عازمج زوجج عالعشا بس ماتعرفين تتصرفين بالمطعم ولاتعرفين اتكيت الاكل؟؟

*اول ماتوصلون المطعم ..

– اذا كان اهو اللي عازمج خليه اهو يختار المكان … لا تصيرفين ملقوفة وتركظين على طاولة حطيتي عينج عليها من بعيد على بو انه بيلحقج ويقعد معاج يمكن موعاجبه المكان؟؟!! (هذي انا اول ايام الملجة لوول)
– اذا كنتي انتي اللي عازمته اول ماتوصلون قولي للنادل (حلوة النادل لووول) 2person plz no-smoking
عاد بتلاقين بو الشباب مستانس على اللغة الفلتة اللي طالعة من شفايفج الحلوة .. واللي ماتبي تتحجى عنجليزي قولي بكل ذرابة وصوت هادي : بقينا طاولة لشخصين لوسمحت وامشي ورا زوجج بكل رقة وهدوء لاتركظين جدامه على بو انه انتي عازمته وصوت الكعب يشق الاذن … يعني باختصار كوني هااادية بكل شي (مشيتج..صوتج..حركاتج)

*طلب المنيو

الحين شي طبيعي اهو اللي بيطلب المنيو .. من توصل بطليها بهدوء وتصفحي بهدوء .. مو بسرعة بسرعة او بدفاشة ..

ويليت لو تختارين اول شي المقبلات تكون سلطة .. ولاتكون سلطة متروسة صلصة عشان لاتوصخين روحج ويصير في اشاياا بلايا على اطراف الشفايف واشياء تسييح وانتي طايحتله ماتدرين لووول .. بيكون منظرج وايد مغري طبعا خخخ

وبالنسبة للطبق الرئيسي حاولي تختارين شي خفيف حفاظا على الرشاقة .. يعني دايما خليج ذكية باختيارج
اختاري شي مشوي .. لاتنقين شي متروس دهن ولا متروس ثوم وبصل او صلصات
دايما الاشياء المشوية او الناشفة اهي الافضل ..

الحين لو اهو اللي عازمج .. نطريه لما يسالج عن اختيارج وقوليله لاتستعيلين او ماتقعدين تطلبين قبله . . مثل ماقلنا لاتنسين الهدووووء والروية بكل شي . .

ولو انتي عازمته : قوليله ها ياقلبي شنو بتطلب ؟؟ وحزتها خليه ينادي الناادل وطلبو ..

*النقطة الثانية

حطي المنديل او الكلنكسة الكبيرة على حظنج عشان لاتدمرين هدومج وتنقطين .. حزتها شكلج بيصير محرج والله

خصوصا لو نقطة زيت ولا كتشب لووو شنو ماتقدرين تمسحينها

* الحين عند وصول الطلب

مسكي شوكتج واكلي السلطة اول بعدين الطبق الرئيسي >>> بعلمكم شلون تاكلون بعد !!!!!!
لوول اتقشمر

المووهم ..

يفضل انج ماتكملين طبقج كله .. او بالاحرى راقبي اكلج وانتي تسولفين لأن عادة مع السوالف والاندماج بتالقين نفسج خلصتي الاطباق كلها والمسكين للحين يطالعج في وضع صدمة لووووووووووووول

ادري مو لهالدرجة .. بس والله جم مرة شفت حرمة تاكل وتسولف تاكل وتسولف والمسكين زوجها يطالعها وياكل بهدوء وهالشي يسبب الاكل الزايد طبعا ومن ثم ………. ايبوون الونش يشيلج لووول

* بالنسبة لادوات الاكل ..

– خلي دايما كلنكس زيادة يمج عشان لو صارت مصيبة تخفينها علطول من غير مايحس لووول ولاتقوليله وي طلعلي مادري شنو ولا طعم هالشي مقرف .. يعني لاتلوعين جبده خليه ياكل على راحته وانتي اكلي بهدوء

– بالنسبة للاطباق اذا طلبتو جم طبق لاتاكلين من كل شي بنفس القفشة..خلي عندج عالاقل قفشتين ..
وبالنسبة للسلطة ياكلونها بالشوكة .. لاتاكلينها بالقفشة !

