|
|
سلام عليكم
صراحه ماعرفت وين احط الموضوع حطيته بهل القسم
انا صارلي فتره تعبانه اراجع بالطبيب
يعني افتريت عل جم مستشفى
او نمت بالمستشفى جم يوم
ادعولي
المهم انا الحين تعبانه او مالي خلق ماسكه اوراقي موعارفه بالضبط وين اروح فعندي تحويل من المستوصف مثلاً
ادش عل الكاونتر
صباح الخير
الموظفه ياترد يا ماترد بكيفها
نفسيته زفت
اقولها اختي عندي تحويل من المستوصف او بدخل عل الدكتور
طبعا شوي او تكفخني
ترد شيايبج هني مو هني هذا مو عندنا او تلف ويها تكمل سوالف مع اللي يمها
شهل النفسيه قلت يمكن مالها خلق او شي
دشينا انا او زوجي بنسوي اجراءات الدخول
سلام
اختي بغينا نسوي اجراءات دخول
تسحب الاوراق من غير كلام ولا شي
تختم او تعطينا ولا تكلم ولا كلمه
بعدين زوجي يسالها خلاص جذي يعني قصده في بعد اجراءات ثانيه
الاخت تقول اي
وايد تعبت نفسها
لي امس او انا باخذ موعد عندي عمليه فلازم يشوفني الدكتور قبل لا تاجل عمليتي
دشيت
سلام عليكم يعطيج العافيه اختي
الموظفه
هلا
يرن التلفون ترد على التلفون تسولف مع رفيجتها عن الاجازات اللي بياخذونها
بعدين تفتح الدفتر على اخر صفحه تحط اسمي تقولي المواعيد فل
والله صج
قتلها دوري من اول شي يمكن احد مكنسل شايل اسمه
شوي او تطقني بالدفتر شوفي مافي مافي تصفحه
بعدين تقولي ماتبين روحي كلمي المسؤل
لا والله من صجكم
انا اول شي قلت يمكن وحده ثنتين مالهم خلق
طلعتو الكل جذي اللي بالمستوصف او اللي بالمستشفى او اللي بالاداره
شدعوه عليكم
ترى النفسيه الحلوه زينه
من الصبح مالكم خلق تكلمون المراجعين
بغيت اقولهم ترى انا كويتيه مو وافده
اتوقع يعاملون الوافدين احسن منه
والله انا بدوامي مالي خلق مرات او معصبه او شي
اذا ياه اي احد مو مراجع موظف يسالني عن شي او عن مكان مضيع شوي او اوصله
تفضل حياك
صراحه بترك المايك لكم
او عقب بعلق
او ادري بتنهدون علي بس كلامي صح لاتزعلون من الحق
او اللي تشوف نفسها جذي ياخي عدلي من نفسج حاولي تكلميين المراجعين عدل بعد هذول مرضى