كارها أنج موظفه وتبين تقعدين في البيت مع اعيالج الصغار ؟!؟

السلام عليكم بنات كيف الحال ان شاء الله بخير وكل عام وانتوا بخير

عندي سؤال وحابه اعرفه منكم جم وحده من العضوات المتزوجات وعندها اطفال ربة بيت ( ما تشتغل ) وشنو سلبيات ربة البيت وشنو الايجابيات لاني انا ام لطفل عمره 1وتسع شهور ولطفله عمرها 7 شهور وعندي خدامات وخالتي ام زوجي معانا في البيت اهي الي تشرف على اعيالي يعني اعيالي مو بروحهم مع الخدم والحمد الله … بس أنا مع هذا أحس بالذنب والتقصير خاصتا انه شغلي يخلص الساعه ثلاث الا ربع واحب هالوقت الي أكون فيه بالشغل اقضيه مع أعيالي حتى لو وقت بسيط حتى لو أكون نايمه مثلا الصبح بس اسمه اني موجوده في البيت … ومتردده أخاف اخذ قرار اني اطلع من الشغل وأندم خاصتا انه راتبي قوي وشايله مصروفي عن زوجي ..وساعات اقول مكان المره البيت وتربيه والرجال الشغل والصرف الله جذيه خلقنا … بس ما أدري متردده بنات عفيا ساعدوني وكل وحده موظفه أو قاعده في البيت اتقول ايجابيات وسلبيات موقفها والي قاعده في البيت تتمنى أنها تشتغل ؟؟ولا لأ؟؟

نفس تفكيري………
انا عيالي اشوفهم بس 3 او 4 ساعات واحس انهم حيل متحاجيني
ارد من الدوام الساعه2 وانام لحد الساعه 5 وبعدين انوم عيالي الساعه7 ونص
علشان عندهم مدرسه بكره
واحس حيل مقصره بحقهم؟؟؟؟؟؟

أنا كل يوم أحن وأقول ودي اقعد بالبيت وماودي أداوم بس اللي كاسر ظهري القرض والله يعين ما تصدقين كل يوم اتمنى وأحن عالقعده بالبيت

لا تقلبين المواجع عفيه

انا ودي باجازه لين يكبرون عيالي شوي

يعني بو اشهر يكمل سنه عالاقل

اكيد قعده البيت احسن من الدوام انا نفس حالتج دوامي لي الثلاث و عندي خدامه و ببيت حمولتي خالتي تشرف بشكل بسيييييييييييييط على ولدي و هم احاتي مثلج بس مستحيل اقعد بالبيت انا مادرست و تعبت عشان اقعد بالبيت و شنسوي انا امي كانت موظفه و مازالت ماأثر علينا الحمدلله و لاتنسين الراتب مهم باجر لا كبر ولدج تبين تشترينله و تسفرينه و تلبين طلباته تخيلي البلايستيشن ماحلاها ربي صارت على اميه و اميه و خمسين دينار و بس اس بي و مادري شنو على ايام عيالنا مادري جم بصيرون !!!!!!!!
حالج حالي و حالي حالج و حالنا حال هالامه كلها انا هم وسواسيه و ضميري يأنبني بس لازم استحمل عندنا الحمدلله جم ساعه باليوم نشوفهم فيها و عندنا العطل نعوضهم بالقعده معاهم و الاهتمام و طول اليوم وقت الدوام عدي جم ساعه الياهل بنام و جم ساعه انتي لو كنتي مو موظفه يتنامين فيها و تقلون من وقت لي وقت كلميه و تطمني عليه و مرده للمدرسه
لاتحاتين حبيبتي خلج قويه و الدنيا ماشيه الحمدلله

معاشج ارز لج

داومي واعيالج مافيهم الا العافيه
ردي البيت تغدي وحببي اليهال ونامي واذا قعدتي جابليهم لين ينامون
خالت موجوده ومافيهم الا العافيه

وايد احب اليهال

أنا نفس الحاله … و المعاش الحمد لله قوي وايد لأني قطاع خاص. حتى زوجي متحسف على طلعتي .. بس وصلت لي مرحله اني لازم اجابل البيت.. و خاصه اني حامل اللحين فمستحيل اني راح اقدر اسوي كل شي جميع …

اللحين قاعده افكر اني اجمع الفلوس و على ما أولد ان شا الله اسوي لي مشروع على قدي خفيف و ظريف و أرتاح… من الدوام و طلبات المدير و مزاجيته اللي توصل الضغط الى السما السابعه ..

