|
|
السلام عليكم ورحمة الله وبركاته
كون اني اعتبركم مثل خواتي وانكم ما تبخلون على أي وحده تطلبكم النصح والمشوره حبيت احط ثقتي فيكم وأضع مشكلتي بين أيديكم
آنا ولله الحمد أعمل موظفه منذ 8 سنوات والحمدلله وصلت إلى مركز وظيفي وبذلت جهد وتعبت على نفسي حتى وصلت إليه ، والحمدلله إن مسؤولي إنسان ملتزم ومحترم ويحترمني ويعتمد علي بشغله ودايم يمدحني ويعتبرني ذراعه اليمين ودايما يشجعن ويخليني أطمح إني أشغل منصبه إللي هو فيه لما الله يكتبله ترقيه ويصير مدير . لحد ألحين أوكي
مشكلتي هي خجلي الزايد أو بالأحرى الغير مطلوب في العمل
يعني آنا الحمدلله شاطره بشغلي بس بالإجتماعات أتوهق أستحي أتكلم أستحي أناقش اللي جدامي ما عندي الجرأة اللي موجودة عند كل البنات اللي معاي إلا آنا ، حتى الموظفات اللي المفروض آنا مسؤولتهم أجرأ مني ، آنا وايد متضايقه من نفسي ، حتى إذا طلب مسؤولي أشرح شغله في الإجتماع ما أنام وطول الاسبوع متوتره وأحاتي الاجتماع اللي بتكلم فيه ولما تيي حزة الاجتماع تلاقوني ارتبك وصوتي يرجف وأتوتر وأخلي عيوني بالأوراق حتى أستحي أطالع اللي موجودين معاي .
مادري شسوي ؟ حتى المدير نبهني حق هالنقطه واحتمال ما أترقى بسبت هالشغله ، أغار من البنات المتعينين حديثاًً لما أشوفهم يتكلمون ويناقشون في الإجتماعات وآنا لأ ؟؟
وحتى مسؤولي قالي إنتي عندي أحسن من غيرج تتكلمين وانتي فاهمه والكلام اللي تقولينه صح عكس غيرج يتكلم وكلامه غلط بس تنقصج الجرأة ، والحمدلله عطاني بتقريري السنوي أحسن من غيري بس قالي إن المدير مشدد معاي إني أحضر الإجتماعات بروحي وأناقش بروحي وإلا راح ينقصني بتقريري والله قاعده أتخيل الموقف وقلبي يرقع
مادري ليش آنا جذي
آنا وايد أستحي
أدري إن مشكلتي مالها حل بس قلت أكتب لكم …………….
لازم اختي تعززين الثقة بنفسش وتقولين : انا قادرة على هالشغلة وراح اسوي وراح اقدر اقول كل افكاري
او انش تاخذين دورة ترى هالايام هابين فيها وكل يوم بالجريدة تلقين دورة من هالنوع ويعطيها صلاح الراشد او نجيب الرفاعي او طارق السويدان …
والله يوفقش ان شاء الله
امبلا لها حل ديري بالج تحبطين روحج جذي .. الحياء أجمل صفة في البنت
اذا ماصارت هالصفة بالبنيه شبقى بعد ؟ عندج شي مو عند غيرج انتي مافيج شي غلط
هاذا المفروض .. بس مو بإفراط يعني مو لدرجة انج ماتقدرين تطالعينهم وانتي تكلمينهم
انتي عندج خوف من الجمهور .. مثل الي يصيرلنا لما نطلع جدام البنات ونسوي برزينتيشن
مثل ما قالت ام جوري .. اهي الشغله لها دخل بالثقة بالنفس
فكري بينج وبين نفسج شنو فيج انتي .. وماتحبينه ؟
مثلا زيادة بالوزن ؟ او تحسين انه في شي ثاني ؟
في كتب عن تدعيم الثقه بالنفس اذكر قريت عنوان كتاب بهالمجال
خيتو ماكو مشكله ان شاء الله
شوفي كل ما عليج انج توحين حق نفسج ان ماكو شي يستاهل وانج تتخيلين اتج تكلمين صديقاتج ,, وقبل لا تدخلين الاجتماع ,, اخذي نفسي عمييييييييييييييق اخذي نفس لين تحسين ان رئتينج انترسوا هوا و طلعيه شوي شوي ,, و سمي بالرحمن ,, و قولي اللهم لا سهل إلا ما جعلته سهلا وانت تجعل الحزن إذا شئت سهلا
و توكلي على الله ,, و ييبي ورقة و كتبي فيها على كثر ما تقدرين ,,
كرري الشي الي تتضايقين منه قولي مقلا انا عندي الجرآة الكافيه ,, انا واثقه من نفسي ,,
جذي ,,
وعطسنا اخبار ترقيتج 
اخذي دورات عن التقديم و مواجهه الجمهور ,, حلوه هالدورات و مفيده و تعلمج تكتيكات التقديم و شلون تتفادين عيوبج فيه و ساعات في دوامات ممكن يدزونج على هالدوره او انتي بحثي عنهم و اشتركي .. لا تخربين على نفسج بالياس و الاحباط .
