مناقشه:اختيار محتوى الموضوع قبل طرحه !!لا للسطحيه

قووووووووووه

احلى تحيه من احلى قفوش

طبعا بحكم اني متقوزه فاتردد كثيرا على هالقسم

اتصفح المواضيع ..ساعات يشدني العنوان وانصدم بتفاهة المحتوى وساعات العكس

بس اللي لاحظته كثرت المواضيع السطحيه خصوصا اللي تلوع الجبد…

شرايكم ؟؟

شرايكم بطرح هالمواضيع

هل لها فايده

اثرت المنتدى

ضيعت وقتج؟؟

ابي مناقشه جاده لعلى وعسى البنات يرحمونا ويختارون مواضيع صج عليها القيمه

انا ببتدي بالمناقشه بهالظاهرة المزعجه..

مثلا وحده حاطة انه رفيجتها تسولف عن النظافه واهيا وصخه ..اوكي احنى شكو ناخذ عصى ونطقها مثلا؟؟ والا نتحسب عليها!

شنو الفايده اللي تبين توصلينها من خلال الموضوع؟؟؟

ماكو لا مشكله ولا محاولة ايجاد حل..!

الثانيه كاتبه فلانه ريلها اييها بوقت الدوره …طيب احنا شنو ذنبنا تلوعين جبودنا ..هالخياس مايسويه حتى اليهود !

شكو كاتبته لنا << جبدي قامت تقولب

الثالثه

عنوان موضوعها لحقوا علي زوجي كفخني وطقني طق

والبنات ياحرام قبل لايدخلون

الصدمة لما يدخلون ويقرون تطلع الاخت فالعه ريلها وماده لسانها وتافله عليه

طبعا كل وحده بقلبها تقول والله لو كاسر رقبتج شويه فيج

يابنات اتقوا الله فينا

اختاروا مواضيع عليها القيمه

لاباس تطرحين مشكلتج لكن طرحيها بطريقه راقيه نظيفه بطريقه تبين فيها اصلاح عساس نفيدج ونستفيد من غلطج

وين المواضيع اللي عن الزواج واهميته ومكانة الزوج وواجبات الزوج والزوجه والنصايح الاسلاميه الطيبه..

ليش اغلب المواضيع طقني واطقك ..والا فلانه وصخه وتتكلم بالنظافه.. والا حماتي تغار مني مالت عليها

مع اني مو ضد تكتبين عن حمولتج لان بعضهم فعلا عقرب رمل ..لكن اللي اقصده لاتخلين الموضوع تافه وسطحي اوكي عرضي المشكله ونظرتج الخاصه والاسباب اللي تحسين ادت لغيرت حماتج

ويه بس تعبت من القرقه

هذا اللي عندي

بانتظار اراءكم

انا اتفق معاج بشغله انه بعض المواضيع سطحيه جداا

ولكن بعض الاحيان تكون صاحبه الموضوع متأزمه وممكن نشوف مشكلتها تافهه لان اللي ايده بالمي

غير عن اللي بيده بالنار

وصج في بعضها مواضيع حش بحته وتكون فضفضه بس

ولكن ماننكر انه بعض الردود مفيده اللي تكون من واقع تجارب البنات

في بنات تعتبر هالحجي نوع من الفضفضه لان بالواقع ماتقدر تشكي حق احد لايتشمت فيها عقب

وانا معاج بعض المواضيع تلوع الجبد بس تلاقينها موعارفه شلون تعبر عن المشكلة الاساسيه

وبعض البنات تحسين المشكله فيها اهي بس اهي موحاسه وعبالها المشكله بالطرف الثاني سواء الزوج او الحموله او اي شخص ثاني

وهذي الدنيا ياما بنشوف ناس وشخصيات وطبايع (:

وبالاخير الناس للناس واتمنى تقبلين وجهة نظري … .

