|
|
السلام عليكم ياسيدات وبنات
انا عندي مشكلة …. كنت متزوجة وانفصلت بعد 3 شهور من زواجي قبل الدخول …. والحمدلله الحين الله موفقني ومتقدم لي شخص وهالأنسان بجر اهله … وانا بفترة الخطوبة اكلمه … صارت السالفة ان اهو سالني شنو بخاطرج تبين عرس انا اقترحت له اني اسوي عشا بسيط ببيت اهلي لان حديقتنا كبيرة تصلح لمناسبات …. وامه بنفس الوقت اتفقت ويا امي ان العرس يصير بفندق وتبي عرس وخساير البيت نفسها خساير الفندق … انا ابصراحة بزواجي الأولي سويت بدال الحفلة حفلتين وإلى اليوم الناس تمدح بعرسي لان انا هم خسرت فيه وساعدته … وبالنهاية طلعت على المشاكل والمعاير وانا مساعدته واهلي نفس الشي
هالمرة من البداية قلت حق امي عرس مابي انا مسوية حفلة خطوبة وعرس من قبل فا ابي عشا بسيط ببيت اهلي وخلاص اسافر معاه سفرة العمر يعني شي ماشفته بحياتي … واهو نفس الفكرة يقول ابي اسافر واستانس … والعرس سواء صار حلو او شين منقود … وانا احس شكلي مو حلو هم انزف مرة ثانية وادش واقعد بكوشة استحي الناس راح تاكلني ويمكن يتكلمون علي بنفس الوقت وهم العين حق … الي متقدم لي شاب اصغر من طليقي ووظيفة افضل وأوسم
انا ودي بالعشا البسيط واستانس ويا اهلي وصديقاتي بالبيت وياخذني ونسافر … وامي تقول لي انتي راخصة بنفسج مالج شغل خل يخسر اهو يبي يعرس خل يتحمل واهله يبون … امه ماعندها بنات ولا عندها خبرة بالأعراس ماتحظر فا ماتعرف كم العرس يكلف وعندها ان نفس تكاليف لو سويتها بالبيت
محتارة بين رضى امي وبين رضى نفسي واحساسي بالأحراج وبينه اهو كشخ انه نفس رغبتي … اخاف امشي ورا امه وامي ونضيع احنا ويقول انتي يتحكمون فيج … وانا مابي هالشي يدش بينا ومشاكل
ومابي اضايق امي واتناجر وياها لان اهي ببالها ان انا ارخص بنفسي وادور الشي البسيط … واهي بنفس الوقت لما واحد من اهلنا بيعرس تقول شكو العرس والخساير ياخذها وتسافر واحسن لهم يستانسون .. ولما تجي من صوبي تقول انتي مو رخيصة
واهي بزواجي الأولي نفس القضية تدخلت بسالفة هذي والي دفعها انا لما طلبت الطلاق زوجي الأولي طالبني حتى بفلوس اثاث الشقة وقال انتي طالبة الطلاق مع ان ساعدته وماطلبت شي واخذت قرض وحطيت على نفسي ودفعت مبلغ مو بسيط
وانا خايفة تكرر معاي امي نفس المشكلة لان اهي مادية بدرجة اولى … يعني المهر يمكن تخليني اشتري فيه ضعفه .. ولما اشتري شي بسيط وسعره مناسب لي وحلو تقول انتي تحبين الأشياء هذي تروح تدور اغلى الماركات واغلى الأشياء وانا اضيع بالنهاية
فاساعدوني الله يخليكم … ودي ارضي الأطراف ومابي ابين لخطيبي ان امي فيها هالنقطة هذي امي ولا احب اخرب صورتها … ولا ابي اكسر فرحة امه اهو فرحتها وبجرها
وجزاكم الله الف خير
يريحيج واستخيري قبل كل شي والله يوفقك ومبروك مقدما
ترى ماكو مشكله ولا شي ماكو الا العافيه ..
لازم تصير خلافات بسبب العرس انا عن نفسي مريت بهالمشكله ..
