نداء عاجل للاخوات الى خذوا عيالهم منهج العربى الجديد لاولى ابتدائي العام الماضى

السلام عليكم اللى خذوا عيالهم منهج امل فراشة العام الماضى ممكن تعطونى فكرة متى بيعطونهم الاحرف وشلون راح يكون طريقة تعلمهم الاحرف ومتى يعطونهم املاء خارجى باحرف بسيطة تكفون ضرورى اي وحدة عندها فكرة عن الموضوع لاتبخل علينا

اختى
مع كل درس لو تفتحينه
اهم مو بس يدرسون القصة و الكلمات
مع كل درس يدرسون حرف او حرفين
مع اوضاع الحرف (في بداية الكلمة و في نهاية الكلمة و في وسط الكلمة)

لاحظي التمارين الخاصة بكل درس
كل تمرين يركز على حرف معين

بحيث في الفصل الأول …. يخلصون مجموعة من الحروف مع موضع كل حرف
و في الفصل الثاني ….. يكملون باقي الحروف و هكذا

يعنى المفروض على نهاية السنة يخلصون الحروف كلها و يغطوون جميع مواضع الحروف من خلال اكثر من قصة

ألحين المفروض عليك كأم…. المتابعة ….ثم المتابعة…. ثم المتابعة

كل درس ياخذونه …ركزي على الحروف بالبيت لان اهو بعده اولى كل شي عباله لعب بلعب
فأنتى ثبتى المعلومة بالبيت

و حرصي انه يحل كل تمارين الدرس الموجودة بالكتاب
تمارين الكتاب كثيرة و مفيدة و ضروري يحلها كلها لانها تتكلم عن موضع الحرف اللي يدرسه بأكثر من مكان
لان كل درس متعلق بحرف معين حتى يثبت شكل الحرف بمخه اربطيه بالقصة اللي ياخذونها بالدرس

فكرة المنهج الجديد وايد حلوة …. مشوقة و غير مملة
بس يبيله ابلة شاطرة + متابعة مستمرة بالبيت

والله حوسه المنهج هذا؟؟؟

الله اعلم

رفع…

مشكورين خواتى على الرد واختى كويتية وين الحروف اللى تقولين عنها خلص الكتاب وماعطوهم الا الالف والنون وين باقى الحروف وياريت اى احد عنده معلومة عن طريقتهم عشان الياهل يعرف يقرا ويكتب مو يحفظ تفيدنا والااهم اعتمادهم راح يصير على الام

احنا بدينا بالكتاب الثاني وصح ياخذون حرف بحركاته ومواقعه بالكلمه مع كل درس بس المشكله هم ياخذون الدرس كله ويتملون فيه واهم ليلحين ما خلصوا الاحرف .

اختى لو تفتحين كل درس
تلقين بالهامش انه يركز على حرف معين
مع مواضع الحرف في اول + وسط + اخر الكلمة

كذللك التمارين
التمارين لكل درس كثيرة و اهم راح يدرسون تقريبا 5 او 6 كتب ضعاف طول السنة على مدى فصلين و كل كتاب ضعيف (مثل مجلة مصورة) و متروس تمارين و صور عن مواضع الحرف بسرعة يخلصونه و يتكلم عن قصة معينة
و كل درس فيه يمكن 6 او 7 صفحات كلها تمارين لمواضع مختلفة لنفس الحرف
فحرصي انه يحل تمارين كل درس كاملة

انتو يمكن في البداية شوي تحسون ضايعين
بس حرصي على التمارين انه يحلها كلها
+
راجعي الدرس معاه يوميا
مرحلة اولى ابتدائي مرحلة تأسيس و تحتاج متابعة من الأبلة و من الأم مع بعض …لان الطالب بعد موفاهم ان هذي دراسة و جد
و الله يوفق عيالكم جميعا

انا مع جرح الناس بنخلص الكتاب وبس ما خذين الألف والنون ماكو غيرهم هالحرفين بس الي الأبله امركزه عليهم واتكتبهم اياهم بدفتر الواجب أشوه اني كنت اموديه ولدي روضه خاصه ومعطينا الأحرف كلها مع حركاتها وموقعها من الكلمه و الا جان اعلوم , ومع هذا ساعات يلخبط بالأحرف لأن الياهل يبيله وقت على ما يحفظ واستمراريه . الله يعينا بس

والله صج احس انى ضايعة وعلى قولتهم ايد واحدة ماتصفق وهالمنهج فاشل مايأسس الياهل يبيه جاهز ماكو الاادخلها القاعدة الحلبية وماقصرتوا بنات على المساعدة

انا ولدى عطوة حرف ا ر ن س ح وانا لما ياخذ الكلمة اقرية حرف حرف واخية يحفظة زيادة على الاحرف الذى خذاها وعلشان موبس يحفظ الكلمة راح ينساها مع الوقت لازم يعرف يتهجئ انا جذى ادرسة ماعلى من المنهج

انا انشالله راح اسوى جذى يا لولى كاتى لكن ابيهم يساعدونا يعنى المفروض يعطونهم كلمات مجردة من المد والتاء المربوطة وغيرها ولكن لاحياة لمن تنادى ماقول الا الله يعينا وياكم ويساعد عيالنا

الله يعين عالدراسه صج حووووسه ولدي اولي وماداوم من اول شيء واحس انا وياه ضايعين