من فيكم جربت حالة التردد !!!!؟

محتاجة رايكم وابي مساعدتكم اللي عمركم مابخلتوا فيها علي ولا على احد..

من ثمان سنين وانا اعيش حالة التردد وما عمري تأزمت في اتخاذ أي قرار مثل هالقرار.. وهو الحمل

من جبت بنتي الصغيرة واللي بتكمل ثمان سنين وانا مترددة احمل بعد ويمكن الله يرزقني ببنية ثانية لان عندي ولدين قبلها والبنت اصغرهم..

مرات اقول كفاية والحمدلله.. والمعيشة ماهي سهلة.. مكلفة بعد.. واحنا بعد ما ودنا نجيب عيال ونقصر عليهم باي متعة من سفر ولبس وغيره.. طبعا غير الاشياء الضرورية.. والتربية في هالوقت صعبة جدا..

ومرات افكر في بنتي وحاجتها للاخت.. خاصة انها تحن على هالسالفة.. وتكسر خاطري وقتها.. واقعد افكر فيها..

ومرات اشوف صحتي ماعادت تسعفني مثل الاول.. وجاني ديسكين بظهري.. واحتاج بين فترة والثانية علاج طبيعي.. غير الادوية اللي آخذها وقت الألم.. يعني خايفة من سالفة الحمل ورعاية الياهل..

يعني باختصار مرت علي هالسنين وانا بس افكر مرة اقول اضغط على نفسي واتحمل واجيب بعد رابع… ومرات اقول لا كفاية.. وكل شوي احطلي مزايا وعيوب الحمل.. وريلي مومقصر مخلي هالموضوع علي.. ولا حتى يبدي رايه فيه.. واشوفه هو بعد متردد.. مرة يقول مابيج تتعبين بالحمل.. ومرات يقول يبيلنا بعد صغير… يعني حيرني زيادة..

يعني ماعندي من يساعدني في اتخاذ هالقرار ويحطلي حد للتردد اللي انا فيه..

هذا انا عرضت عليكم باختصار ظروفي.. وابي رايكم بالموضوع… ياليت تفيدوني.. ومشكورين واايد..