لاتكدرين خلقج واستانسي ولا تتوترين هالايام حلوه ماتتعوض لا تضيعينها بالتوتر والتفكير
اول شي لازم تتفقين مع امج واهو يتفق مع امه
انتي كلمي امج قوليلها الريال راضي يسويلي بدال العرس عشر بس يقول شحه هالفلوس الي بنقطها على الشكليات اولى انه نستانس فيها
وقطي السالفه براسه قوليلها ترى اهو مايدري انه انتي ودج بعرس اهو قاعد يقول رايه بالموضوع ..
وقوليلها انا بزواجي الاول سويت عرس وخسرت شفادني فيه ..
ألزم ماعلي سعادتي معاه هالشكليات جدام الناس ماتنفع .. وقوليلها خلاص يمه مابي اكلمه بهالموضوع خل يسوي اللي بخاطره
واهو يكلم امه ويقولها نفس الكلام ..
حاولي تقنعينها مره ومرتين ..
واذا ما شفتي فايده خلاص حبيبتي ماعليه تنازلي عشان امج ولا تقولين حق الريال خلاص ابي عرس عشان امي لا لا , قوليله انا فكرت وكأنه ودي بعرس يجمعنا انا معاك تصوير وكوشه والنفنوف الابيض .. لا تييبين طاري امج نهائيا عشان مايقول امها تتدخل وهذا من اولها ..
وصج حبيبتي ترى بالحالتين مانتي خسرانه شي .. اذا ماسويتي عرس بتسافرين وبتستانسين .. وان سويت عرس خير وبركه ولا تقولين زواجي الثاني شفيه الزواج الثاني عادي سوي بدال العرس ألف وخلي اللي بيتكلم يمووت حره !! العرس حلو والله دشي وفرحي بالابيض وقعدي بالكوشه ولا يهمج شي لا انتي عانس ولا انتي الي عمرج مليون ومسويه عرس ..
وبالتوووفيق
(ياحي يا قيوم برحمتك استغيث اصلح لي شأني كله ولا تكلني الى نفسي طرفة عين )
والله يهديلج ريلج وامج وخالتج..
دام هالشي راغبه فيه امج وخالتج ابنفس الوقت ليش لا
وزواجج وعرسج من هالريال غييييييييير عن الريال اللي تزوجتيه من قبل
وانشالله اتكون خيره لج
ومافي وحده فينا ماتتمنى عرس حتى اللي متزوجه اتقول اللللللللللله ودي يوم عرسي ينعاد
ليش لا استانسي وخلا ايعرفون الناس ان العيب مو فيج وان انتي الف واحد يتمناج
والسفره مقدور عليها باي وقت
سؤاااااااااااال ايدور ابالي طول ما انه قاعده اكتب
الحين انتي اتقولين ان زواجج الاولاني سويتي حفلتين يعني سويتي ملجه وعرس
فشلون ماصار الدخول الشرعي؟؟
ادري لقافه
وادعي واقري على نفسج قبل لا تدشين … واذا عالسفر انا اقول خليه بعدين لاحقه بصراحة انا اشوف ان السفر مو حلو للي توهم متزوجين يكونون توهم ماعرفو اطباع بعض… ويمكن لا سمح الله يتزاعلون هناك او شي ويكرهون السفر وما يسافرون مرة ثانية او يسافرون بس حاطين افبالهم انهم بيتزاعلون نفس المرة الي قبلها ..بس اذابعد فترة من الزواج سافرو وصارو متفاهمين وعرفو طبايع بعض بيحبونه وبالتوفيق سافروا و بعدها سوو استقبال
حفله الاستقبال تكون ابسط من العرس
منها ونستي امج و امه و هم بنفس الوقت سافرتي السفره الي بخاطرج فيها
وهم حلوه فكره الاستقبال و تلبسين الابيض عشان تصورين مع ريلج و تكون لكم مثل الذكرى
وتوكلي على الله بكل شي
واستانسي بفرحة العمر
وانبسطي
ترى تصير بالعمر مره