 8/7/2008 الساعه 9 الصبح كنت نايمه..

فحسيت بضغط من تحت واول ما وقفت نزل علي ماي مو طبيعي وانتوا بكرامه..

كأني فاتحه الدوووش على نفسي…

واول ما طلعت من الغرفه على طوول دورت امي وكانت مشاعري حده مختلطه خوووف مع فرحه وكل شي مع بعض..امي شافتني قالت ماشاء الله لا اله الا الله يلا رووحي لبسي خلينا نوديج هذي ولاده..

ودقيت على ريلي كان نايم وما يرد على التليفون..

وراحوا قعدوا اختي من النوم على شان تودينا… اول شي ما صدقت وياتني واهيا نايمه وكشتها طايره وحاتها حاله..

ورحنا ركبنا السياره وانا احاتي اني اوصخها..واقولهم لا اوصخها امي تقوول عادي انتي شفيج..

وعلى ما وصلنا مستشفى السلام صوب الطوارئ دخلوني غرفه الفحص وشافوا الضغط وحرارتي ونبظ الجنين..

وودوني غرف الولاده ودخلت اختي معاي وعطوني لبس الولاده على ساس ألبسه وبمت على السرير وياتني ممرضتين وحده تحطلي ابراه ووحده تحطلي التخطيط…

وياتني دكتتوره وفحصتني وقالت ان الرحم مفتووح 2 سانتي يعني تو الناس عليج..

واختي طلعت تطمن امي علي.. وظلت معاي ممرضه تسألني ..في حساسيه؟
في سوي امليه"عمليه" اول؟
في……………….؟
وطبعا التحقيق الدائم..

بعدها حطوولي طلق صناعي وبتدا العوار وكل ماله يزيد..

قالت الممرضه انتي فيج طلق تبين ابراة ظهر قلت لا ما ابي..

عطتني الكمام علشان العواار..

وانا متخدره اخذت التليفوون ودقييت على اختي وقلت ابيج تشخلين ريلي وانتي تدقيين عليه..

ودشت علي امي وقعدت تسوولف معاي وانا ما ادري شنو اقوول

شوي جان يدش ريلي وهم قعد يسولف معاي وانا ما ادري شنو قاعده اقوول

ودشت علي اختي العووده .

المهم ان العايله الكريمه كلها كانت عندي

وكل شوي تمرني الدكتووره تفحصني وقالت ان الرحم مفتووح 4 سانتي

حزتها حسيت بالعواار موت وقلت ابي ابره ظهر …
بس امي ما رضت …
قعدت ابجي من العواار.. واقوول حق امي كلها ب80 دينار ليش ما تبيني اخذها ليش؟

لما وصلت الساعه 4 العصر وانا على نفس الحاله..

حزتها فحصتني الدكتووره جان تقوول الرحم مفتووح7 سانتي بس الجنين مو نازل تحت..

شالوا الكمام عني وحطوولي اكسجين علشان الجنين نبضه قعد يقل..

قعدت احس بكل شي وصحصحت على الاخر..

واصارخ من العوار من قمت راسي..

وطول هالفتره وانا ينزل علي ماي.. الدكتوره قالت خلاص الجنين نشف الماي عنده ليما الحين ما نزل تحت..
ونبضه نزل وايد..

وتأزم الوضع وايد وانا امووت وارد اصحى مره ثانيه من العوار..

فقالوا لازم قيصريه.. ومن قالوا قيصريه ابتدا الفلم الهندي كل الي بالغرفه معاي قعد يبجي..

اختي دقت على ريلي وقالتله يوقع على اوراق العمليه ضروري…

فخذووني ودخلووني العمليه وانا اقوولهم ابي تخدير عطووني تخدير بسرعه …

بطلت اعيووني الا انا بالافاقه.. الممرضه تقوول بيبي كويس كله كويس..

فودووني الغرفه ولقيت الاهل كلهم مجتمعين ويطالعووني ويبتسمون..

وبعدها وروني البيبي وكان احلى بيبي شفته بحياتي..فدييته..

وجذي تمت الولاده والحمدالله