لازم الكل يقرا قصة ولادتي هالمره

بكتب لكم قصة ولادتي، الحمدلله ولدت بمستشفى رويال حياة من شهر و ربي رزقني بمحمد، المستشفى بصراحة ما عليه كلام و آنا مجربته بولادتي الأولى من سنتين و تجهيزاتهم متكاملة
و دكتورتي كانت د.خالدة المجيبل

بدت ولادتي من مراجعة عادية للدكتورة بعيادتها ماكنت أحس بطلق و لا عوار لكن لما سوتلي فحص لقتني مفتوحة 4سم و قالت خل أدخلج ولادة ترى بساعتين تكونين والدة ، حسيت نفسي مومستعدة رديت البيت سبحت و ودعت ولدي و خذيت أغراضي و رحت المستشفى

كنت للحين 4سم و حطولي التخطيط و زاد الطلق و قعدت تقريبا من الوحدة الفجر لي الثمان بعدها ياتني دكتورة المستشفى و نزلت الماي و حمى الطلق و دقو على طبيبتي و يات ولدتني الساعة تسع و نص تقريبا و مشت

المعاناة بدت معاي بعد الولادة ما راح أخوض بالتفاصيل وايد لأني ما أعرف شالللي صار لي وقتها و مع تأثير الكمام

المهم صار لي نزيف و كانت دكتورة المستشفى معاي أما دكتورتي فطلعت و كان عندها ولادة قيصرية عقبي المهم حاولوا معاي و لي العصر يات دكتورتي و قررتلي عملية

إللي أعرفه إنهم ما قدروا يسيطرون على النزيف فاضطروا يستأصلون رحمي و الحمدلله حبايبي إللي ربي سلمني لأني بصراحة شفت الموت و هان علي كل شي يوم ربي سلمني و ردني لعيالي

نقلولي تقريبا 70 كيس دم و تميم بالعناية 3 أيام و المستشفى ما قصر معاي

ليش صار لي هالشي و شلون هالتفاصيل ما أقدر أخوضها لأني مو متأكدة منها بس إللي أعرفه إن المستشفى واجه حالة قريبة من حالتي و عند نفس الدكتورة من كم شهر لكن المره (أم عبدالله) توفت عسى ربي يتغمد روحها بواسع رحمته و للأسف انكتب عن قصتها لكن الموضوع انحذف ما أدري ليش،

مو قصدي أخرع أحد أو أسيء لأحد لكن حبيت أفضفض لكم عن إللي مريت فيه و تدعون لعيالي الأثنين بهالأيام الفضيلة إن كل واحد منهم يوزن أمة و يعوضني ربي فيهم و يرزقني صلاة وراهم, اللهم آمين
و أتمنى إن موضوعي ما ينحذف مثل موضوع إللي قبلي ، و ترى بصراحة مازاد من صبري إلا يوم سمعت قصة إللي ماتت لأني بالضبط مريت باللي مرت فيه لكن إهي ربي خذاها شهيدة أما آنا فانكتب لي عمر يديد عسى ربي يمد بعمري بطاعته و شكر نعمه

ماودي أحد يسألني عن شي إللي كتبته كافي و إللي مو مصدقه تقدر تسأل الدكتورة شخصيا عن هالكلام و ما أعتقد إنها بتنكر شي