نصيحة مني

خواتي اليوم رفيجتي تسولف لي عن ولدها وشلون الاطباء الله يسامحهم كل يوم حجوة يقولون لها

لين بتستخف من كثر الافلام اللي يسويها بعض الدكاتره فذكرتني بسالفتي مع بنتي اول مايبتها وبقول لكم سالفتي يمكن تستفيدون منها

انا الله يسلمكم لما حملت في بنتي الله يصلحها يارب ويخليها لي ان شالله ولدتها بالشهر الثامن لان ضغطي ارتفع وماقدروا ينزلونه فولدوني بعملية قيصيرية ويبن بنيتي الحمد الله

طبعا حطوها بالحضانه لان كان وزنها 1.600 جرام ياحبيبتي جنها دياية عاد ثاني يوم الولادة لما صحصحت عدل من البنج ودتني لها السستر بشوفها المهم وانا قاعدة ياني الدكتور جان يقول لي بنتج فيها تشوهات خلقية في حلجها وماتقدر ترضع والله العظيم حسيت قلبي بيوقف وشلون انت يالدكتور الفاهم تقول لي انطر ابوها عالاقل او انطر عليي يومين حسبي الله عليك

المهم بجيت بجي مايعلم فيه الا ربي وحسيت ان نهاية الدنيا سبحان الله وقاموا يهدوني ودتني السستر غرفتي ودقيت على ريلي يالله اتكلم وعلى طول ياني

والحمد الله طلع بنيتي فيها كلفت بلات (فتحة في سقف الحلق ) وعقبها لين صار وزنها كيلوين طلعت من المستشفى بس كنت كل اصيح شلون بتعيش عندي والحمد الله يارب ربي عاني وعرفت لها وصار كل شي سهل

طبعا صار عندها تأخر بالحباي والمشى حتى الاتزان بس كنت ماطوف لها علاج طبيعي ملتزمة لو فيني الموت اوديها وربي لك الحمد صارت طبيعية 100 % بفضل رب العالمين

سويت لها لي الحين 4 عمليات والحين قاعدين نعالج اسنانها لانها ياحبيبتي اسنانها محد يعرف الثاني كلهم متهاوشين مع بعض

المهم يوم كان عمر بنتي اشهر يعني 3 او 4 اشهر كنت اراجع فيها عيادات وااايد بالمستشفى وكان في دكتور الله يسامحه مع ان والله لا طرى عليي دعيت عليه من كل قلبي ولي اليوم لا ذكرت كلامه تخنقني العبرة هذا الدكتور الله يسلمكم داشه عليه بالواسطة بعد والله ما انسى تقول له اختي ( واسطتي) عطها تحويل حق العلاج الطبيعي جان يقول لها اصلا ماكو فايدة منها ولا من العلاج الطبيعي انا بكون صريح معاكم البنت ماراح تمشي واذا كبرت راح يكون فيها تخلف عقلي بس علشانج مترون راح اعطيها تحويل

اذكر يومها تهاوشت وياه وانا اصيح وطلعت وخليته يولي بس كانت اختي وريلي موجودين معاه حسبي الله عليه المهموديتها الالماني يوم كملت 6 شهور ووريته اشعاتها وكل تقاريرها وقلت كلام الدكتور الفاشل قال لي ماعليج منه ومن كلامها الطفلة مولودة ناقصة فشي طبيعي التعرجات اللي بالمخ اقل من الطبيعي والمادة بتكون اقل فان شالله ماراح يطلع فيها اي شي وراح تكبر وتشوفينها

والله الحمد الله جابلت بنيتي مع مواعيد الاطبه والعمليات سكروا الفتحة اللي بحلجها وردت انفجت مرة ثانية والحين اكمل علاج ضروسها

بنات بنتي بتروح ثالث ابتدائي والسنتين اللي طافوا ربي لك الحمد من المتفوقات بالمدرسة وذكية ومافيها اي شي كانت باولى روضه وثانية روضه واولى ابتدائي بثنائية اللغة والعام نقلتها الحكومة والحمد الله كله متفوقة شفتوا لما قال الدكتور راح تطلع متخلفة عقليا والله العظيم اقول حق ريلي بوديها حقه وبقول له هذي اللي كنت تقول عنها بتطلع متخلفه عقليا يا متخلف حسبي الله عليك وخصوصا بحفلات التفوق وااايد اييني هالشعور اني اوديها له

فياخواتي لاتهتمون حق كلام بعض الاطباء والله بعضهم فاشلين ويسوون عمرهم فاهمين فاسعوا وتعبوا على عيالكم وتوكلوا على ربكم والله ماراح ينساكم

هذي قصتي وان شالله تستفيدون منها انتو ورفيجتي اللي بتين على ولدها الله يشافيه لها يارب ويشافي لكم عيالكم ان شالله