قصتي مع معلماتي العزيزات

السلام عليكم ورحمة الله وبركاته

اقروا سالفتي بليز للاخر ترى مختصرتها بشكل جدا جدا مختصر
خواتي انا بقولكم الي صار فيني ومحد يعرفني يعني انا ما راح اجذب بقصة داخل منتدى من اجل مصلحة

انا رئيسة قسم تربية فنية وانا من عمري وانا معلمة وانا دايما اشيل القسم والله العالم اشكثر اتعب اتعب لين ما يا يوم وصرت رئيسة قسم والحمد الله نجحت بجهودي

الي صار انه انا الحمد الله ما كانت علي ابدا مشاكل طوال خمس سنوات الا السنه الي طافت لانه يوني معلمات جدد اثنين

الله يعلم اني حبيتهم ( وهذا الشي غلط طبعا اساسا العمل ما فيه عاطفه انا ما اقول نكره ولا نحقد بس العمل عمل ))

فوق اني حبيتهم راعيت ظروفهم لانهم باعتقادي جدد وهذا غلط طبعا

المرسم انا جهزته انا الي يبت الصباغ وانا كنت اروح له بالعطل مع انه المرسم مشترك

انزين انا اروح البلوكات وارد لهم المعلمات كلا يقولون لي انا ما اعرف اخاف ايب وما يعجب والله مرتين

اروح وارجع اخليهم يختارون لون القماش ولي الحين بعد

اشتريت المشمع الي ينحط فوق الطاولات يقولون ما انعرف ابله انتي يبيه

اكيد بتقولوون الغلط منج ( عمركم شفتوا رئيسة قسم جذي ولا شنو يبون هالمعلمات ؟؟؟؟؟؟؟)

شاركوا في بعض الانشطه وبعض الانشطه كانوا وايد يغيبون فيها

وكانوا كثيرين غياب بحجه عندي عرس صديقتي والثانيه خدامتي مريضه واعذار مالها اول لا تالي

والله كنت احبهم والله الشاهد علي

مسكتني يوم مديرتي العزيزه وقالت لي انتي لازم اتشدين عليهم عشان لا يغيبون

تخيلوا شديت شوي وقلت لهم ترى الغياب ياثر على تقاديركم بكل ادب (( صار بجي ومناحه ))

شنو بقولكم ولا اقولكم

اقولكم ياما دخلت عليهم بالزيارات واشوف عليهم اخطاء منها الي مو محضرة والي الطالبات مو قاعدين يشتغلون

عمري ما اشتكيت عليهم والمديرة تسالني شلون معلماتج اقولها الحمد الله زينين واخلاقهم عاليه

المرسم يلوع الجبد عفسه ودثرة مليت وانا ارتب

صارت اشياء وايد

المعلمتين الاثنين يغيبون بشكل مو طبيعي وحده منهم قامات اتغيب يوم وترك تقول انا كاره التدريس وانا شفت اشياء ما عجبتني بالدريس وووووووو

الخوات ايصير بينهم خلافات ويردون طبيعين

انا صار خلاف بيني وبين معلمة والله يشهد وفي هذا الوقت وفي هذا اليوم ما قليت ادبي ولا قطيت كلمة تجرح ولا ولا
وعلى فكره تاسفت للمعلمة هذي ولميتها وقلت لها حقج علي مع العلم اني ما غلطت بس قلت يالله خل المركب يمشي

لكن هالمعلمة للاسف حقدت علي بشكل مو طبيعي لدرجه انها خربت علاقتي مع قسم ثاني السلام ما قاموا يردونه مع انهم المفروض متدينين ما قاموا يكلمني مع العلم والله الشاهد علي واقسم بالله العظيم ما عمري تكلمت عن هالقسم الا بالخير اعرفهم من سنوات يت لهم وحده يديده خربتهم عموما ما قاموا يهموني الحمد الله ماني محتاجتهم ولا اهم مححتاجيني مع العلم اني رحت لهم وقلت لهم انا اعزكم انا بشنو زعلتكم ما ردوا علي

