لحقو اعلي ولدي ومدرسة المستقبل ثنائية اللغة

السلام عليكم ورحمة الله وبركات

خواتي الأمهات

اللي معاها تجربة مع مدرسة المستقبل ثنائية اللغة تفيدني ارجوكم انا وايد قاعده افكر واحاتي مستوى الولد ، ولدي رايح الصف الأول الابتدائي وانا حابه اسجله في هالمدرسة رحت عندهم قالولي لازم اختبار علشان نحدد اذا ينقبل او لا مع انه ولدي ياي من مدرسة اجنبية بس اجنبية اي شي اولا
تتوقعون ما يقبلونه ، الولد رايح أول الابتدائي شنو ممكن يسألونه ، الرجاء اللي سجل في هالمدرسة يقولي اشلون اختبار القبول للطلبة شنو الاسئلة وشلون الطريقه

طيب اللي عيالهم درسو في المدرسة شلون نظامهم ووقت الدوام اشلون على الباصات اشلون على المستوى الاعتماد الكلي على وين البيت ولا المدرسة
اهم شي يرد الطالب من المدرسة فاهم شنو كان درسه والبيت مجرد مراجعه ولا شنو
في تشجيع للطلبة داخل الفصل ولالالا
عندهم حفلات تفوق وعلى مستوى ولالالا
اشلون جانب الترفيه والرحلات والايام المفتوحه زينه ولالالا ، في مدارس تهتم بالجانب الترفيهي وتلغي شي اسمه تعليمي
واشلون تعامل الناظره والادارة معانا اهم شي اذا ييتهم شاطه يبردون على ترى انا مو هينا وما اعرف اسكت

اهم شي يوصلون المعلومه لطلبة

وانشاء الله الاقي منكم الردود

موفقين

اشدعوا

ولا احد رد على

امتحان الولد قرب

والله يستر ساعدوني انه ينقبل

هلا يالغالية

مشكورة وايد على ردج علي ماقصرتي

بس من صجج ماكو حفلات تفوق لا لازم نطالب من حق الولد المتفوق يكون له حفله ونفرح فيه
ومن ناحية الدوام حلو
طيب الهوم ووورك وايد وايد لا يكون كل الاهتمام بالبيت ، اذا الولد فاهم شنو غاعد يكتب وبالبيت يكون مراجعه وتثبيت معلومه ميخالف
بالنسبة للتغيير انا سمعت عنه بس تدرين انا استقربت بالبداية شلون كانو يدرسون الرياضيات والعلوم بالعربي مره ومره بالانجليزي ما يصير هذي مدرسة ثنائية يعني المواد الثلاثة الاساسية الرياضيات والانجليزي والعلوم بالانجليزي
ويكون العربي والدين بالعربي فقط
مدرسة نظام امريكي يعني مواد كلها انجليزى والعربيى المادتين بالاساس عربي
وهي ثنائية يعني الاهتمام بالعربي والانجليزى والمدارس لاجنبية الاهتمام بالانجليزي واهمال العربي

عموما اختي مشكوره وايد والله يوفق عيالج انشاء الله

واللة انا بطو جبدي على سالفة حفلة التفوق بس يقولون ان احنا طالب الابتدائي مانقيمة بدرجات لا يتقيم على حسب مجهودة مع المس عشان جذية مايوون حفلات تفوق لان كل طالب لازم يكون متفوق بشي معين وفي طلبة يبذلون مجهود مع المس بس موشطار عرفتي…
والهوموركات 10 كلمات انجليزي نسخ يوميا 30 مرة ونهاية الاسبوع امتحان والعربي حسب الخطة

طيب اختي على جذيه ما عندهم التقادير المعروفه امتياز وجيد جدا وجيد وغيرها ، اذا هم كيف يقدرون الطالب ؟؟؟؟؟؟؟

موضوع النسخ هذا صعبه لانه احيانا تكون عقاب للطالب واليهال يكرهون هالنسخ . الله يستر

انزين اختى هم عندهم خصم ااأخ جم ؟

اختى بالنسبة للتغيير اهما بلغوكم فيه ولالالا سوولكم اجتماع وبلغوكم بنظام المدرسة الجديد ولالالا لانه من حقكم يبلغونكم قبل لا يسوون اي شي

اسفة اختي والله تعبتج معاي واسئلتي وايده
بس يا ليت لو تذكرين لي سلبيات وايجابيات المدرسة لو سمحتي
اكون شاكره

