|
|
مرحبا بنات .. مثل ماانتوا شايفين التسجيل للمدارس والحضانات جاري .. وحدي لويه والاستعدادات على قدم وساق 
بسجل بنتي عمرها 3 سنين بحضانه .. بس ابي نظام مدارس مو بيوت .. من بين المجموعه اللي عندي منتسوري !!
بنات شنو الفرق بين مدرسة كويت منتسوري اللي بالجابريه ؟؟ وجلف منتسوري او اللي يسمونها منتسوري الخليج اللي بسلوى ؟؟
انا اللي فهمته من الادارتين !! انه كل وحده مدرسه تختلف عن الثانيه مجرد انهم يتبعون نفس النظام اللي اهوا منتسوري ..
بس اي وحده افضل ؟؟ من ناحيه الستاف والتدريس ؟؟ بليز اللي مدخله عيالها اي وحده فيهم تفيدني ..
وهم اللي عندها مكان مجربته بليز تفيدني
اللي بسلوى ماعرف عنها , إنما اللي بالجابريه أرجحها لج لأن مجربتها بنت خالتي حق كل عيالها ,, ومستواهم أكثر من الممتاز .
مشكوره وايد والله يوفقج لانج رديتي علي 
تصدقين وايد امدحولي اللي بالجابريه وقالولي قديمه صارلها 17 سنة تقريبا من 92 ..
بس سبحان الله تصير مواقف تكششج من المكان .. دقيت كلمتهم ؟؟ من اول ماسالتها عن الحضانه ؟؟ جان تقوللي رسوم التسجيل ب 1400
قلت لها اوكي ابي اعرف نظامكم .. جان تقوللي فتح ملف 200 !! يابنت الناس اتكلم عن السيستم التيجرز النظام ؟؟
مادري بطت جبدي اللبنانيه حسيت الموضوع مادي !! عشان جذي وايد وايد كشيت منها !!
بس علا كلامج الحين والله جنج شجعتيني ,,
عيال اخوي كانوا بالمنتسوري اللي بالجابريه و الأم وايد تمدحهم ماشاءالله, و كنت اشوف على عيال اخوي اسم الله عليهم يحفظونهم قرآن و ادعيه و يعلمونهم انجليزي طبعا.
اما بنت اختي جربتها ما تمدحها تقول مره بنتها انطقت هناك !!!!!!!!!!
ولما سألت الأبله ليش طقيتي البنت قالت لها انا ما طقيتها لكن كنت ابي انبه البنت علشان تركز
غير جذي تقول زينين
ويييه خرعتيني طيبه 
انشالله موعدي معاهم الاربعا بروح واشوف شالسالفه لازم اقرر !!
لا تحاتين انتي شوفي الوضع و ان شاءالله ترتاحين
حبيبتي شرطيه حلوه :
اهيا مو مسألة غاليه ولا رخيصه .. اهم شي المضمون والستاف مال المدرسات .. انتي عندج احد بمنتسوري اللي بسلوى ؟؟
عاد والله مرره شفتهم برحله .. مودينهم المركز العلمي المدرسات اجانب والطلبه مرتبين ولابسين لبس موحد ولا حس مع انهم صفين
لو بنتي معاهم جان اعفستهم لووووول