"فلانه" الي مع زوجي بالدوام!

في موضوع قاهرني و يايبلي الضغط ومو مخليني انام و لو لا معزتكم و لاني اعتبركم مثل خواتي و لو ما احب هالمنتدى جان ما كتبت موضوعي لكم

موضوعي اهو زميلة زوجي بالدوام

زوجي يشتغل بمكان فيه اختلاط و معاه وحده بالقسم الي اهو فيه متدخله بكل امور حياتنا ولو اني ادري ان الغلط منه اهو مو بس منها و المفروض ما يسولف مع الحريم و يدخلهم بأمورنا الخاصه بس هم اهي غلطانه اشلون تسمح لنفسها انها تسولف مع ريال غريب و تدخل ابأمور بيته و عايلته

القصه بدت من قبل فتره كان ولدي مريض و محتاره اي طبيب اوديه ييه زوجي و قال فلانه الي معاي بالدوام تقول روحو الطبيب الفلاني امنا بالله قلت يمكن المره بتساعده و بالصدفه سمعته و حاولت اتساعدنا يزاها الله خير بعدها بفتره صار موضوع ثاني كنا نسولف بالليل عنه و الصبح راح زوجي الدوام رجع و قالي فلانه الي معاي بالدوام اتقول ……………………………..الخ
صار موضوع ثالث نفس الشي فلانه الي معاي بالدوام قالت ان كيت كيت كيت الخ و مره كنت اسولف معاه عن اكله كنت مادري اشمقاديرها و الا يرجع من الدوام بيده ورقه فيها مقاديرها و فلانه صارت تدخل بكل صغيره و كبيره و بعض الاحيان يطلع يروح الجمعيه يرجع يقول فلانه قالت ان الحل لهالمشكله ……الخ
و فلانه قالت وو فلانه قالت و فلانه صارت تدخل حتى ابابسط الامور

فلانه صكت على بو راشد

اتذكر قبل سألته فلانه جم عمرها ( تخيلتها حرمه كبيره ) لانن زوجي وايد مطيح الميانه معاها قال زوجي اهي كبيره كبيره
ارتحت اشوي

الصدمه يا بنات ان اليوم ياب طاريها و سالته اهي من بنته و قالي اسم عايلتها بعدين قلتله اهي جم عمرها قال أأأأأأ كبرج

اهني الصدمه نسى انه قايلي انها كبيره طلعت كبري وانا ماني كبيره يا بنات ومنها وانا ميته من القهر حسبي الله و نعم الوكيل فيج يا فلانه لو ما تبينها مني اشلون تسمحين لنفسج انج اتطقينها سالفه مع الرياييل يالي ما تخافين من ربج ترضينها لزوجج؟
خير يا طير معاج بالدوام بس مو معناته انج تدخلين بخصوصيات العالم وين الحيا وين المستحى وين الدين وين العادات والتقاليد والا خلاص راحت كل القيم والناس صارت ما تستحي

الله يبليج بوحده تلبق بزوجج و تحرج مثل ما حريتيني

سلام عليكم حبيبتي عليج بدعاء وقيام الليل

و عليكم السلام اختي ساره و ياره صاجه مالي الا الدعاء

امبي وربي ما تستحي تعدت حدودها وايد معني مو متزوجه بس اتضايق لما اشوف وحده مستانسه مع زوجها واتي وحده تخرب عليهم شنو ماكو رياييل غير هالمتزوج الحمد الله والشكر ترى في بنات يستانسون لما يخربون بيت وحده مرض اعوذ
بالله فيهم نقص

الله ياخذ هالاشكال

الغلط منه

قوليله مشاكل الدوام للدوام لا اتييبها البيت لان اتضايقني

وبعدين هذا قصده من الكلام انج ماتعرفين تتصرفين مثلا ؟؟ قوليله محد طلب رايها بحياتنا

جعميه مرة مرتين بيحس انج تغارين

شنو هاذي ريلج معطيها ويه صراحه

اى شي راح وسالها

الغلط من زوجج

صكت على اوبرا هالجليلة الحيااا!!!!!

حطيله حد بس عاد بطريقه مادري ماعرفها اهم شيء سلميه<<ضد العنف

الله يعينج ويبعدها عنج

الغلط من ريلج شكو يقولها على كل كبيره وصغيره بينكم زميله بدوام أمنا بالله
بس لازم يكون بينهم حدود شسالفه والله حرتني السراحه
شكله ريلج على نيته يسولف لها ولا مايجي يقولج شنو قالت له بظبط
الله يهديه ويسخره لج يارب ويبعد عنه بنات الحرام

اهي متزوجه و عندها اعيال بعد مو بنت

والله هذا الي قالي عنها بس ما يندرى صج والا لأ لان بالبدايه قال كبيره بعدين طلعت كبري!

آمين

انا مقدرة انج تغارين على زوجج

بس ترى ما اشوفها سوت شي غلط او ضرتكم بشي !!

واهي ما يابت سوالف بيتكم من جيبها اكيد ريلج اهو الي يسولف لها واهي تعطيه حل او تشور عليه

لا تظلمين المرة وتدعين عليها اذا مضايقتج السالفه كلمي زوجج وفهميه ان ميانته مع زميلاته تضايقج

وبعدين زملاء العمل وايد يصير بينهم سوالف

انا امي عندها زملاء بالدوام من جميع الاعمار وجميع الجنسيات رياييل وحريم وتسولف لنا عنهم وعن سوالفهم اهما بروحهم من كثر مايملون من الشغل يقعدون يسولفون ويفضفضون حق بعض عادي !!

بصراحة انا زوجي جذية بحكم انة يشتغل بمكان مختلط تصدقين امس جاي من الدوام يقولي تصدقين ان في وحدة من بنات الدوام تركض وراي تبي تقولي شيء جان اقولها نعم والا ترد علية تبي تعزمة على بوفية بتسويه على سلامته لان كان غايب عن الدوام اجازة لمدة اسبوع زين لو نفرض ان صج زملائة ويبون يتحمدون لة بالسلامة عن طريق البوفية زين في مليون رجال معاهم بالقسم ليش ما اعزموة شمعنى اهي .انا استغربت وما حطيت ببالي .
بس دعيت ان الله يبعد عنة بنات ابليس.
هالزمن يخوف تشوفين البنت اهية الي تتلزق بالريال وقاطة عمرها علية اللهم ياكافي .

انا سكت ولا قلتله شي و بينتله ان عااادي كلم فلانه او ما كلمها مو هامني لاني ادري ان اذا تهاوشت معاه على هالسالفه بيسولف معاها من وراي ولا راح يقولي اي شي و بيخش عني كل شي عرفتي

و نطرت قلت يمكن تنتهي السوالف مع فلانه يمكن فتره و تعدي لاااااا ماكو فايده و السوالف معاها مستمره