قصتي طويلية بس تكفون اقروا لي اخر شي

المصيبه كانت بتزورنا الموجهه ولاول مره بنص السنه الثانيه لانها موجهتنا السابقة تغيرت شنو الي صار في هذا اليوم انا شفت المعلمة الحاقدة قاعده وانا لي الحين ما ادري انها حاقده او شايله بقلبها علي ابد والله

قبل لا اتيي الموجهه قلت حق المعلمة يا ابلة انتي شاطرة وشغلج زين وغلطتي طبعا اقولها جذي من كثر ما كنت امدحهم قالوا احنا توب

المهم قلت لها يا ابله تعرفين جم وصلتي بالغياب ( اهني بققت عيونها وقااااامت اتقولي جم قلت لها الرقم الفلاني قلت لها ترى انتي زينه وحرام تاخذين تقرير ضعيف بسبة الغياب قامت اتقول بس انا عندي ظروف وانا شغلي كامل وانا وانا وانا وانا وانا وانا قلت لها انا ما ادري جم بيعطونج لانه اول مره تمر علي معلمة هالكثر غيابها انهارت المعلمة الفاضلة وسوت لي مشكلة كبيرة قامت اتصارخ واتقول احترمي نفسج احترمي نفسج انا انصدمت انصدمت انصدمت فعلا ما كنت متوقعه هالردة الفعل

شنو الي صار

الي صار انها قامت تبجي واركضت حق غرفة الوكيلة تبجي

شنو اتقول حراااااااااااام حراااااااااااااااااام محد يرضى بالاهانة محد يرضى علي نفسه انه ينهان ( الله يخليكم لو احد ايلكم ومنهار بابجي ويقول هالكلام عن شخص شنو بتقولوون عنه ))

المهم

شوفوا الافتراءات الي صارت لي والشكاوي الي صارت لي وانا يا غافلين لكم الله

1- رئيسة قسمنا ظالمة وتبوق انجازاتنا ( مع العلم اني ما ا قدر اعتمد عليهم بولا اي شي حتى بدباسه )
2- رئيسة قسمنا باقت فكرتي مالت الورشة ( مع العلم انه الورشة كانت مخصصة لمعلمة من المعلمات وارفضتها مليون مره وانحرجت من المديرة واضطريت اسويها ولما انجحت ورشتي بحضور موجة الانشطة التعليمية واولياء الامور صرت بايقة فكرة المعلمة وحرمتها من حقوقها الفكرية .
3- رئيسة قسمنا كرهتنا بالتدريس .
4- رئيسة قسمنا اسلوبها مو زين معانا ( لاني ما اعطيهم اوامر واغلب الشغل انا اسويه )
4- رئيسة قسمنا وحده المعلمات قال اني حذفت عليها زبالة ( الله اكبر انا صارلي 14 سنه معقوله هذي اخلاقي )
5- رئيسة قسمنا تصرخ علينا جدام البنات طبعا افتراءات

المهم صارت دخلت الموجه علينا وانهارت المعلمة بالبجي عقب حصتها وقامت اتطق علي ريولها مثل المينونه وتبجي وتقول يالظالمه يالممثلة انتي ممثله اكبر ممثله لاني كنت ملتزمة الهدوء وبيني وبينكم منصدمة وكنت بدال قلبي قاعده اصلي على محمد وال محمد وادعي الله يفكني من هالمعضله الي ياتني ولي يومكم ما كنت عارفه انها حاقده انا قلت يمكن مريضه نفسيه يمكن فيها شي ضغط عليها قاملت تسبني واتغلط علي والموجه حسيت انها صدقتهم

المهم عندي انا جدام رب العباد شنو انا

وصار كلام كلام اتعب اقولكم عليه

لي اخر يوم اكلمهم بلطف اهجروا القسم وسلام ما يسلمون علي وسوالف كثيرة مريت فيها

شنو تنصحوني يا رئيسات الااقسام

على فكره هذي اول مره اتصير لي مشكله مع معلمات بحياتي كلها جدام المديره وجدام الموجهه

