كيف استعديتي للحمل الثاني ياريت الكل يشارك

السلام عليكم و رحمة الله

انا عضوة جديدة و هذه اول مشاركة لي , صراحة ما شاءالله عليكم هذا احلى منتدى
مستحيل ما يمر يوم ما افتحه انا متابعتكم يوم بيوم من 3 سنوات الله لا يغير عليكم.

أنا الحمد لله حملت اول ولد طبيعي اول ما تزوجت وبعد ما ولد قيصرية ب 3 اشهر ركبت لولب والحين بعد سنتين و نص شلت اللولب وقالتلي الدكتورة عندي التهابات وعطتني تحاميل ومرهم . بصراحة ما اكنت ادري ان عندي التهابات ابدا لاني ما احس بألم وبعدين بالنسبة للسوائل استعمل مناديل كيرفري واغسل بغسول سيتايل تقريبا كل يوم . انشالله ما يأثر على الحمل.

يا ريت كل وحدة تكتب تجربتها او تجاوب على الاسئلة من خبرتها الخاصة
كيف استعديتي للحمل الثاني …..بمعنى :

1- كيف تعرفي انه جهازك التناسلي تمام..اتسوين كشف مثلا
2- شنو الاكل الي ممكن يساعد على تثبيت الجنين
3- اذا كنتي استعملتي اي نوع من انواع موانع الحمل الي عندها خبرة بالموضوع وجربت
هل لازم اسوي كشف واي اي شي او عادي تحمل طبيعي ما في مشاكل
4- طيب كام المدة الي انتظرتيها عقب ما شلتي المانع وحملتي باذن الله

ولكم مني جزيل الشكر والامتنان

هلا حبيبتي

امممم انا بصراحة خذيت حبوب
وماكنت منتظمه فيها كلش
وخربطت دورتي فخفت ع نفسي
خاصة يوم سمعت ان الحبوب تجيب عقم
حق الي تكون والدة ولدة وحدة او ما حملت كلش
كلام ينسمع بس خفت انه يكون صحيح !!
وانا بصراحة انا وزوجي متفقين اني احمل خلال شهر 9 – 10 – 11
وكنا نقلل من الجماع خلال فترة التبويض
ورفيجتي الله يذكرها بالخير معلمتني طريقة
<< سر ماتعلمين احد :d
ان بعد الجماع ع طول تروحين تنظفين
وتحاولين اطلعينه بالتعصر :$
المهم هذا كان نظامي
بس رجلي كسر خاطري … بخاطره ببيبي ثاني
فوقفت من هالحركة وحملت بعد تقريبا 11 شهر :d
ع شهر 7 حملت

اخاف شطيت بعيد عن الموضوع
المهم قبلها بشهر كنت اكل حبوب الفولك اسد لانه فيتامين مهم
يساعد ع التثبيت للفوايد الي فيه
و ع فكره اذا كنتي تاكلين جرجير بصورة مستمره
ترا يغنيج عن الفولك اسد لان هالفيتامين موجود بالجرجير
وابتعدت عن المشروبات الساخنة والاعشاب
<< مو نفس بعض الاخوات ربي يهديهم تأخر عليهم الدورة يروحون يشربون اعشاب
قبل تحليل الحمل

ترا ع فكرة الالتهابات مالها شغل بتأخر الحمل ع حسب معلوماتي

وادعيلي ربي يثبت حملي
وإن شاء الله الاخوات يفيدونج اكثر
وعسى ربي يرزقج بالذرية الصالحة يآرب

مشكورة حبيبتي على ردك السريع والله يثبت حملك

هاذي اول معلومة الفولك اسيد انشالله سيده اجربه ….ما منه مضر صح هذا فيتامين مو

1- كيف تعرفي انه جهازك التناسلي تمام..اتسوين كشف مثلا

سوي تحليل ..

2- شنو الاكل الي ممكن يساعد على تثبيت الجنين

اهم شي الفوليك اسد استخدميه قبل تفكير بالحمل ب 3 اشهور وبعد الحمل ب 3 اشهور ..

3- اذا كنتي استعملتي اي نوع من انواع موانع الحمل الي عندها خبرة بالموضوع وجربت
هل لازم اسوي كشف واي اي شي او عادي تحمل طبيعي ما في مشاكل

لاعادي تعطييج مناعه بس اذا عدت 6 اشهور راجعيييي ..

