لهومة ولدت و الحمدلله . و اخذت ابرة الظهر بس شوفوا شنو صار فيني

شلونكم بنات … حبيت ابشركم و اقولكم اني ولدت بتاريخ 1 ديسمبر في مستشفى دار الشفا

و سويت استقبالي في المستشفى و ان شاء الله مثل ما وعدتكم راح احط صور استقبالي في المرة القادمة

دخلت المستشفى و عطاني دكتوري تحميلة الطلق الساعة 11 و الساعة 1 حطولي ابرة الظهر

و الساعة 3 ولدت

ابرة لظهر قرار اتخذته من سؤالي لخبرات اللي معاي من العائلة و الأصدقاء و المنتدى و كلهم عطوني الأمان في استخدامها

الصراحة الابرة روووعة

حاسة بحلاوة الولادة و ولادة ولدي برهومة بدون الم حسيت بطلعة الراس و البيبي و المشيمة و الخياط بس كله من غير الم

المهم

بعد استقبالي و طلعتي من المستشفى الظاهر لاني كنت تحت تأثير المسكنات ما كنت حاسة بشي

من وصلت البيت ثاني يوم

بدأ معاي ألم مووو طبيعي بظهري … و انا انوه حالتي كانت نادرة مو كل من سوا ابرة الظهر صار معاه مثل ما صارلي

المهم الالم مثل الم الديسك .. ومضات كهربائية قوية في ظهري اللي خلتني ابكي

رحت دار الشفا و كان العصر و دخلت على الطوارئ على دكتورة لاكشمي

ما قصرت دورت على الدكتور اللي عطاني الابرة دكتور عادل ( و على فكرة خذوه مستشفى السيف اللي على البحر رئيس قسم و معاشه 4 الاف و نص يعني الدكتور مو بو طقة ) و لا هو في المطار ووصى على دكتور طارق سنان يشوفني

نزلوني في السرداب عند الأشعة و ما صار 10 دقايق الا الدكتور طارق سنان عندي … شكلهم اخترعوا عدل

قالي هذي حالات نادرة انتي حظج جذي الابرة مزقت عضل او عصب في الظهر … و طبعا انا لا اقدر امشي و لا اقعد و لا انام

فحصني و عطاني ابرتين في الظهر و وصاني بأدوية شكثر و الراحة التامة مع الكمادات الحارة و الشاور الحار و البانيو اترسه ماي حار و اقعد فيه 3 مرات باليوم و ما تشيلين ولدج حتى ، و امي ما قصرت ساعدتني في موضوع البيبي

المهم

غدى الشر و الحين انا احسن وااايد … و الواحد دايما يقول الحمدلله على كل حال ، و كله اجر و عافية ان شاء الله ، بس بغيت تاخذون حذركم من هذي الابرة

مثل ما قلتلكم هذا كان حظي مو معناته ان هذي الابرة دايما نتيجتها مثل ما صارلي

بس السؤال الحين لو خيروني اخذ ابرة الظهر مرة ثانية هل راح اخذها ؟؟؟؟؟