واول مره احس انه احد يحقد علي

عموما انا راح اعامل الناس باخلاقي مو باخلاقهم وعمري ما راح اجذب عشان اطلع نفسي من مشكله

بالنهايه اتمنى اسمع ارائكم وتفاعلكم

لاني والله انجرحت وانظلمت بس الي الان انا احب التدريس جدا جدا وكل من في المدرسة والموجهين كلهم يحبوني وولا احد من المدرسة رضا على الي سوووه كلهم كانوا يقولوون لي الله يعينج على غياب معلماتج

تحياتي

ممكن ابي ردود

والله حبيبتي انا مو رئيسه قسم فما ادري شنو الحل المناسب بالضبط

بس من رايي حاولي من بداية السنه تتحاشين المشاكل معاهم واحسن حل اذا طلبتي شغل حطي باوراق والمدرسات يوقعون عليها اما بالموافقه او بالايجاب >> نفس رئيسه قسمنا

عشان محد يظلمج وعليج بالدعاء ان ربي يسهل هالسنه على خييييير

وان شاءالله تعدي هالسنه

بس ارد واقول حاولي تصلحين علاقتج مع قسمج افضل ..

يا ليل ما اطولك

المعلمات طالبين نقل وان شاء الله ناقلينهم

علاقتي والله حى مع قسمي السابق الي كان في منطقة الفروانيه من احسن ما يكون معلمات كبار ومنهم حديثين تعين يحبوني وعمرنا ما صار بينا مشاكل

حاولت كثر ما اقدر احتوي القسم واتقرب كانت علاقتنا وايد زينه بدايه السنه الا فوق الزينه والكل كان يحسدنا يقولنا خوش قسم

امممممم
الله يعينج على ماابتلاج

عشان جذي >اغلب المعلمات يرفضون رئاسة القسم عشان هالتصادم اللي ممكن يصير

انا مورئيسة قسم

بس ترا الحزم مطلوب

يعني ماتكونين كلللش حازمه وقاسيه لكن ضروري تتبعين=الالتزام وبالكلمه الحلوه تنحل كل الامور

وتقدرين تاخذين منهم كل اللي تبينه

ومن السنه الجايه خلي كل وحده تسوي سي دي خاص فيها لانجازاتها عشان يكون ممسك عليها لي آخر

السنه والغياب عند الناظره انتي ماظلمتي احد

وموفقه حبوبه

حبيبتي

خل ينقلون وافتكي منهم

وبلشي مع الجدد بشوويه حزم وحدوود لاتطيحين الميانه الا بعد ماتعاشرينهم عدل

والله الواحد قام يخاف

والاهم ان ضميرج مرتاح وحقج ربي ياخذه لج

اذا كانوا موجودين ومانتقلو خلي علاقتج رسمية وكل شي تطلبينة وقعيهم علية علشان لايصير لف ودوران وقت الجد وحتي الأجتماع طلبي منهم يقرونة او اقرية لهم وبعدين يوقعون بالعلم واللة يعينج بصراحة صح من خلال عملي بميدان التدريس اتشوفين اشكال والوان والمصيبة احنا بمدرسة وحدة يعني نفس الخوات بس للأف البعض يعانون من امراض نفسية

شوفي فنانتنا أول شي تسوينه تحطين دفتر خاص حق أي عمل تقوليلهم عليه رضو وقعيهم ما رضو هم وقعيهم وبعد الغياب والتأخير و الاستئذان كله بدفترج الخاص علشان ترزينه بويها إذا بطلت حلجها ولا تبررين لهم أي شئ وحقريهم مده علشان يشوفون الفرق بين المعاملة الزينه و الشينه وأي شي يصير بالقسم من تجات ولا شي بلغي مديرتج علشان تعرفهم مو تخشين ودارينهم … وهم اللي بدو والبادي أظلم