4- طيب كام المدة الي انتظرتيها عقب ما شلتي المانع وحملتي باذن الله

3 اشهور وحملت …

الله يرزقج بقرييب العاجل

بالنسبه للاستعداد انا للحين ما افكر لان دوامي بصوب وتوني منتقله

وبنتي ابي اعطيها حقها ليمن احس اني مستعده احمل

والمشكله الثالثه ما عندي مكان شقتي واااااايد صغيره للاسف

مع ان ريلي بين فتره وفتره يقول لي وده

بس عالاقل يكون في مكان للببينو الجديد

المــــهم
اشلون احسه نظيف امممم انا استخدم بين فتره وفتره غسول وايد زين استخدمه اذا احس تحت بحرقه ولا ممكن يصير في اللتهاب على طول استخدمه اسمه كريتال شي جذي مو ذاكره اسمه عدل
عجيييييب وحق الجسم كله مافيه ريحه يصير حق الجسم الحساس
طبعا استخدامه مو بشكل متواصل ويكون تحطين اشوي منه بيدج مع الماي

الاكل امممممم ماعندي فكره لان بحمالي الاول كنت اكل كل شي وانا ما ادري اني حامل

الموانع استخدم حبوب ولاعبه فيني لعب صايره انفعاليه وزعوله

وسلامتج وانشاءلله الله يرزقنا و يرزق الكل بالدزريه الصالحه

مشكورين على الردود الله يوفقكم ويجازيكم الخير

بنات شنو يعني اسوي تحليل عشان اتأكل ان كل شي تمام عندي
ممكن لو سمحتوا الي تعرف تشرحلي شسوي بالضبط؟

بنات كل شي بيد رب العالمين بس انا ابي اتوكل ما اتواكل
ابي اسوي كل شي يسهل ويسرع الحمل .

حبيبتي في شغلتين قاعده تسوينهم غلط.. اول شي مناديل كير فري تسوي التهابات بتجربتي انا و حماتي و اختي استعملناها و سوت التهابات و ثاني شي غسول سياتل واااايد قوي مو زين تستعملينه يوميا استعملي غسول انتيميت او اي نوع ثاني اخف.. و اذا على استعدادات الحمل أخذي فوليك اسد من الحين*

مافهمت المغزى من سؤالج الاول ،، شو يخص الجهاز التناسلي بالحمل
الحمل يكون بالرحم وقناة الرحم (دخول الحيوانات المنويه ) غير عن قناة البول (عزكم الله)

بس روحي لدكتوره ثقه وفحصي

قبل حملي ودرت الدكاتره وجربت الشعبي أكثر،، طبعا كنت طول حياتي ما اثق بالشعبي

أهم شي قبل الحمل :
1- يكون جسمج قوي وصحي ،، يعني اتبعي نظام غذائي سليم وكلي كل العناصر الغذائيه الهامه (الحليب واللحوم والاسماك والخضار والفواكه ،،،،،،وغيرهم )
2- خذي فولك اسد قبل الحمل بشهر او شهرين ،، خذي شهر وبعدين وقفي وبعدين ردي الشهر اللي عقبه .

3- في كل دوره ،،، من اليوم الاول الى الرابع أو من الثاني الى اليوم الرابع (اشربي شي ينظف الرحم) (انا كنت مع القهوه العربيه اللي بالهيل بس ،، كسره صغيره مره (قد حبة النخي الناشف او اصغر) وعود جرفه صغير (نص اصبع) ،، واشرب هذا المشروب السحري اللي يلوع الجبد .. مره باليوم لأني ما احب الاعشاب
ومن المنظفات اللي استخدمها ،، احط ملعقه وسط الحبه الحمرا(رشاد) مع الشوربه عشان تدفيني وتنظف الرحم.

4- في اليوم الخامس والسادس والسابع من الدوره كنت آكل (خلطه يوز (الجوز) +عسل ) مخلوطين مع بعض ، ملعقه كبيره الصبح على الريج وملعقه آخر الليل قبل النوم ،،،،،،،،،،،،،، فايدته ينشط البويضه ،، اذا عندج ضعف في التبويض او صغر حجم البويضات .

5- اهتمي بالرياضه لو مشي ،، واهتمي بنفسيتج وادعي رب العالمين انه يرزقج ويثبت لج جنينج ..

ملكة السكون ..الجهاز التناسلي (الجاز التناسلي الانثوي- الرحم -المبيضين-قناة فالوب-المهبل) اهو المسؤول عن الحمل مو الجهاز البولي(الكليتين-المثانة..)
ومشكورة وايد على النصايح …عجبني موضوع الجوز و العسل لتنشيط التبويض انشالله بسويها.

anooma حبيبتي شنو مشكلة الكير فري ؟

حبيبتي الكير فري سوالي التهابات مو بس انا و حتى حماتي و اختي.. و سياتل وخري عنه لان وايد قوي مو حق الاستعمال اليومي