عملية عيوني سحب الماي الابيض مع الدكتور الرائع عبدالله المنصور + بالصور والفيديو

حبيت اكتب لكم تفاصيل عملية عيوني سحب الماي الابيض من عيني اليمين وطبعا عيني اليسار فيها ماي بس العين اليمين فيها اكثر وزاييد وايد علشان جذي سوينا اليمين وعقب فتره باذن الله راح اسوي اليسار

حبيت اقولكم ان انا عمري 21 ثاني شي من وانا صغيره نظري مافيه ولا شي ولا عمري كليت كرتزون ومافيني لا سكر ولا ضغط وهذا الي حير الدكاتره اكثر واكثر ومحد كان مصدق ولما يفحصون عيني ينصدمون ان صج بعيني ماي سبحان الله معنى يقولون هالماي ماايي الا حق اعمارهم فوق ال40 وحتى لو يه وانتي صغيره يكون فيج سكر او ضغط او كنتي ماكله كرتزون

اول ماعرفت ان فيني ماي ابيض كنت توني متخرجه من الثانويه وداشه المعهد قمت مااشوف اللوحه بوضوح رحت حق نظارات حسن وسويت فحص وسوتلي نظاره وقمت اشوف بالنظاره عدل عقب سنه صرت البسها ولا ماالبسها نفس الشي النظر مايتعدل قلت يمكن قل عندي النظر خل اروح افحص مره ثانيه ونفس الشي رحت نظارات حسن ولما فحصتني قالتلي انتي بعيونج ماي ابيض بس روحي حق عياده خل تفحصج وتتأكدين اكثر

ورحت عند الدكتوره معصومه وسويت عندها فحوصات كامله وقالت اي صح انتي بعيونج ماي ابيض وطبعا سالتني هالاسئله فيج سكر . ضغط . ماكله كرتزون وانا طبعا اجابتي لا لا لا قالت الماي الابيض مايروح الا بعمليه فالاحسن تنطرين لما يكتمل شوي وتسوين العمليه قلت اوكي

ورحت عند الدكتور مبارك العجمي علشان اتاكد اكثر قلت بفتر على كذا دكتور اشوف شنو يقولون نفس الكلام ولا كل واحد يقولي شي
ورحت وقالي نفس الكلام بالضبط بس اهوا قالي خلصي من امتحاناتج بالمعهد وتعالي اسويها لج العمليه انا خفت اسويها وقلت لا خلاص

ورحت عند الدكتور محمد عاطف بمستشفى طيبه وهم نفس الكلام ورحت مستشفى البحر ورحت مستشفى شركه النفط تخيلوا درت كل الدكاتره لووووول وكلهم نفس الكلام بالضبط محد زاد حرف على كلام الثاني

الحين بتكلم لكم عن الماي الابيض اهوا مو ماي اهيا العدسه تكون عليها مثل ضبابه يقولون مثل الزجاج لما يكون عليه وصخ يكون مضبب فهمتوني صح طبعا كل مازاد هالضباب على العدسه انتي يقل النظر عندج ماتشوفين عدل انا كنت اشوف بس احس مثل ضبابه على عيني مااشوف الملامح عدل الا لما اقرب اكثر والصبح مااقدر اطلع الا بنظاره شمسيه لان الشمس والاضاءه القويه تاثر على العيون وماتخليني اشوف ماقمت اسوق السياره لاني ماقمت اشوف عدل وكانت وايد تدمع على طوووووووول اذتني وايد يعني بس من اقعد من النوم ليما انام وانا ماسكه الكلنكس وامش دموعي

هالصور تبين لكم شلون النظر لما يصير بالعين ماي ابيض

والعمليه يدخلونج العمليات ويعطونج بنج موضعي معنى اغلب الدكاتره قالوا لي راح نعطيج بنج كامل لان انتي صغيره ويمكن تحسين بعوار وماتتحملين عكس الكبار بالسن ويسحبون العدسه ويحطون لج عدسه يديده بالليزر وعقب تلبسين نظاره شمسيه لمدة اسبوعين