وينكم ؟؟؟؟؟؟؟

حبيبتي بالنسبة تقاديرهم a b c dوموبالدرجات لا يعني aمثلا يكتبولج يتقدم تقدما ملحوظا وجذية يعني
انا ولدس اسم الة علية كل المواد aماعدا الرسم والموسيقى تخيلي لما سالت ليش قالولي يمكن المس موشاية انة عندة ابدلع بهالمواد؟؟؟بس عموما ماياثر اهم شي مستوى الولد الحمدللة زين
وبالنسبة للتغير دزولنا اوراق مع عيالنا عن الدوام وعن النظام الجديد وكل شي

مشكووووووووووووووووووووووووووووووووووووووووووووووو وووورة وايييييييييييييييييييييييييييييييييييييييييييييييي يييد وافية
والله يجعل في ميزان حسناتج

بالنسبه حق الامتحان لاتحاتين انا ولدي جاي من حكومه واقبلوه عادي,,

والله مادري انا بنتي كانت فيها وعادي مستواها,, بس نقلتها للبريطانيه جنبهم لانها بس بنات وبصراحه تهبل ,, بس حولوها مستقبل للبنات,, بيني وبينج ماكنت مقتنعه بالمستقبل وقلت بنقلها للرساله,, بس مادري شفت ان رسوم الرساله واجد واخوها بيدخل بعد يعني بيصير ضغط,, رحت لمديرتهم الجديده قعدت معاها وكانت تقول لي انهم بيغيرون النظام ومن هالكلام,, وظليت متردده,, اذا سألتي كل واحد له راي,, بس بالنسبه لبنتي مضطره يالمستقبل او الرساله عشان مافيه اختلاط,, ناس تمدح وناس تذم,, بعدين على آخر السنه مع بنتي طبعآ لان اخوها بالروضه بحكومه( لانه خواف وجنني ويبكي دخلته مع عمته) قام يتصعب المنهج على بنتي بالبريطانيه وهي اسم الله عليها شاطره بس مادرسها لاني ميح بالانجليزي وتعتمد على نفسها,,فقلت احسن ثنائيه لغه خيره تعبت من الانجليزي والعربي عندهم ميح,بس انجنيت يالمستقبل يالرساله ,, قلت ليش مااجرب المستقبل مدام مديرتهم الجديده مواعده اولياء الامور بالتغير وانا شفت لما كنت امر عليهم كذا مره انها معطيه الطلبه حصص مكثفه, قلت حرام اوديهم الرساله وفرق 1400عن المستقبل,, (اكيد ان الاهم التدريس ) بس ليش ماجرب واشوف اذا حسيتها موزينه نقلت عيالي,,,

طولت عليج ( لاني قعدت3 اشهر افتر من مدرسه لمدرسه واقرا طبعآ عشان الولد اللي جاي من حكومه)

صليت استخاره اكثر من مره حتى بعد ماسويت اختبار بالمستقبل ماسجلت ,, استخرت واستخرت,, دقيت عالرساله بسجله قالوا تسجيل اولاد اولى سكر,, قلت الحمد لله هذي خيره سجلته بالمستقبل والله يوفقه واخته وولدج وعيال المسلمين..

طولت بالكلام بس لان الموضوع بالنسبه لي حساااااااااااااااااااااس

يعطيج الف عافية اختى
انتي تقولين الموضوع حساس
انا اقولج انه مو حساس مره بل 100 مره
والله انا غاعده ادخل المنتدى باليوم 100 مره ادور اي تعليق على المدرسة حتى لو بسيط وهذا من كثر ما ابي اخذ معلومات عنها
بس تصدقين الكل يمدح بالمدرسة والله
وانا اللي عندي ولد اسمله عليه ابيله الزين وانا ولدي بالبداية دارس روضة بمدرسة اجنبية اي شي والله
عرفتي لا نظام فوضي على طول لا اهتمام

وتعبت وايد معاه ما ابي كل سنه مدرسة كل سنة تغيير حتى الولد راح يتعب
وما ابي ادخله حكومه علشان منطقتنا الحلوه مدارسها
والولد راح يضيع فيها 100% والله الحافظ انشاء الله

وبالنسبة لوعود الناظرات تخافين والله لانه الناظره تكون على حسب رغبة صاحب المدرسة حتى لو هي صاحبة سياسة معينة وصاحب المدرسة غير مقتنعه بالسياسة راح تمشي على كلامه
وممكن صاحب المدرسة يغيرها مثل ما يبى هو
عفوا اختى تعرفين بالوعود اللي قالت عنها شنو اهيا ممكن تذكرين التغيير اللي هي تكلمت عنه
ومشكوره اختى الله يوفقج انتي وعيالج امين