خليج على طبيعتج

الي يبيج يقعد والي ما يبي ينقل

وخلي على طول في بالج ان ارضاء الناس غايه لا تدرك

مثل ما قالوا الخوات

وثقي أي شي انتي تسوينه أو هم يسوونه

خلي علاقتج معاهم رسمية على قد ما تقدرين

الله يعينج

التواقيع هم يوقعونها بايدهم
نسخة عندج ونسخة عند الناظرة ونسخةبغرفتهم

كل شي حاسبيهم عليهم

كل الاخبار تصبينها بإذن الناظرة

ان شاء الله لو غيروا كوب الشاي اللي يشربونه ,, تقولينه للناظرة

كل حركة كبيرة وصغيرة تنقال للناظرة

الموجهة تقرير اسبوعي تروحين لها تقولي لها على كل شي

والغياب اكيد راح يأثر

اذا هم ما استحوا

انتي تستحين ؟

واجهيهم بكل شي

عساهم ينتقولون وتفتكين منهم

اوووف الله يعينج

غيري تعاملج معاهم ن بداية السنه وخليج رسمية دام انهم سو فييج جذي !!

و مثل ما قالوا الخوات …

واما الشغل يكون موزعته عليهم ويوقعون عليه .. !!!

علشان ما يكون لهم حجة ..

واللي ترفض يكون بتقديرها ..

وانشاء الله ترتاحين

اول شي : احيي فيج الاخلاق والذوق الراقي الي نفقده في رئيسات الاقسام للاسف مو الكل طبعا <

ما احب رئيسه قسمي تقول كل شي للناظرة لان هذا مو حل بالعكس يكبر السالفه وقيل وقال وسوالف حريم مراح تخلص

الحل فنانتنا ان تعاملينهم معاملة رسمية عمل وبس وتوزعين الشغل بالتوثيق مثل ما قالوا البنات وواضح انها تتعلث فيج جدام الادارة والموجهه عشان تستر عيوبها بس دام يعرفونج كل هالسنين كوني واثقه من نفسج ….

وبخصوص الي ما يسلمون عليج هذا مو دين دينا الاسلام وخيركم من بدا بالسلام ,

واااااااااااااي فديتج , لا جربوا رئيسة قسم غيرج بيعرفون قدرج
حبيبتي إنتي قلبج طيب بس صدقيني في ناس وخاصه من بيئة المدرسات لإنها كلها شغل وكل وحده بتلقى من يعطيها ويه والله ما تخلصين منها وصج ما ينعطون ويه لازم تكونين حازمه معاهم وجاده وفعلا وزعي الشغل بينهم واللي ما تسوي شغله إفاده أو إن سأل احد وين الشغله الفلانيه قولي والله فلانه ما سوتها وخليها تنتحاسب , بس طبعا لازم تعذرين همن الأعذار المقبوله والصعبه مو عرس رفيجتي ومالي خلق وكارهه التدريس و و و )

وآنا حبيتج من طريقة تعاملج كرئيسة قسم , ياريت تصيرين رئيسة قسمي

اشكر اولا كل من دخل ورد عل والي حتى ما رد اشكرهم
اختي مشايخ انا انظلمت والله العالم شكثر كنت اراعي شعورهم بس لما اكون مضايقه من تصرفاتهم مو معناته انه انا اضحك هم المسؤول اذا كان مضايق من الي يشتغل معاهم يضحك مره واثنين بس مو كل مره ولما يشوف الاخطاء تتكرر

مثلي انا اعطيج مثال طلبت من معلمة اتسوي مسابقة حق يوم الاحتفال بالعيد الوطني ( المعلمة غابت )

بعدين طلبت منها اتسوي حق يوم عيد العلم غابت ( يعني شنو المفروض استقبلها بالورود ولا احاسبها والحمدالله اقولها انا كلفتج بشي ليش غبتي تقولي انتي ما تراعين ظروفي زين ليش توعدين وتقولوين بسوي وانا ادري عذر اقبح من ذنب اخر شي قاموا يقولوون احنا كرهنا التدريس بسبتج دامج عارفه انج بتغيبين قولي ماني مسويه وفكي عمرج
ومشكوره على الرد اختي