ليش الزوج يخون ؟؟؟ كلام زوجي قاله لي !!!!!!

من جم يوم انا و زوجي كنا نتناقش علي ان ليش الريال يخون زوجته و مايخاف تطيح عليه ومن هالكلام
رد علي وقال مو كل ريال يخون يعني في شي ناقصه .. وبهالوقت الاغلب يخون وكلم بدون اي سبب وتلاقينه يموت بزوجته … بس خل اكون صريح وواضح معاج .. ترى كل ريال يخون او لو ان شاء الله نزوة نص ساعة اهوا حاط في باله ان في احتمال 1% ان يخسر بيته ويهدم حياته … ومدام اهوا سوا جذي يعني عنده هالاستعداد … وهم قالي وهالنقطه حيل نبهتني على اشياء ان لو الريال خان زوجته و اهيا رضت طبعا انا ما اقول انها ما زعلت او طنقرت او بجت او صارخت بس انها بالاخير تنازلت وردت هالشي بخليه يقوى و يتأكد انها ما تبي تتطلق او ترد حق اهلها خاصة وضع مجتمعنا يحتم عليها هالشي الا اذا كانت قوية وهمها راحتها … ردتها هذي معناتها بتفسير الريال انها مستسلمة للامر الواقع ولو خان مره ثانية فمعناته اهيا اللي ما تبي حياتها تخترب وردت له

وهم قالي والله الريال لو يبي يخون ما همته لا زوجته ولا اهلها ولا حتى اهله اللي براسه بسويه .. لا تقولون السفر مع الربع خراب .. اذا كان الريال اصلا خربان والله الديرة متروسة بلاوي ومو محتاج حتى رفيج يخربه او سفره عشان ياخذ راحته … وهم الربع لو ما كان الزوج اصلا مستعد والله لو مليون ما يأثرون فيه … قالي انا اشوف وايد من ربعي متزوجين و يكلمون بدال الوحدة الف و ننصح بس خلاص اهما صاروا جذي هالشي يعزز ثقتهم بنفسهم و فخر بالنسبة لهم… اهوا مو قصده ان خيانة الريال مو سببها نقص في زوجته بس قالي والله الغالب الحين ان الريال نفسه جذي

بنات انا نقلت كلام زوجي لكم للتوضيح لان بدينا نقاشنا بسوالف عادية وتعدد الزوجات وبعدين سالفة يرت سالفة وقال لي هالحجي … وهم قال الريال لو بيتزوج مثلا زوجته تقدر تمنعه؟؟ بتخوفه مثلا او بطقه ؟؟؟ اذا براسه بيتزوج و مو راد عليها واذا اهيا زعلت وراحت بيت اهلها وتالي ردها .. مدام انها ردت يعني رضت خلاص .. نفس الشي مع الخيانة .. وهم قال لي احنا الريايل والله اغبية وواضحين .. اسهل مننا ماكو بس عقل المرة اهوا اللي عقد الامور.. لو بنخون والله يبين لو الريال كان ذيب ما ينصاد .. بس لو المرة ما تفسر مليون تفسير جان تقدر تعرف كل شي عن زوجها انا اهني انصدمت @@

اتمنى ان كلامي هذا يفيد البعض ولو ما فاد للمعرفة

وتقبلوا مروري ……