الاحساس بالرهبة قبل الاجتماع او presentation شي طبيعي
وهذا اسمه الخوف من الجماهير و حسب الاحصائيات في كل دول العالم يعبر اكبر خوف يواجه الانسان
يعني انت طبيعية بس لازم تكونين واثقة من نفسج نصيحة مني حتى لو ما كنت قوية حاولي تبينين انج
قوية و حطي في بالج انج احسن وحدة فيهم بشهادة مديرج و قبل لا تدخلين اي اجتماع سمي بالرحمن واقري
قرآن و اخذي نفس عميق
و في كتب وايد حلوة تعزز الثقة بالنفس
منها
– ايقظ قواك الخفية A waken the ginet within
– قدرات غير محدودة Unlimited power
كتابين للمؤلف انتوني روبنز تلقينهم في مكتبة جرير
و موفقة ان شاء الله
|
المشاركة الأصلية كتبت بواسطة dreamy
اختي ماما فله
الاحساس بالرهبة قبل الاجتماع او presentation شي طبيعي وهذا اسمه الخوف من الجماهير و حسب الاحصائيات في كل دول العالم يعبر اكبر خوف يواجه الانسان يعني انت طبيعية بس لازم تكونين واثقة من نفسج نصيحة مني حتى لو ما كنت قوية حاولي تبينين انج قوية و حطي في بالج انج احسن وحدة فيهم بشهادة مديرج و قبل لا تدخلين اي اجتماع سمي بالرحمن واقري قرآن و اخذي نفس عميق و في كتب وايد حلوة تعزز الثقة بالنفس |
ما قصرتي أختي
هالكاتب أكثر من مبدع وكتبهم كلها تساعد
على تدعيم الذات وكشف القوة الداخلية
بس اللي بجرير مترجمينهم ؟؟
وقريتي
Seven Habit’s of Highly Successful People
First Things First
وأأأأأنصح الأخت تقرا هالكتب لأنهم بينفعوونج حيل 
فعلا هالمؤلف وايد زين و انا استفدت من كتبه شخصياو على فكرة يعطي دورات
و الكتب اللي سالتني عنهم مترجمة بالعربي في مكتبة جرير
وبالنسبة لكتاب
Seven Habit’s of Highly Successful People First Things First
مبين من عنوانه انه زين بس منو المؤلف؟
اهما كتابين للممؤلف انتوني روبنز
Seven Habit’s of Highly Successful People
و First Things First
النسخة الأنجليزية ما أدري اذا مترجمين…ولا
صراحة ما توقعت كل هالاهتمام والردود
الله يوسع عليكم ويوفقكم ويرزقكم اللي في بالكم يارب
على كثر ما فدتوني بكلامكم
بالنسبة للكتب إنشاءالله راح أشتريهم
بس الدورات وين أحصلهم من أي مركز؟؟؟
تفضلي هالمواقع اتمنى تفيدج بالدورات
https://www.gulfinnovation.com/site/index.php?catallid=0
الله يعطيج اللي في بالج يارب