ممنوع الخادمة في المنزل! Mission Possible

السلام عليكم بنات

شلونكم؟ ان شاء الله تمام؟

في مجتمعاتنا العربية و الخليجية بشكل خاص اصبحت الخادمة من اساسيات كل بيت و اسرة. احيانا يكون وجود الخادمة فقط لغسل الملابس و للمساعدة في المطبخ و في ترتيب غرف الاطفال. لكن احيانا تكون في الاسرة المربية و المعلمة و الطاهية و كل شي تقريبا. وايد اتساءل ليش في المجتمعات الغربة الاغلبية من الناس (الطبقة المتوسطة) ما اييبون خدامه؟؟؟؟

اقولكم يعني من واقع حياتي و اللي واجهته ان مثلا لما عزما رئيس الشركة اللي يشتغل فيها ريلي لزياره بيت الاسره (و هم طبعا امريكيين) ما عندهم خادمة. و رغم كثره المعازيم (فوق الـ20 شخص) اللي قام بجميع ادوار التقديم و الضيافة كانوا بنتهم و ولدهم ما شاء الله عليهم و من غير شكوى او اهمال

صاحبة البيت (زوجة صاحب الشركة) تقول ان عيالها و اهي و زوجها يقومون في كل في المنزل. كل واحد مسئول عن ترتيب غرفته. اما باقي غرف المنزل و الواجبات المنزلية مقسمة على الجميع كلن على طاقته و عمره. يعني شيء يثير الاعجاب.

انا عن نفسي مستحيل اييب خدامة و ريلي يكره شي اسمه خدم ما نحبهم يجيسون اكلنا و لا ملابسنا و فكره ان انسانه غريبة ما نعرف ماضيها و لا حاضرها و فوق كل هذا تعيش معانا كأنها من افراد الاسره اصلا مريب و غريب و لا نقبل فيه و لا نقبل اي احد غيرنا يعتني بعيالنا و فينا. و الحمدلله يمكن بسبب الحياه اللي قضيناها في الخارج تعلمنا هذا الشي من الغرب نقسم اعمال المنزل بينا و بين بعض و كل واحد يأدي واجبه لكن في الدول العربية ما يستغنون عن الخادمة مع ان عندهم وقت فراغ اكثر من الناس اللي في الغرب (اهني الكل يشتغل من الاب و الام الى الابناء يسوون baby sitting حق جار او صديق او يقص حشيش الحديقة مقابل مبلغ صغير يخشه) و مع هذا ما ينسون واجبهم في البيت
يعني مثلا الطبخ علاي و غسيل المواعين عليه . انا اجهز الطاولة و بعد الاكل هو يشيل الاغراض من عليها انا اغسل الملابس و هو يحطهم في النشافة الخ ) ما شاء الله و هذا اللي نبي نعلمه لعيالنا ان شاء و في نفس الوقت وناسه لما نشوف نفسنا نشتغل مع بعض و نطبخ مع بعض نحس بسعادة التعاون و غير انه يخلينا نقضي وقت اكبر مع بعض. و باجر عيالنا اذا الله رزقنا يشلون مننا بعض الاعمال مثلا يجهزون الطاولة او يغسلون المواعين (عيل نعطيهم مصروف من غير مقابل؟ خخخخخخخ ) صديقتي الامريكية تعطي ولدها الكبير مصروف مقابل يقط الزباله و بنتها مقابل تغسيل الصحون ) بس صج يتعلمون الاعتماد على النفس و ان يكسبون فلوس بمجهودهم و يحسون بقيمة الفلوس و في نفس الوقت في المقابل ادوا واجبهم في المنزل مقابل مكافئة و نتعاون علشان راحتنا و بيتنا. و احس ان اكبر فايدة من هالشي في نهاية اليوم ان قضينا وقت مع بعض و التمينا مع بعض على طاولة ناكل اللي سويناه بتعاوننا

و ما ابي انسى ان من الفوائد ان نكون مرتاحين و ناكل و احنا واثقين من نظافة الاكل و من نظافة ادوات الطعام و من هذا القبيل….

