عالم الريال

اليوم حبيت اتكلم عن عالم الريايل الغامض ..

انا عن نفسي احس الريال كله غموض مع انه المجتمع فاتحله المجال لممارسه كل شي سواء كان صح او غلط مع هذا يفضل الغموض في تصرفاته ..

سؤال يطرح نفسه ليش الريال غامض ؟؟

وليش دايما فبالنا يالحريم انه كل الرياييل خونه ؟؟ لانهم فعلا خونه ؟؟ ولا لانه احنا عشنا تجارب وشفناهم خونه ..

ابونا ريال اخوانا رياييل خوالنا عمامنا عيالنا كل هذول رياييل هل هذا معناته انهم ينضمون لقافله الخونه ؟؟

مادري انا عن نفسي ما اثق باي ريال حتى ابوي احس انه دم الرياييل مختلط معاه الخيانه وانه فيه انيميا اخلاص .. ولا شرايكم ؟؟؟

يقهرون لانهم ما يعجبهم العجب .. يبي زوجته 24 /24 كاشخه ولابسه وعلى سنجه عشره على قوله اخوانا المصريين ..

وبنفس الوقت يبيها تهتم افبيتها ومايبي ايي يلاقي جدامه الخدامه تحوس وتنظف يبي زوجته تنظف بيتها لانه هذي مملكتها ..

ويبي زوجته تطبخله مايبي من المطعم او من الخدامه .. وبنفس الوقت ياويلها يا سواد ليلها اذا رجع ولقى ريحتها ريحه مطبخ ..

يبي يرجع يلقى عياله نظاف مرتبين وريحتهم حلوه .. ومايبي الخدامه تلمسهم .. ويبي زوجته اهي اللي تهتم فيهم .. بالمقابل ..

اذا اهو يبي شي وقالت له زوجته لا ما اقدر اليهال مرضى ولا بروح ابدل حق اليهال .. تشوفينه قلب 180 درجه ..

واعتفس يبي المرا له ملكه عبده عنده .. المرا او الزوجه انسانه ماهي مكينه وماتقدر تسوي كل شي بروحها بنفس الوقت ..

تبيها تنظف وتغسل وتطبخ وتهتم بالعيال وبدراستهم وبترتيبهم وتهتم بفسها وبشكلها وبجمالها كل هذا خلال روحتك للدوام تبي

تبي ترجع تلاقي كل هذا خالص وتلاقي زوجتك ناطرتك متعطره وكاشخه ..

متى يمديها تخلص كل هذا وانت معتمد عليها بكل شي اهي اللي تودي اليهال المدرسه اهي اللي تييبهم .. لا وفوق هذا شرط ..

لا زم موظفه ..

احس الريال نظرته للمرا نظره حيوانيه .. سوري يعني على هاللفظ بس افباله المرا ماتحس ما يفكر انها تتعب عشان بس ترضيه ..

لو فكر يوم يدش على جوجل ويسوي بحث ..عن الحريم .. بيلقى ملاااييييين المواضيع عن الخلطات والعطورات وشغلات تخص العنايه بالجسم من الى .. وشلون الزوجه تهتم بزوجها وشلون تغريه ..

بالمقابل لو بحث عن العكس بيلقى قليييييييييييل من المواضيع اللي تشرح شلون يهتم الريال بنفسه ويحاول يغري زوجته ..

اذا بنعطي الريالل مثل مايبي ونسوي كل اللي يبي بيكون اليوم جذي ..

تقعد الزوجه الساعه 6 الصبح تقعد اليهال حق المدرسه تلبسهم وتغسلهم وتزهب الريوق وتطلع من الثلاجه اللي بتطبخه للغدا ..

تري عيالها وتلبس وتوديهم المدرسه وتروح الدوام ..

تطلع من الدوام اتييب عيالها وتروح البيت تطبخ غداها ووتتسبح وتبدل وتكشخ تنطر ريلها ايي من الدوام .. عشان تغديه .. تخلص من الغدا ..

تروح المطبخ تغسل المواعين وتنظف المطبخ .. على ما تخلص صار العصر وقت دراسه اليهال تدرستهم وخلصت راحت تنظف البيت وتزهب القهوه والجاي حق ديوانيه ريلها ولا حقه لما يقعد من النوم .. ولازم تخلص تنظيف قبل لا يقعد عشان لما يقعد يشوفها كاشخه ..

يتقهوى ويطلع تكون مزهبه ملابسه وكاويتهم ومعطرتهم ..

صار وقت العشا عشت اليهال ونومتهم وزهبت العشا لزوجها المحترم راحت بدلت ملابسها عقب ريحه المطبخ وتعطرت واكشخت واقعدت اي الاخ على الساعه 12 يوعان راحت صخنت له عشاه تعشى شالت الاكل حزتها تكون خلاااااص تبي تنام طفت اييها الاخ بكل برود ..

ابيج اليوم !!!!!!!!!!!! في هدت حيل اكثر من جذي حتى الخدم الواحد يرحمهم بس الريال عمره ما يريح المرا ولا قال انا شمقصر فيه ؟ ليش انا شطلبت منج ؟؟

اناني بشكل مو طبيعي .. يبي كل هذا تسويه زوجته واهو بالمقابل شنو يسوي ولا شي ..

بنهايه الموضوع بسأل سؤال ..

لو الزوج والزوجه يتبادلون الادوار الزوج يقوم بشغل الزوجه والزوج تقوم بشغل الزوج ليوم واحد بس ؟؟ تتوقعون شنو بيصير بالريال ؟؟

تقبلوا تحياتي