مساااعدة مولودي الجديد

السلام عليكن بنات انا والدة صارلي 5 ايام وولدي مشكلتة يرجع الحليب وحايشه هاليومين سهال وحليبه اسمه ( بيبيلاك) شرايكم زين ولا لأ ؟ وشلون طريقة تحضيرة الصحيحة للمواليد؟ وكم رضعة باليوم يحتاج المولود ؟ واذا طبيعي وصناعي مع بعض شلون ارتب وقت الرضعات ؟ بللللليز ساعدوني ماعرف شي وولدي وزنه صغير وابي اغذيه عدل؟ صج بنات شلون تتعاملون مع المواليد باليل وقت النوم ؟ مانام من كثر الخوف والتوتر؟ ادري طولت عليكم سامحوني ومشكورين

بالنسبه حق الحليب بيبلاك زين بس يمكن ما ناسب ولدج كل ولد غير عن الثاني اما طريقة التحضير مكتوبه على العلبه بهالعمر يشرب كل رضعه ٦٠ ملي ماي و مكيالين حليب ٦٠ ملي يعني لي رقم ٢ انا ولدي كنت ارضعه عادي ما احسب وقت بصراحه كل ماحسيت ان يوعان اشربه حتى لو صارله اقل من ساعتين واذا حليب مسببله اسهال و ترجعين خلي الدكتور يكتبله على نوع ثاني و بهالفتره رح يتعبج بالسهر لما يكمل اربع او خمس شهور تتعدل نومته الله يخليه لج يارب*

حبيبتي لازمتغيرين الحليب اذا سبب له اسهال
وبعدين الترجيع اصلا طبيعي للرضع
بس مو زياده عاللزوم
والرضعات كل 3ساعات رضعه لازم وحتى لو نايم حطيها بحلجه
وعطيه نقوع التمر
والحلبة وماي وسكر نبات
ترا عادي انا كنت اعطي ولدي وماشالله عليه مربرب وتختوخ . اول ما انولد امبيه انصدمت منه نتتتتتتتفه صغير حتى ما وصل 3 كيلو .. اهم شي سوي نفسي مسوية تنبيه بتلفوني كل 3 ساعات لازم رضعه وبس يرن المنبه عاد اروح اشوف شنو اسويله ان كان حليب او حلبة او سكر نبات .. انا كنت لحد 6 اشهر ما اعطيه غير حليب صدري كان مشبعه بالاول بس بعدين احس ما يشبع وعطيته حليب اطفال سيميلاك
اتمنى اكون فدتج بشي
ونسيت اقول لج مبرووووووووك المولووووود الجديد ويتربى بعزج وتشوفين عياله

اممممم ما عندي فكره انشالله أفيدوني

كل ساعتين بالضبط رضعه رقم ٢ ماء وقفشة حليب وحده ويكون داااااااافي موبارد الحليب ديري بالج والبيبي الجديد عادي يرجع بس الاسهال موزين راجعي الطبيب احسن

لازم تخلينه يتريع بعد الحليب عشان يطلع الهوا الزايد ولايرجع

وبالنسبة لعدد الرضعات اتوقع كل ساعتين

وخلي الرضاعه الطبيعية طول اليوم اذا قدرتي وبس بالليل الصناعي

وبالنسبة للي تقول منقوع التمر ديري بااااااالج الحين تعطينه
الا لما يكمل الشهر

خلج بس على الحليب الحين وكل جم ساعه شووووية ماي حتى لو بالابرة