|
|
هلا بالغاليات ..اشرايكم كل وحده اتقدم اقتراح على كيفية عرض القرقيعان، يعني شريتي قرقيعان وتبين اتقدمينه لحمولتج أو لأهلج اشلون تعرضينه مثلا ( بسياره-سفينه-بقفص -بأدراج مزينه ……..إلخ ) وأنا أول وحده راح أبتدي وبعدين أبي أشوف ابداعاتكم ولاتبخلون بأي اقتراح ………
أولا :قرقيعان ولدي من ثلاث سنين …. لبسته الصديري والطاقيه والكيس وشريته من مجمع الأوقاف على شكل خيشه وطبعا شريت عربانه من سوق المعلم اللي بحولي قسم الورد والمناظرالموجود تحت بالسرداب ، والحين شفت نفس العربانه بالحديقه الملكيه، فحطيت ولدي بالعربانه وأكياس القرقيعان حوله وكان معلق على الأكياس فوانيس شابه ، وطفينه ليتات صالة حمولتي واشغلت شريط سلم ولهم يالله ..خله لأمه يالله ..لو اتشوف وجه ولدي وقتها اتموتون من الضحك علامات الإستغراب على وجه ، ونفس العربانه والقرقيعان سويته ابيت أهلي نزلته بالأسنسير على السرداب.
ثانيا : قرقيعان بنتي… شريت من سوق الإيراني مكتبه على شكل قارب مع جدافات وركبت له تواير وشريت من بياع الورد في مجمع منيره أحبال فيها أصداف ومحار وزينت القارب بالحبال ،وشريت صناديق اللي من القش اللي ابسرعه يتشقق اذا ماانبهتي بمسكتج له وحطيت القرقيعان بالصناديق بعد ماركبت عليهم الأصداف والنجوم ولبست بنتي عبايه اصغيروووووووونه مع لفتها يايبتها خالتي من المدينه وحطيتها بالقارب والصندوق اللي حق خالتي آخر القارب وأكياس القرقيعان ذات اللون الصدفي عشان يتناسب مع القارب ورى بنتي والمسجل تحت القرقيعان وامشغله نشيده فيها موال بحاره وصوت بحر ، أولاد الإثين ادخلو قبل بنتي لابسين اوزار على شكل اشماغ بني مع اصديري وطاقيه وكيس القرقيعان وشريت هذه الشماغات من المباركيه وفصلت الصديري والباقي من نفس خامة الشماع ، وشريت من محل الكلف حبل النجوم الذهبيه وخليتها حزام على الوزار ،وركبت مسباح والإسعفه على الإصديري وخذيت من اتروفاليو فوانيس املونه عشان يمسكونها عيالي ، وهم سكروا الليتات وعلى الموال وصوت الموج والفوانيس ادخلت خالتي اقماشه (بنتي) وتم توزيع القرقيعان بعد تقديم الصندوق المزين بالأصداف لخالتي وقلت هذا الكنز اللي لقاه الغواص وتستاهلينه يا خالتو، وطبعا نفس العرض سويته ببيت أهلي .
ومره فكرت أستعير عربانه الجمعيه وأزينها وأحط عيالي والقرقيعان فيها ، ومره بعربانه راعي البرد وأخليها مثل العربانه اللي بفتح ياسمسم …
يالله الحين قرقرت وايد وأبي قرقتكم وابداعاتكم وما أبي أشوف وحده اشحفان القطو
وهذا نفس موضوعي اللي كنت حاطته او نفس العنوان تقريبا
https://www.q8yat.net/showthread.php?t=82963
واتمنى البنات يتفاعلون معاج
عليج بالف الف عافيه
وانا اول وحده راح اكون امتابعه معاج بالموضوع حبيبتي
واي شي اذكره راح احطه
وماكان قصدي والله بس حطيتلج الرابط قلت يمكن توفين البنات انهم كاتبين اي شي تستفيدين منه
لي عوده يالغاليه مع افكار تقديم القرقيعان 
ومانسوي هالاشياء اللي مسويتها شموخ انتي ماشالله
لا كل واحد يشيل قرقيعانه ويغنون اليهال سلم ولدهم يالله ويدش الياهل يقدم قرقيعانه
وبس