واذا كان الطلب بيتزا قصيها بالنص .. وبعدين شيليها بيدج (ترا اتكيت البيتزا انها تنوكل باليد) يعني لاتعابلين بالشوكة والسجينة

واذا طالبين بطاط او الفرنش فرايز اكليها بايدج .. ترا ماتنوكل بالشوكة على فكرة ..
ويليت لو تاكلين حبة حبة … ياويلها اللي اشوف خمطة بيدها وتحطهم كلهم بحلجها .. تخيلي عاد منظر زوجج لج وانتي تسوين هالحركات
وبالصدفة تكون وحدة بالطاولة يمكم تاكل بقمة الانوثة والذرابة … عشان لاتبدي المقارنة ديري بالج >>>لازم اخرعكم شوي لوول

* لاتنسين وانتي تاكلين دايما دايما خلي حلجج مسكر
ترا احيانا ماننتبه على روحنا .. وأبد لاتسولفين وفي لقمة بحلجج ..بلعي اللقمة ويصير خير

* خليج مثبتة عاللي جدامج وبس ..

يعني عينج لاتلاقط يمين يسار ترا يصير شكلج مو حلو جدام ريلج
تكلمي مع زوجج وجنكم الوحيدين بالمطعم ومالج شغل منو يطالع ومنو يه ومنو دفع فاتورته ومنو راح
(اتركو الخلق للخالق) <<<<شعاري اليديد

* نيي للسوالف :

يليت لو في اي سالفة تظيق الخلق : احد مات احد مرض..بتزورين وحدة والدة مادري شصاير بولدها .. ولااخته سوت امه قالت .. او مناسبات ياية تبين نفنوف جنطة مصاريف اليهال اقساط البيت و..و..و… أجلي كللل شي يظيق خلقه وونسيه بالسوالف الحلوة

مافي مانع لو تتناقشون بامور المجمتع .. بامور مستقبلية شنو ودكم تسوون وين بخاطركم تسافرون
هالامور الحلوة تفتح النفس على الاكل وبالتالي زوجج بيستانس … ومرة عن مرة بتتكون عنده فكرة جدا ايجابية وحلوة عنج وانج فرفوشية بالطلعات وتونسينه .. وعشان ليطلع مع ربعه يقول (فديتها وفديت سوالفها ..) وبتلاقينه بروحه بيقولج بطلعج اليوم الفلاني

* خلصتو اكلكم؟؟؟؟
انزين لو يبي يحلي زوجج مافي مانع تحلين معاه .. لو مايبي طلبو الفاتورة

عاد اهم نقطة وقت الفاتورة ..

لو اهو اللي عازمج .. لاتطلين عالفاتورة لو شنو
انا من اول ماتزوجت ماحب اساله جم طلع العشا ولا جم دفعت .. مادري استحي بصراحة وأحسه من الاتيكيت انج ماتسالين اللي عازمج عن سعر الاكل ..
خلال هالوقت طلعي المطهر عقمي ايدج .. ولما يدفع يخلص عطيه يعقم ايده
وعقبها اشكريه وايد ومدحيه على حسن اخيتاره للمطعم و انج استانستي بقعدته معاج ومافي مانع من المبالغة .. خبركم الرياييل عشقهم موتهم المديح

ولو انتي اللي عازمته انتي اللي طلبي الفاتورة ويفضل لو تدفعين بالبطاقة يعني بالكي-نت
انا اذا عازمة احد احب ادفع بالكي نت احس منعا للاحراج وعشان لاتطلعين فلوسج وتحرجين اللي جدامج

وووووو بجذي خلصنا انشالله يكون الموضوع عجبكم

ادري الموضوع معروف للاغلبية بس حبيت انبه على شغلات انا لاحظتها برة ..

وعشان كلنا نكون ذربين وأمورين وحلوين جدام رياييلنا وعشان زوجج يقول ( ياحلوها حتى بأكلها سنعة )