عقب سنتين حسيت زاد على الماي لان ماقمت اشوف قل النظر عندي واااايد قلت خل اروح افحص يمكن يقولون اكتمل الماي وانسوي لج العمليه
رحت حق الدكتور محمد عاطف بمستشفى طيبه لان عمي وبنات عمتي مدحوه لي واااااااايد

فحص عيني وقالي الماي زايد وايد ونقدر نسويلج العمليه قلت اوكي قالي روحي سوي تحاليل وروحي حق عياده الاسنان علشان نتاكد ان مافيج صديد وروحي عياده الباطنيه سوي تخطيط قلب وروحي عياده الانف والاذن والحنجره ورحت سويت كل شي ولما رحت له علشان يعطيني موعد العمليه قالي نطري لان ماعندي عدسه لازم اطلبها وانا كنت مصليه استخاره والحمدالله اني صليت استخاره
ماارتحت حق كلامه حسيته متوهق ومايعرف يسوي العمليه وطلع كلامي صح لان مرتين سالني اول مره لما رحت له قالي اي عين تبين اسوي العمليه اليمين ولا اليسار ؟؟؟؟؟؟؟؟ والله شي يضحك انا اعلمك منو الدكتور انا ولا انت يعني انتي ماتشوف ان عيني اليمين الماي الي فيها اكثر ؟؟؟ ورد سالني لما قلت له متى تحطلي موعد ابوي قالي خلاص خليه ليش ماتروحين حق الدكتور عبدالله المنصور وايييد زين والكل يمدحه وانا مجربه من قبل مسوي عمليه عنده قلت ميخالف عادي خل اروح اخذ موعد واشوف شنو يقول سبحان الله شوفوا طول هالسنتين مايه على بالنا الدكتور عبدالله افتريت على كل الدكاتره سبحان الله خيره

ورحت حق الدكتور عبدالله وفحص عيني وقالي متى تبين اسويلج العمليه قتله باسرع وقت اذا تقدر انا رحت له الثلاثا قالي خلاص انا كل يوم اثنين اسوي عمليات تعالي الاثنين 26-10-09 واسويها لج قلت انشالله قالي انا مااسوي العمليات بعيادتي تروحين بيوم العمليه مركز الزهير ورا المواساة

رحت طبعا صايمه وكنت حدي حدي خايفه واحاتي بوست بناتي وبجيت واايد وطلعت من البيت الساعه 7 مع امي وريلي ورحنا كان دوامات فالشارع زحمه وصلنا 8 دخلوني الغرفه قعدنا

يت السستر عطتني لبس الميانين قالت لبسيه انا خنقتني العبره اقول حق امي وااي ذكرتني بالولاده خفت زياده لووول عقب قزتني ابرة الدرب بس ماركبته

الساعه 8 ونص يابتلي سرير علشان نروح العمليات وانا قعدت ابجي وامي تقولي لاتبجين كلها 10 دقايق انشالله وتطلعين واهيا تبجي لووول اصلا امي كانت خايفه علي اكثر واهيا صارلها جم يوم قبل العمليه اشوفها تبجي بس تبي تواسيني واهيا ياحياتي تبجي وخايفه

ورحنا العمليات وانا ابجي ابجي والسسترات يواسوني لا تبجين خلاص ماكو شي

وصلنا غرفه العمليات استلمني سستر فلبيني ودخلني العمليات

حسيت ابرد مو طبيعي جسمي قام كله يرجف وحلجي بروحه قام يطقطق حيييل مااقدر اسكره يرجف بقوه قلت حق السستر الفلبيني واايد برد غطاني بكمبل دافي وهم بردانه يالي رئيس التخدير وطبعا نفس الاساله كالمعتاد فيج سكر ضغط مسويه قبل حادث ماكله كرتزون
دخلوني غرفه العمليات