كلامج حلو

و عالعين و الراس

بس في بنات معتبرين المنتدى مكان للسوالف و الفضفضة و من حقهم و مافيها شي

و السموحة

انا من سالفة ام منيفه غسلت ايدي من بعض المواضيع وخصوصا
لمن تكون عضوه توها مشتركه
ونبي نسوي حمله بكل الاقسام نبيها جديه <<شراييكم

انا ضد تقييد المواضيع
بالعكس كل وحده تكتب اللي تشوفه بس بأدب
ولاحياء في العلم
منتدانا يعتبر من أأدب المنتديات مقارنة بالحياة الزوجيه عند المنتديات الثانيه
يعني لازم نتقبل المواضيع بكل صدر رحب
والحمدلله اكو فوق اكس ماعجبني الموضوع وحسيت بتلوع جبدي
اطلع بكل اريحيه محد يجبرني اكمل او ارد
ولو تلاحظين المواضيع الهادفه اللي فيها نصايح
تلقين قلة بالردود واذا لقيتي ردود تلقينها جدا سطحيه
مثل (اب اب ويسلموو ومشكووره)
اما المشاكل تلقينها تصك 20 صفحه وكل رد فيه يبيله منتدى بروحه

أنا معاج الفضفضه حلوه

بس في بنات الموضوع ماله دخل بالزواج اشياء تافهه مثل حماتي ريحتها خايسه شنسوي انسبحها عشانج

حلو افضفض في مشكله صايرتلي

نفس اللي دقت على طليقها واعتذرتلها

تحسين فعلا مشكله وخطأ راح يتعلمون منه البنات

ومنوره يالغاليه

عدل كلامج يالغاليه

بس هم ارد واقول انه المشاكل لازم نفضفضها والا راح اتعبنا

بس في مشكله وفي ناس ادور على مشكله

وحياج يالغاليه

حياج الله يالغاليه

ياهلا كيكوووه

من ام منيفه ههههههههههه حاشتني لقافه قويه عشان اعرفها

هممممم

في مواضيع صج صج تقولين شالهدف زين و بعدين؟؟ يعني لا اهيا فضفضه و لا نصايح و لا معلومات و لا مشكله مادري شنو تصنيفها هذي مالها داعي

في مواضيع خفيفه و فرفوشيه بالعكس حلوه و تونس مو لازم القسم يكون جد و نكد جنا قاعدين بمدرسه عادي خل نفلها شوي

لكن هم صح في مواضيع اتفه من التفاهه بس هم عيب ادش على موضوع وحده اقولها اوكي شالهدف من موضوعج؟ خلصت المواضيع؟ شهالتفاهه؟ بعدين شاستفدنا بصراحه يبطون جبدي اللي جذي

اللي ما يعجبها الموضوع تطق فوق تحت و كان الله غفور رحيم

اهاااااااا طلعتي من اللي يحبون الطماشه

شوفي للامانه بعض المواضيع تسوي جووووووو واكشنات حلوووووه

بس اللي اقصده المواضيع اللي تلوع الجبد

تخيلي ذاك اليوم دافعه دينار عالصمونه واكلها وبطلت موضوع جان تلوع جبدي منو يعوض ديناري اللي راح

حلوو نفضفض بمشاكلنا بس الللي موحلو انط عالناس ونذم فيهم بقووووووووه مجرد تفشي يضيق خلق اللي تقرا ومايفيد احد بشي

وحياج يالغاليه

ردج ميه ميه

اختصرتي اللي كنت بقوله

بس اخر سطر حده مو اوكيك لان لو دخلت ماراح تكون الطلعه بسهوله لان راح اطلع وانا متعذبه نفسيا ومنئرفه شعوريا

بس تدرين شنو اللي اغث من المواضيع السطحيه و التافهه؟؟

مواضيع افلام الاكشن

عيب حريم شكبركم كل وحده تطلق العنان حق بنات افكارها و هااات يا تفلم

ههههههههههههههههههههههههههه

ياحرام تلقينها قاعده بروحها لا لاانيس ولا وونيس وتطري عليها تخيووولات