و من جهة ثانية ما دخلت مرأه غريبه بيتي راح تكون مشاكلها اكثر من مزاياها و بدال تكاليفها ممكن تتوجه الفلوس الى شيء لنا احنا كأسره مثل سفره عائلية او شراء نظام سينمائي منزلي يكون متعة للجميع في البيت

اهلي و اهله يحسون صعب الحياه من غير خدم لكن احنا نقول هذا نظام مو صعب ابدا بس يبيله تعويد و الاطفال سهل الام و الابو يعودونهم اذا كانوا صغار و يخلون هذا الشي يصير طبع في البيت و الكل يستفيد

و ليش ايبب خدامة تسويلي الف مشكلة و مشكله و كأني مأمنه بيتي و اسرتي و زوجي و عيالي بيد وحده غريبه؟؟

هذا رأيي الشخصي و النظام المفضل لي و لزوجي و الحمدلله

اسفة طولت عليكم
و يالله خلونا نسمع رايكم؟؟؟
و اللي تدش من غير لا تشارك ما لها حلاوة

المشاركة الأصلية كتبت بواسطة ليمونه المينونه انا رايي الخدامه ضروريه بهالزمن مااتخيل ريال يغسل الصحون هههههههه وي رياييل الحين مستحيل ريلي بس يساعدني بالطبخ ويشيل باجي الاكل بس ومرات يرتب الصاله واشياء فوق الطاوله اصلا انا ماارضى زوجي يغسل الصحون

ليش حبيبتي مو عيب. الريال يغسل و مرته ترتبهم في الرف و قمة السوالف و الضحك و لعب بالماي. عادي بس يبيله تعويد

المشاركة الأصلية كتبت بواسطة ^لـولـيـتـا^ ههههههههههههه يالله وين حلاوتي انا الصراحه … ما اايد بيت من غير خدامه .. لان حريم الحين مو مثل حريم اول حريم اول ماكو عندهم غير البيت والمطبخ فا ليش اييبون خدامه ؟؟؟ اما حريم اليوم عندهم الف شي وشي عندهم الدوام العيال والتزامات ثانيه مايقدرون يوفقون بين الاثنين .. عشان جذي الخدامه لازم تقوم بالواجب والمره ماتقدر تسوي هذا كله وصاحب بالين جذاب

شكرا على مشاركتج لوليتا حبيبتي
المشكلة حتى لو عندها الف شي و شي لكن لو كل افراد البيت يتساعدون جان ما في الدنيا قهر بس اغلبيه البيوت كل شي على راس المرأة

المشاركة الأصلية كتبت بواسطة RaAaRy مشكورة حبيبتي على الموضوع وبصراحة اختلاف الرأي لا يفسد للود قضية !!! انا احس انه الحين بهالزمن يبيله خدامه في البيت تعين وتعاون بس ماتكون اهيا الامر الناهي في البيت يعني تساعد لا اكثر ولا اقل ويبيلها مرراقبة ومتابعة واشراف ونصايح واوامر وطبعن تحذيرات انه ما تقرب الغرف ومن هالسوالف وانا بصراحة احس الخادمة وايد فادتني لاني كنت ادرس وعندي بنتي وشفت المر لانه دراستي صعبة وبنتي اسم الله عليها ماخذة كل وقتي ف الخادمة كانت تساعدني باشياء مثل الكوي وغسيل الحمامات والطباخ ساعات بحكم ضروفي بس الحين عقب التخرج انا قمت اسوي اعلب الشغل لاني احب اسوي كل شي بايدي واحب اعتمد على نفسي وعلى قولت الاوليين الحركة بركة وسلامتج وتعيشين

العفو قلبي و شكرا على مرورج
بصراحة احب البنت اللي توازن في الامور و تباشر امور بيتها و لو بالادارة (يعطيج العافية ان شاء الله) و لتنظيف المطبخ و الحمامات انا ألجأ لشركات العمالة المنزلية للتنظيف بشكل اسبوعي بحيث يدزون وحدة مره كل اسبوع اتضف الحمام و ارض المطبخ و الجولة و الفرن و تمشي … و لو ان صعبه تأمنين على الخدم خاصة في موضوع الطبخ لان الوحدة اشدراها ان الخادمة تتبع كل اصول النظافة 100% و صح كلامج انا من جم يوم قريت تقرير في مجلة Family Health ان الاعمال المنزلية تعتبر رياضة و ان كنس المنزل بالمكنسة الكهربائية = رياضة المشي السريع في كمية حرق السعرات الحرارية!! ما تشوفين الخدم محافظين على اجسامهم اما بعض المعزبات كل ماله بالعرض …. انا مره لاعت جبدي شفت خدامه بيت عمي و اهي تقطع الخضروات حق السلطة مع ان مخلينها تلبس قفازات الا انها كل شوي مره تحك وييها و مره راسها و انا ما عجبني هالشي و احد اذا جدامنا جذيه عيل من ورانا شنو!
و شكرا حبيبتي على مرورج

المشاركة الأصلية كتبت بواسطة may55 انا معاكي

هلا حبيبتي مي و شكرا على مرورج
شكلنا انا وياج الوحيدتين في الخليج العربي اللي ما نبي خدامه