عادات وتقاليد المجتمع الكويتي في الولادة!!!

مرحبا خواتي ….

بصراحة يمكن العنوان يحير شوي بس أنا كان هدفي من هذا الموضوع هو الاستفادة وعلشان تنوروني أكثر يمكن أكون انا عايشة بعالم ثاني وانا ماادري؟؟

اللي خلاني أثير هذا الموضوع هم حمواتي والخلاف اللي دخلنا فيه بموضوع الولادة وعادات وتقاليد مجتمعنا الكويتي واللي طبعا يتغير من سنة لي سنة وكل فترة نطلع بشغلات وصرعات جديدة بالولادة وتجهيزات الاستقبال والمولود اللي صاروا الحريم يتنافسون فيها ويتجاكرون .

أنا ما ودي اقول شنو اللي دار بينا ولا راح أبين وجهة نظري اللي كانت مختلفة عن وجهة نظرهم إلا بعد ما اعرف منكم بحكم تجاربكم بالولادة وتجهيزاتها لاني انا ليما الحين ما جربت هالشي واتمنى من ربي ما يحرمني ويرزقني بالذرية الصالحة عاجلا غير آجل ويرزق كل محروم.

بعد ما دار نقاشنا الحاد وطبعا كنت انا بروحي اللي مقتنعه بنظرتي وهم كلهم علي أو ضدي بالأصح ليما شككوني بنفسي وجنه انا مااعرف شي ولا عايشه بالدنيا.
حزتها قلت محد يقدر ينورني ويفيدني الا خواتي بنات منتدى كويتيات.

ادري طولتها وهي قصيرة … بس استفساري هو هل المره لما تصير نفاس وتسوي الاستقبال تلبس بدلة كشخه وتتمكيج وتسوي شعرها وتلبس ذهب ؟؟؟؟

هل يعقل ان المره الوالدة اللي لها أسبوع من ولادتها وحتى لو كان استقبالها بالبيت هل يعقل انها تلبس بدلة كشخة وتحط فل ميك اب والشعر والاكسسوارات والذهب وغيره …؟؟

أو انها كونها نفاس تلبس قميص ذرب وراقي حيل وطبعا يكون من أفضل النوعيات واللي يكون متماشي مع الكفر وباقي الديكوريشن والاكسسورات ملوت الاستقبال .. ويكون شكلها ناعم وبسيط والشعر نظيف ومسرح بشكل ناعم ومرتب والوجه بدون مكياج اذا في أول يومين واذا في ضرورة يكون المكياج خفيف وناعم.؟؟

بناااااات نوروني وفيدوني ؟؟ شنو الصح يمكن اكون انا ضايعه وصج ماادري الناس بالكويت شلون تكون استقبالاتهم ؟؟

الاستفسار هذا للكل من حضر وبدو ابي راي الاغلبيه وابي اعرف الشي الدارج والمتعارف عليه بالاستقبالات وهل فعلا الناس الراقيه واللي شايفه خير وعيال النعمه هم اللي يكشخون ببدل ومكياج وذهب والماس في نفايسهم ؟؟؟

ارجو الرد بأسرع وقت علشان تبرد جبدي بس

آسفه عالاطاله.. بانتطار ردودكم على أحر من الجمر .

بصراحة حبيبتي احنا عادة انسوي استقبال الولادة بالمستشفى يعني يومين طبعا نلبس قميص ناعم وراقي لان مهما كان انتي تكونين توج والدة ومالة داعي الخبة واللوية ويكون الكفر والكاكاو شغل مرتب ونفس الشيء باقي الاغراض وعندي كل ما صار الشيء ناعم ومرتب ومافي لويه يطلع احلى وطبعا هذا يرجع حق ذوق الوحدة
والله يرزقج ويرزق الجميع ويسهل علينا

انا مادري شنو اللي صاير الحين بس من وجهة نظري ماله داعي مكياج واايد و اذا لازم مكياج يكون خفيف

و احس ماله داعي الذهب !!

و اللبس اما قميص ناعم او دراعة بسيطة و ناعمة

انا وحده ولا مره رحت استقبال وشفت وحده حاطه مكياج وله لابسه الماس بس اكون الكفر كشخه وتكون متسبحه ولابسه قميص يديد وناعم والشعر مرتبته ومتبخره واغلب الاستقبالات تكون بالمستشفى , فاكيد بتحط ورد وشاي و قهوه وحلو وكاكاو المولود , و وحده اتيبها اتقدم .