كلناا على هالمنوال الله يحفظ لنا عيالنا يااارب

أشكر كل الخوات الي ردوا .. أختي كويتيه ولي الفخر انتي طلعتي من الشغل ؟؟

وياليت نشوف أراء ثانيه والي قاعده في البيت مو موظفه ياليت اتشاركنا واتقول عن وضعها في البيت احسن ولا ملل وزهقه واتمل من اعيالها وحنتهم واتقول ياليت موظفه علشان ارتاح اشوي من حنتهم ؟؟!! ياليت اتقول لنا ربة البيت شنو الوضع

أنا رفضت الوظيفه علشان بنتي كانت صغيره ولأن مرت حماي كانت موظفه وكان ولدها يكسر خاطري الصبح اذا شفته عند خالتي كلا يبجي ويدور أمه والخدامه ماتسد مكان الأم عاد قلت بقعد أربي عيالي وأجابلهم

بس بعدين تحسفت الحين عيالي كبروا اسم الله عليهم وبالمدارس والروضه وأنا من الصبح للظهر حاطه ايدي على خدي ملل وضيقة خلق

خلج بدوامج أونس لج من قعدة البيت وضيقة الخلق والمعاش ينفعج وأنا أختج

وبعدين خالتج بالبيت خلي عيالج عندها بس تشرف عليهم واذا كبروا شوي حطيهم بحضانه زينه بس لاتخلينهم عند الخدامه ترى عيالج أمانه برقبتج والله بيحاسبج على اهمالج لهم

بس اذا تبين تقعدين بالبيت شوفيلج مشروع صغير تقضين فيه وقتج

الله يوفقج

لالا قعدة البيت ملل وضيقة خلق .. انا ماخذه اجازة وضع وامومه من شهر 6 وراح اداوم على شهر 12 .. صج القعده مع عيالى تسوى الدنيا .. بس ملل صايره عصبيه وايد وبصراحه قمت اهمل بنفسى وصار كل تفكيرى اليهال وبس ما قمت اطلع ولا اروح مكان واذا بطلع لازم يكونون معاى , حتى خواتى يدقون على امشى طلعى معانا بنروح مطعم بنروح مجمع اقولهم لالا وعيالى وين اوديهم .. وايد متعلقه فيهم ونسيت عمرى .. والدوام يلهى شوى والمعاش اللى ناخذه كله حق عيالنا .. وبعدين اليهال ما ردهم يكبرون ويروحون مدارس وراح تقعدين طول النهار بالبيت ..

والله نصيحة لا تقعدين بالبيت والله انا متحسفة قد شعر راسياني ما جمعت ولا فلس كل ما قلت لزوجي ابي ابي ابي ………. الخ قال ماعندي والله اقصاد والحين افكر ارد للوظيفة

حبيبتي انا على ولدي الأول كان عمره شهرين وطلع قبولي بالمدرسه

وماكان عندي خدامه تخيلي طول الليل سهرانه والصبح اداوم

داومت 4 اشهر وقدمت استقالتي وجابلت ولدي لمن كمل عمره سنه وبعدين يبت خدامه

حسيت بالملللللللللللللللللللللللل وزهقه وضيقة خلققق مو طبيعيه

ووطلع اسمي بالديوان بوزاره لمن ولدي كمل سنتين

وسبحان الله داومت شهر وحملت

وبالعكس الدوام حلو وتغيير جو واليهال مردهم بيكبرون وبتقعدين معاهم الصبح بتودينهم مدارسهم وانتي ذيك الحزه شتسوين ؟؟؟

والله حتى لو ريلي مو مقصر علي بالمصروف بس معاش المره ابروحها غير تحسين عزوه لهاااا

واتمنى اني افدتج

وعلى فكره الحين انا اجازه امومه 6 اشهر واحس اني مليت بس ابي اداوم

انا موظفة و دوامي حلو و خفيف بس البهذلة اللي اشوف فيها ولدي تخليني اكره الدوام و اللي فيه خصوصا ان انا حامل و اليهال يبيلهم مجابل…. انا الحمدلله كلها شهرين و اترك دوامي و اولد و اجابل عيالي… و اذا على الفلوس الله الرازق…
و زوجي ما راح يقصر محددلي مصروف مسكين من الحين!

اااااااااااااااااااااااه قلبتي المواجع ياليت اقعد بس الفاس طاحت بالراس والقرض اللي علي اشلون يبيلي جم سنه وحتي لو باقعد ياتري بتاقلم خاصه ان زوجي يبيني احمل وانا رافضه لان ماحب اولد واقط عالخدامه انا قبل كنت ادوام واقط اعيالي اذا كانوا بالشهور الاولي عند الوالده بس الحين امي تعبانه معاها القلب ومريضه الله يشافيها لبي قلبها والله ااااااااااااااه فديتها المهم انا ميته ابي اقعد بس القرض كاسر ظهري واذا باقعد ماراح اتاقلم لان مر علي 10 اسنين موظفه وبنطر التقاعد احسن يالله هانت