قصة ولادتي و تجربة القيصريه مع ابرة الظهر

مرحبا حوامل

شفت وايد مواضيع استفسار عن الولاده القيصريه بإبرة الظهر و انا اصلا كنت محتاره بس قررت آخذ ابرة الظهر و الحمدلله قراري كان بمحله
طبعا انا دكتورتي امل عبدالعزيز و ولادتي كانت بالسلام و اتفقت مع دكتورتي ان تكون ولادتي تاريخ 208 و كانت الدكتوره حريصه ان دكتور التخدير يكون زين لان ولادتي الاوليه دكتور التخدير كان اي شي و لعب فيني.. المهم الساعه 11 سويت دخول لان الساعه 3 موعد عميليتي.. سوولي تحاليل و مر الوقت بسرعه و الحمدلله ماكنت خايفه بس يوم قالولي يالله الحين بتنزلين غرفة العمليات خفت و صعدوني السرير و حركوني واااااااي إحساس رهيب و انت تشوفين ليتات السقف و ريلي يمشي يمي و مبين على ويهه خايف بس يحاول يخفف علي و اصعب لحظه عند باب غرفة العمليات غورقت عيون ريلي و انا ماقدرت بجيت و دخلوني داخل
خلوني بالملاحظه لان دكتور التخدير تأخر شوي و وصل بالضبط الساعه ثلاث الا خمس على اساس ان خمس دقايق و يخلص ابرة الظهر.. طبعا الدكتور كان اسمه نيڤين يهبل خوش دكتور.. دخلوني غرفة العمليات و بدا الدكتور يحطلي الابره و انا هم ماكنت خايفه لان بولادتي الاوليه ماعورتني الابره بس هالمره مت من العوار و الدكتور قعد 20 دقيقه عشان يضبط الابره جان يسألني قالي انتي عندج مشكله بالظهر صح فقتله اي فيني دسك و فقرة ظهري الاخيره فيها انحراف قالي عشان جذي كان صعب و عشان جذي بولادتج الاوليه ماضبطت معاج عدل لان بحالتج يبيلها دقه
المهم بعد الإبرة حسيت بخدر بريلي و نوموني على ظهري أهني حسيت بثقل مو طبييعي و حسيت اني ماني قادره اتنفس عدل ودكتور التخدير كان يمي و يقولي ريلاكس هالشي طبيعي و صج شوي تحسنت و دشت الدكتوره يحليلها و قامت تسولف معاي و بدت العمليه طبعا ماحسيت بولا شي و فجأه حسيت اني خفيييييييفه و شوي ولا الدكتور تقول ماشالله قمر قمر و ترفعها لي و شفتها واااااااي شعور مو طبيعي و خذاها دكتور الاطفال و سمعتها واهي تبجي و سبحوها ويابولي ياها مره ثانيه وأي بستها بستها لين قلت بس و من كثر مارتحت قلت حق الدكتوره مو تنوميني ابي أظل صاحيه و قالتلي خلاص على راحتج و اطلعت بره عند اهلي تبشرهم
خلوني بالافاقه و غفيت نص ساعه وبطلت عيني قعدت اسولف مع السسترات الحمدلله ماكنت حاسه لا بألم و لا بدوخه و لا بتعب و كنت مستاااانسه و قاعده اضحك و كنت احن صعدووووني بشوف اهلي و صج شوي وصعدوني فوق غرفتي و شفت اهلي و ريلي وااي كان الشعور مو طبيعي و بعدها بساعتين يابولي بنتي حبيبتي و قعدنا نصور صج كانت تجربه حلوه الحمدلله يارب.. طبعا يوم كامل ماكنت احس بألم و ثاني يوم الظهر مشوني و يابولي وجبه خفيفه بس الي ذبحني ان حاشني عوار يسمونه الحس الي عواره نفس الطلق وأي صج يعور و استمر معاي يومين و راح..
هالمره الجرح ماعورني وايد لان الدكتوره بدال ماتحطلي الغرز عالاطراف مع خرزات سوتلي غرزه بالنص و سوتلي شد حق بطني شوي فالحمدلله بطني مو مثل ولادتي الاوليه عووووود و يهرع و المرسخ طايحه لا الحمدلله بالعكس بقت كرشه صغيره و انشالله تروح على ماطلع من الاربعين.. و طبعا مستشفى السلام ماعليه كلام يهبل و عنايه و السترررات صج صج يهبلوووووووووون مامرت علي وحده شينه و وايد اهتمو فيني..
و بس الي عندها استفسار انا حاضره

الف الحمد الله علا سلامتج

وصراحه مغااامره انا ما افكر كلش بهالموضوع

بس كله تساهيل من الله

عسا الله يخليها لج

الحمدلله على سلامتج وسلامة البنوتة وتتربى بعزكم ياارب
اشوة الحين عرفت عند اي دكتور تخدير اخذ ابرة الظهر بقولهم ابي دكتور نيفين

الحمدلله على سلامتك
ومبروك ما جاك
أنا قيصريه بس محتاره بين ابره الظهر والبنج العام
مابي احس باللي يصير حوالي

دكتور اسمه نيفين ذكرتيني عبدالحسين عبدالرضا لما نادوله الممرض اسمه نهاد لوووول

الحمدلله على سلامتج انتي والمولوده وتتربى بعزكم واي بجيت لما قلتي بستها وبستها شوقتيني على بنيتي يالله تفرحيني بشوفتها

والله يجزاج خير ريحتي وايد بنات يسالون عن هالابره بذات القيصريات

واااي عشت معاج اللحظات وتأثرت بصراحة

والحمدلله على سلامتج يالغلا وسلامة البيبي ..

بس عندي سؤال ميخالف تحمليني ..

العوار اللي حاشج بعد الولادة هذا من الابرة ؟؟؟

وسؤال ثاني .. جم كلفتج الولادة كلها

اي والله تساهيل من ربج مشكوره حبيبتي

حبيبتي انا دكتورتي تمدح بعد وحده اسمها ياسمين يعني اذا بغيتي ابرة ظهر طلبي يا نيڤين او ياسمين والله يسهل عليج انشالله

لوووووووول انا مادري ان ريال الصراحه انصدمت. لم يالي ريال هندي قالي انا دكتور نيڤين والله يتلي الضحكه.. الله يسهل عليج انشالله و تشوفين بنيتج بحضنج

الله يسلمج حبيبتي.. لا حبيبتي مو من ابرة الظهر هالعوار يسمونه (الحس) ايي بعد الولاده سواء كنتي طبيعي ولا قيصريه بس مايحوش كل الحريم و عواره مثل الطلق و اقوى بعد يذبح و يحوشج لم الرحم يرد مكانه بس سبحان الله مايحوش البجر.. انا ماسويت استقبال و قعدت 4 ايام خذيت غرفة ال vip كانت وسيعه و حلوه طلعت علي الولاده 1700

الحمدلله على سلامتج عيوني دمعت وانه اقرا قصتج جربت اللي قلتي عنه واي رووعه القيصريه مع ابره الظهر تطلعين مرتاحه

ومستانسه وكنت بس ابي اسولف من الوناسه كل شوي داقه تتلفون على احد

تتربى بعزكم

Hello kitty تصدقين صح تطلعين مرتااااحه و ودج تسولفين مع الكل.. مشكوره حبيبتي

الحمدلله على سلامتج

الحمد لله على سلامتج والله يبارك لج فيها وينشيها نشأة الصالحين