والله انا امي الله يرحمها قالتلي بولادتي الاولى بلا استقبال بلا خرابيط لما ولدت بنتي كان عطلة وكنت فاتحة بيت اهلي لابسة من هالدراريع الساتان وكفري عادي من اللي بالسوق ماخبيت نفسي بشي وللي يبي اييني حياه الله ياخذ ككاوه ويشرب استكانته ويتوكل على الله وبس حتى حف مو حافة ولاشي اللهم شواربي لووووووووول ماقدرت اخليهم بصراحة وشعري رابطته حتى فيه نص صبغة بس… بس ليش الحين دوامات وانا كلية اللي يبي اييني بالويكند وبس اربعاء وخميس وجمعة عشان مدارس خواتي وجذي البيت موفاضي وليي مايبي ايي مايشوف شر والفلوس اللي اقطها على استقبال اخليهم حق سفرة ولا اغير غرفة نومي يعني شي يديد حقي انا وريلي نستانس فيه …

ولاشرايج

كل ماصار الشي بسيط ومرتب مو مبالغ فيه صار أرتب وبيض الوجهه هذي وجهت نظري

حلات الشي ببساطته وماله داعي الماكياج والذهب
قميص ناعم ستان ولفه دانتيل وكيسه البيبي حلوة ومرتبه وكان الله غفور رحيم

انا مو متزوجه..

ماعمري رحت لوحده والده غير امي وقبل 14 سنه

بس انا مع ان الوالده تلبس قميص ذرب وراقي حيل وطبعا يكون من أفضل النوعيات واللي يكون متماشي مع الكفر وباقي الديكوريشن والاكسسورات ملوت الاستقبال .. ويكون شكلها ناعم وبسيط والشعر نظيف ومسرح بشكل ناعم ومرتب والوجه بدون مكياج اذا في أول يومين واذا في ضرورة يكون المكياج خفيف وناعم…

وشكرا..

وفي يالغاليه احنا احيانا يكون في البيت والمستشفى فتكون الوالده لابسه قميص حلو وذرب وكشخه عادي اذا كانت رافعه شعرها بطريقه حلوه او نص شعرها واذا كانت لابسه قلب وتراجي ناعمين عااادي وطبعا هذا المفروض واصلا اذا كانت توها والده مايصير تلبس بدله ومكياج الناس راح تظحك عليها

اما الشي الثاني اهو ان اذا الوحده اطلعت من الاربعين وسولها استقبال هذا شي ثاني

(يعني انا لما طلعت من الاربعين حمولتي سوو حقي استقبال وقالوا حق كل اهلهم الي مايولي فلبست بدله مالت استقبال كشششخه كنت ماخذتها من انسام الخلف سويت شعري وكنت صابغته وحطيت مكياج كامل )

فالاستقبال يختلف اذا كان قبل الاربعين او بعده
وسوري طولت عليج

انا مع الشى البسيط والناعم حلات الوحده قميص كشخه وناعم ومن غير مكياج وذهب

أو انها كونها نفاس تلبس قميص ذرب وراقي حيل وطبعا يكون من أفضل النوعيات واللي يكون متماشي مع الكفر وباقي الديكوريشن والاكسسورات ملوت الاستقبال .. ويكون شكلها ناعم وبسيط والشعر نظيف ومسرح بشكل ناعم ومرتب والوجه بدون مكياج اذا في أول يومين واذا في ضرورة يكون المكياج خفيف وناعم.؟؟

انا معاج بهذا الصراحة انا لبست اول الايام نفنوف النفاس ناعم ودانتيل لانة كلة منسدحة بفراشي لما قدرت اقوم قمت البس دراعة حلوة واحط كحل لانة الصراحة ابي عقب النفاس اطلع وحدة ثانية

اذا بتمكيج بالنفاس والبس ذهب اجل شخليت حق طلعت النفاس ؟؟؟

حببيبتي حلاة الشئ ناااعم مثل ما قالوا البنات اذا كلش كلش كحييلة بس وشعرج رافعته ونظيفة وبس

صدقيني اللى تخب عمرها وهي توها ما صار لها اسبوع وتحط مكياج وتلبس ذهب ..

ماراح تسلم من شغلتين
1-عيون الناس شلون لها خلق وهي والده تسوي جذي …
2_التطنز …

والله يكفينا شر الثنتين

لا اختي الوحدة في النفاس ما تلبس بدلة ولا تتمكيج ولا اطقم ذهب
انا في استقبالي بالمستشفى لابسة قميص يناسب كفري و رافعة نص شعري بماشات كريستال ولابسة تراجي ناعمة مع ساعتي بس مو حاطة مكياج ولا شي
و لما خلصت الاربعين ببيت اهلي رحت عند حنان دشتي و تمكيجت و فصلتلي بدلة استقبال راقية و طبعا كنت صابغة شعري وطلعت وحدة ثانية و كنا مسوين عشا حق اللي مايالي استقبال المستشفى .

كلامج عدل