متى ابدي اوكل البيبي ؟

مرحبا الموضوع مبين من عنوانه … متى ابدي اوكل البيبي هلسوالف عيش مهروس و و خضرا و هلسوالف مالت الياهال لاني ما اعرف شي و هذا اول ولد لي و للعلم عمره الاسبوع الياي شهرين ( بليز اللي تعطيني شوي شرح مفصل رح ادعيلها من كل قلبي )

انا كنت اوكل من بدايه الشهر الرابع ابدي بشوي تفاح افوحه على المار مع ماي واهرسه او عرموط بس الحين كل الدكاتره يقولون ابدي من الشهر السادس لا تعطينه شي الا اذا كمل السادس بس اذا تبين تقدرين اتذوقينه من الشهر الرابع مثل ماقتلج تفاح مهروس او عرموط بس مايكون وجبه اساسيه وسالي دكتورة رشا اتجاوبج واتفيدج اكثر مني

هلا حبيبتي الله يخليلج البيبي انشاالله.شوفي أبدي معااه من الشهر الرااابع وكلي أول شي جزر مفيوح خليه جذي مدة5 أيام مثلا,بعدين زيدي فوق الجزر بطاط وخلي مدة بعدين زيدي فوقة الكوسه لا تعطينا مره وحدة عشان الحساسية.حبيبتي داخل الجمعية تلاقين أكل الأطفال المعلب ماركة فارليز وااايد زين وحلواا اليهال وأهم شي تعطينا ماي دايما حتى لو شويه وبعد كل رضعة عشان معدتة تتنظف,قبل الشهر الرابع لا تعطينا أكل لأن الطفل ما يتحمل ,وتلاقين بالجمعيات بعد بسكويت فارليز بنكهات مختلفة حتى هذى أبدي فيه من الرابع وحطي منه كسرة صغيره مع الحليب,وعالعموم حبيبتي لازم تنتبهين ان الطفل ما ياكل الخضروات المهروسه والسوالف اللي قلت لج عليها الا فترة الظهر لا تعطينا بليل عشان لا يغثه,والله يحفظة

انا ببناتي من الشهر السااادس

بدييت اوكلهم

الله يخليهم**

شوفي حبوبه:

بشهر الرابع:

1- ابدي عطيه عصير برتقال بس خففييييييييييه بالماء وحطيه بالمشخال

2-عطيه ماي تمر (تمرتين نقعيهم بالماء الحار وحطي بمشخال) طبعا مفيد وااااااااااااااايد

3_ذوقيه اول شيء الخضروات (الجزر المهروس او البطاط المهروس او كوسه)

وبسادس عاد دخلي اشياء ثانيه

يعني بالليل مايصير احط مع الرضعه بسكوته

والله ايام امهاتنا من الاربعين يوكلون

الحين الدكاتره يقولون بالشهر ال 6

حبيبتي انا عندي موضوع بهالقسم كل كل يوم انقل لكم جزء من كتاب لفزيه العوضي اسمه تغذيه طفلك وفيه كل المعلومات عن الاكل متى تعطينه ومقدار جم وكل شي تلقينه بهذا القسم دخلي وانشاءالله تعرفين كل الي تبينه

انا بعد حطيتلج موضوع خصوصي علشان تستفيدين منه

أنا توني امراجعه دكتورة بنتي استشارية في الرويال حياة قالتلي الناس كلها راح اتقولج وكلي بنتج ألحين بس اتقول مالج شغل فيهم لاتوكلين بنتج لما اتخلص السادس يعني بنتي انولدت 73 يعني أوكلها 79 اتقول ألحين الدراسات اثبتت ان الأطفال الي ياكلون بالشهر الرابع عندهم مشاكل بالحساسية من أنواع من الأكل أكثر من اللي ياكلون بالشهر السادس بس ممكن ياكل قبل الشهر السادس بس في حاله وحده إن يقوم بالليل كل ساعة أو ساعتين يبي حليب إهن خلاص الياهل أكون محتاج أن ياكل عاد أنا بنتي مراجعتها 318 اهني بتسويلي جدول غذائي انا عندي لوتراجعين عند طبيب أحسن بعدين قالتلي أكبر غلط انج تبدين بالفاكهه لأن الياهل راح يكره الخضره وماراح ياكل سلطه لما كبر راح يحب الشكر أكثر

والله الصراحة أنا مع عيالي كنت آخذ إستشارة أمي وخالتي أم ريلي… وهم قالولي إبتدي بربع بسكوتة مع الحليب من الأربعين وننطرنشوف أي اعراض على الطفل وإذا الحمدلله ماكو لاترجيع ولا إسهال نبدأ نزيدله في البسكوت ليما تصير واحدة كاملة….. والخضراواتنبدأ فيها من الشهرالثاني بس على الخفيف جدا ومن الشهر الرابع تبدأ تكون الخضراوات وجبة رئيسية (الغدا) وإنتي وبعدين جربي معاه الفواكه وكله طبعا مفيوح… وترا كله يعتمد على تقبل الطفل للأكل ولا لأ…والحمدلله إحنا وعيالنا مافينا إلا العافية.. ومثل ما يقولون إسأل مجرب ولا تسأل طبيب

والله احترناا متى انوكل عيالنا من شهر الرابع او السادس

بس على كلام امي تقولي الياهل من يدش الثاني انحطله مع الحليب سيريلاك او بسكوت فارليز تقول الحين عيالكم دلع كله موو زيييين

السلام عليكم
انا عيالي بديت اوكلهم من الشهر الرابع خضرة وفواكة مفيوحة ومهروسة , بس نصيحتي ابدي معاهم بالخضرة أول (جزر وبطاط وكوسا ) كل ثلاث أيام زيدي شي يعني اول شي بطاط بعدبن ضيفي جزر وبعدين كوسا جذي .
ابدي معاهم بالخضرة عشان مايتعودون على الحلات مثل عيالي انا بديت معاهم بالفواكة وبعدين يوم عطيتهم الخضار بالغصب تقبلوووه. وبكمية قليلة جدا ووجبة وحدة يفضل بالنهار.
ومن الشهر السادس خليها وجبتين وكمية قليلة.وتقدرين تضيفين مع الخضار عيش مفيوح شوية.
وتقدرين تعطينهم بعد سيريلاك, وبسكوتة فارليز تذوبينها بالحليب ليما تصير مثل السيريلاك .
ومن الشهر التاسع تبدين تضيفين اللحوم بكمية قليلة .
وتسلمووون