|
|
أول شي ابدئي بالسلام على الطالبات
وبعدين بدعاء وأرفعي يدينج مع البنات وادعي معاهم وإذا انتهوا من الدعاء
انتي وطالباتج قولوا مع بعض آمين
وبعدين ابدئي بقرآءة عنوان الدرس وفهميهم بصوره مبسطه عن العنوان
وناقشيهم فيه بطريقه حلوه وبسيطه
عشان تدخلين الموضوع ياريت تبدئين بمشهد تمثيلي عن السلام وإيجابياته
وبعدين استعيني بحديث شريف موجود في الكتاب وخلي البنات يقرونه من الكتاب
ومن اللوحه اللي لازم تعرضينها على الطالبات عشان يكون قرآءة الحديث من مصادر متعدده
وبعدين استعيني بالصور
وسوي مقارنه بينهم
أقولج شلون
ينباع في المكتبات صور سلوكيات حسنه وسلوكيات سيئه
عن رد السلام وعن عدم رد السلام
راح تشوفين ايجابيات وسلبيات
سوي على السبوره خانتين خانه للسلبيات وخانه للايجابيات
سوي مقارنه مع الشرح الوافي بين كل الصور بشرط مشاركات الطالبات في كل صوره
وركزي على كل البنات حتى الضعيفات خليهم يشاركون
وكل بنت تجاوب على الصوره تعلقها في الخانه المناسبه على السبوره
وممكن تلعبين لعبه اسمها
الصور الاسلاميه المتقطعه وهي عباره عن صور لفضل السلام البنت تطلعها من العلبه وتعلقها في وسيله
راح اقولج شلون طريقة الوسيله
هي عباره عن خمس صور توضح فضل السلام وبين كل صوره وأخرى سهم وكل صوره بعدها سهم إلى أن تصل
الصور جميعها إلى عبارة ((( مجتمع إسلامي محب ))) يعني تتوصل الطالبه إلى أن كل هذه الأعمال من فضلها أن ترتقي بالمجتمع الإسلامي بالمحبه والتواصل
بعد هذا افتحي الكتاب وناقشي مع التلميذات الدرس وحلي كم سؤال معاهم
والي اهم من هذا كله
أطلبي من البنات هالواجب اللي راح اقولج عليه
قولي للبنات
كل بنت ترجع للبيت تلقي السلام على كل من تواجهه بطريقها الام الاب الاخوان الخادمه أي شخص كان
وأن شاء الله يكون تقديرج إمتياز وبالتوفيق ياربي