كانوا السسترات يجهزون اغراضهم يالي دكتور مصري مساعد دكتوري انا كنت منسدحه وافكر واحاتي فجاه طب بويهي اخترعت ولا يقولي شفيج قتله انت خرعتني طلعت بويهي فجاه قالي انا الدكتور ولا تخافين وقعد يسولف وانا مالي خلق صاكه فيني الدنيا وصل دكتوري عبدالله المنصور سلم علي وقعد يزهب اغراضه

ركبوا لي جهاز تخطيط القلب ويالي الدكتور المصري وركب بخشمي اكسجين اهوا مايبيني اخاف قالي هذا بس هوا هوا دكتوري قالي هذا اكسجين لوووول دقايق الا انا نايمه طبعا هذا الاكسجين البنج الموضعي 10 دقايق قعدت مخترعه اطالع الي يمي وادور يقولون لي اشفيج بعدين استوعبت قلت وييي انا عبالي بالبيت علشان جذي قعدت ادور مخترعه لوووول حدي مخرفه

صارت الساعه 9 ونص بلشوا فيني دكتور لبسوه اللبس وقعد الدكتور المصري يحط بابره الدرب دوا ودكتوري حط على ويهي مثل ورقه غطا ويهي كله واهوا قعد يشتغل بعيني

عقب 10 دقايق قالي شوي ونخلص العمليه و الحمدالله خلصنا من العمليه وغطا عيوني جنب اليمين كله بشاش وطلعوني من غرفه العمليات وودوني الغرفه قعدت نص ساعه وطلعت من المستشفى ورحت البيت وقالي تعالي باجر الساعه 9 عندج مراجعه

هذا الفيديو عمليه سحب الماي شوفوا شلون انا لما شفته اخترعت قلت جذي سووو فيني لوووول خلاص ماني مسويه عيني الثانيه لووول

https://www.youtube.com/watch?v=0eLKq…eature=related

طول اليوم الحمدالله مافيني شي بس بليل حسيت بعوار بعيوني ولما قعدت الصبح ماقدرت ابطل عيوني اليسار اذا بطلتها عيني اليمين تذبحني عوار ولبست ورحت الموعد طبعا مااقدر ابطل عيوني يابولي وويل جير ودزوني ولما دخلت على الدكتور اخترعت خرعه لووول مسكين يقول شفيها شفيها قتله مااقدر ابطل عيوني تذبحني عوار وكان شمس قلت مااقدر افتح عيوني صكروا الليتات صكروا البردات وفج الشاش عن عيني وقالي حاولي فتحيها علشان يبي يفحصها بالجهاز وبالقصب فتحتها وقام يقول ماشالله ماشالله الحمدالله العمليه وايييد زينه وعيونج صارت احسن الحمدالله انا ارتحت لاني كنت خايفه كله حاطه في بالي اقول اذا فتح الشاش وقالي فتحي عينج ماراح اشوف لوول متعقده من الافلام بس الحمدالله رديت اشوف وعطاني قطرات وعقب القطرات خف العوار حتى المفروض القطرات احطهم كل 3 ساعات بس قالي علشان العوار حطي كل ساعه وباجر تعالي رحت له ثاني يوم وانا الحمدالله احسن من امس بوااايد وفحصها واستانس قالي واييد زينه وسويت فحص نظر والسستر استانست وايييييييييييد لاني قمت اشوف لان قبل العمليه ماشفت ولالالالا شي تخيلوا بس شفت العلامه اول وحده وكانت كبيره وايد بس العلامات الثانيه ماشفتهم كلللش وعقب اسبوع رحت موعدي والحمدالله فحصها وقالي القطرات خلاص حطيهم كل 6 ساعات وعقب اسبوعين رحت موعدي اللي اهوا امس وقالي متى تبين اسوي لج العمليه حق عينج اليسار تبين الاسبوع الياي لووول قتله لالا تو الناس بعدين انشالله قالي خلاص اذا تبين تسوينها تعالي

وهذي النهايه واتمنى انكم تدعون لي ان الله يشافيني ويبعد عني عيون الحساد لان الكل يقولي الي صار فيج من الحسد لان يالي الماي من دون اسباب بس الحمدالله على كل حال