هلا والله,, شوفي ياأختي بالنسبه لمدرسه المستقبل أول سنه فتحت 2024 بنتي كانت ثانيه روضه اول دفعه ودرست سنتين ,,ثانيه روضه واولي ابتدائي,, بس انا كنت ابي نظام بريطاني ومابي اختلاط فلما افتحوا البريطانيه جنب المستقبل بس للبنات على طول بدون تفكير نقلت بنتي,, بصراحه المدرسه تهبل وحيل فرقت مع بنتي يعني على نهايه اول سنه عندهم ثانيه ابتدائي حسيت مستواها تغير ودرست بعد هذي السنه ثالثه ابتدائي,, وكنت حيل مرتاحه ومافكر انقلها,, بس محتاره عشان ولدي كنت ابي كمبرج او المستقبل,,كنت بس احاتي الولد,البنت مدرستها تهبل وعاجبتني,, طبعآ قبل لايقررون انهم يلغون البريطانيه,, وتصير المستقبل للبنات,,قعدت افككككككككككككككككر بشكل مو طبيعي واسأل كثير,, لين قرروا انهم يسكرون البريطانيه ويحولونها المستقبل للبنات,,رحت وسألت كذا ام ومدحت المدرسه وقلت لهم بنتي كانت فيها ومستواها عادي ,,طمنوني وقالوا ان عيالهم فيها عاجبتهم,, بعض اولياء الامور اعترضوا عالنظام مادري ليه؟؟ بعدين لما شافوا ان الرساله بتفتح فكروا يجيبون مديره تربويه مثلهم,,الاستاذه نورا العلي,,دخلت عليها وتكلمت معاها وقالت ان النظام راح يغيرون فيه شوي,, وراح يخلون الطلبه يتكلمون طول اليوم انجليزي عشان يتقوون فيه,, وان محيط الطالب كله عربي عشان جذي مومحتاج عربي غير الحصص المقرره,, والدين,,وراح يعطونهم حصه اضافيه قرآن كريم,, وشفت لما عطت الطلبه حصص مكثفه بالانجليزي حق السنه الجايه,, وكانت شديده,حتى لما جا ولي امر بيطلع ولده والحصه مانتهت,,السكرتيره مالتها مارضت مع ان الاب اصر يطلع ولده (نهايه السنه لما الاهل يجون على ال11 وال11 نص يطلعون عيالهم وتصير فوضى) مارضت سكرتيرتها,, بصراحه طولت بالها على الاب لين اقنعته ان هذي تقويه عشانهم ومن هذا الكلام ورجع الاب,,
الله العالم بس انا ان شاالله مرتاحه خاصه عقب الاستخاره,,
ثنائيه اللغه لازم يعطون رياضيات بالعربي والانجليزي,,الرساله لما كلمتهم قالت من اولى لثالثه ابتدائي رياضياتهم بالعربي,,من رابعه يبدون بالنجليزي هذى اللي ماعجبني يعني عيالنا يبوون يتقوون بالانجليزي اكثر وحصص العربي اللي يعطونهم فيها بركه,,اهم شي التأسيس بالعربي من ناحيه المهارات ,,يعني مو لازم ياخذون حصه الرياضيات بالعربي..
ان شالله اكون ماطولت عليج وفهمتي اللي قصد..
على فكره بنات صف بنتي من كانت معاهم بالروضه لحد الحين موجودين مانقلوا,,اكيد ان المدرسه عاجبتهم ولا كان ماخلوهم لحد الحين فيها..

يعطيج الف عافية وسون حياتي

اختى ما تدرين شنو اللي خلاهم يسكرون البريطانية

ويخلونها المستقبل بنات

يا خوفي نعيش كل سنه بنظام كل سنه بشي والمشكله عيانا الضحايا وتصير التجارب عليهم
الله يستر
عموما اختبارنا انشاء الله الاسبوع الياي
الله يستر ويتحدد مصيرنا
مشكورييييييييين جميعا وانشاء الله راح ابلغكم شنو يصير معاي

السلام عليكم ورحمة الله وبركاته

خواتي وسن حياتي ووافية

اشكركم على ردودكم وتفاعلكم معاي
اشكرج اختى وافية على المعلومات اللي عطيتنياها وزوتيني فيها .
واشكرج اختى وسن حياتي على مساعتج لي عمري ماراح انسالج هالموقف معاي
الحمد لله ولدي مر بالاختبار اليوم والحمد الله انقبل وانشاء الله بكره يروح ابوه يسجله في المدرسة
وانشاء الله خير
فرصة سعيده خواتي والله يجعله في ميزان حسناتكم يارب يا كريم