مشكلتي مع السونار !!

بقولكم سالفتي وحدي مستغربه منها .. وكل اهلي مستغربين …

انا حملت والحمدلله وماشاء الله بعد 4 سنين من زواجي وكلها جم شهر واكمل 5 سنين ان شاء الله

المهم بالشهر الثالث رحت عند دكتور بدار الشفا وسوالي سونار وقالي ولد .. حلو ؟؟

وبعدها بالشهر الرابع ببدايته رحت مستشفى السيف وسويت سونار وقالولي ولد .. حلو ؟؟

وانا بخاطري بنت بس تأقلمت ان فيني ولد وخذيت عالوضع وامي شرت شويه ملابس لأنها كانت مسافره .. واهلي اللي سافرو شارين لي ملابس ولد ..

وبنهاية الشهر الرابع .. رحت السيف … وقالتلي الدكتوره بنت !!

قلت خل اتأكد ووراها بيوم رحت دار الشفا وقالي الدكتور اي فيج بنت .. واهوه مستغرب يقولي سبحان الله كان ولد حتى كاتب بالفايل عنده ان فيني ولد .. والحين بنت ..

استااانست حدي انها بنت وكل شي من رب العالمين حلو .. وسافرت وشريت خرابيط بس مو وايد .. يعني شباصات وهالسوالف ههههه

انا الحين بالشهر الخامس ..رديت من السفر .. بنزلة الطياره حسيت بعوار وقلت حق زوجي اول ما نطلع من المطار بروح اجيك ..

ولا الدكتوره اتقولي ولد !! انصدمت والله

رحت بعدها سويت سونار عشان اتأكد شنو فيني …!!! قالولي بنت !!

ودخت ورب الكعبه مع هالسالفه … الحين بالشهر الخامس ومادري فيني بنت ولا ولد

لما الناس يسألوني شنو فيج اقولهم مادري والله .. يقولون جذابه خايفه من العين ..!! وانا والله ورب الكعبه مادري شنو فيني لوول

انا مو متضايقه بالحالتين احب البنات واحب الصبيان والحمدلله اللي ربي رزقني بعد 5 سنين الحمدلله واهم شي ان الياهل يكون سليم وبصحه وعافيه ياربي يا كريم ..

بس انا حدي محتاره؟؟؟ و الناس لما يسألوني ماعرف اجاوب وعبالهم اجذب عليهم