طريقه ادخال الاكل للبيبي + وصفات منالى 9 اشهر

وايد اشوف بنات بالقسم يسالون عن اكل اليهال من عمر 4 اشهر ، فقلت اسوي هالموضوع عشان يستفيدون.
اول شي اغلب الدكاتره ينصحون ان نبدي ندخل الاكل على نظام الطفل الغذائي من عمر 6 شهور، مو اقل، لان اكثر شي يحتاجه الطفل الرضيع بهالفتره اهوا الحليب.
طبعا ممكن نعطي اليهال الارز الجاهز اللي اهوا الميلوبا اذا صار 5 شهور،

و طريقته انه نخلطه مع الحليب، او الماي، في انواع من الميلوبا، الفواكهه و الخظار و العسل و القمح و الارز.

من يكمل 6 شهور نبدي نعطيه الاكل بالتدريج، بكميات قليله.
يعني اول مره نفوحله بطاطه و نهرسها بالخلاط مع شويه ماي عشان تصير ناعمه و نعطي البيبي،

و نشوف لي نهايه اليوم،و لازم نلاحظ اذا في هالبوادر (احمرار، نفر، ترجيع، اسهال)

، اذا كانت موجوده لا تعطين البيبي هالصنف مره ثانيه.
ثاني يوم كوسا، او جزر، او قرع، بروكلي او زهره او بطاطا حلوه، اذا تأكدنا ان الياهل ما حسس من هالاصناف، نبدي نخلط هالخظار ويا بعض، مثل كوسا و بطاط، قرع و بروكلي، بطاطا حلوه و بروكلي، جزر و بطاط و كوسا، و لج حريه الاختيار، صنفين الى 3 اصناف.

الطريقه: تغسلين الخظار و تقشرينهم و تقطعينهم و تحطينهم بجدر صغير، تغمرينهم بالماي، بعدين تفوحينهم، لما يستوون، حطيهم بخلاط اليهال، (انا انصح بخلاط موليناكس اسمه بيي شيف، وااايد زين و استعماله حلو)

و تخلطينهم ويا بعض، ممكن تضيفين شويه ماي الفوح، عشان توصلين للكثافه اللي تبينها.
تقدرين تفوحين مع الخظار عيش، بس غسليه بالاول و نقعيه بالماي الدافي نص ساعه، بعدين حطيه مع الخظار بالجدر و فوحيهم الى ما يستوون، بعدين بالخلاط.
طبعا هالوجبات اللي تدش فيها الخظار، افضل تعطينهم اليهال كوجبه غدا، و الحين بحط الوصفات اللي تناسب الغدا:
1-عيش و عدس
المكونات: شويه عيش مغسول و منقوع نص ساعه بماي دافي
قفشتين الى 3 قفشات عدس
قطعه قرع مقشر و مقطع
الطريقه: حطي كل المكونات بجدر صغير و فوحيهم، و لما يستوي العيش و القرع حطيهم بالخلاط، و مثل ما قلت تقدرين تزيدين ماي عليهم.

2- خظار بالشوفان (الكويكر)
المقادير: بطاطه مقشره و مقطعه
كوسا مقشره و مقطعه
جزره مقشره و مقطعه
2 ملعقه شوفان
الطريقه: تفوحين الخظار لما يستوون، بعدين تاخذين الشوفان بجدر صغير و تحطين ماي لين توصلين الكثافه اللي تبينها، و تطبخينه على نار متوسطه، لما تحسين بالشوفان استوى، بس انتبهي لا يحترق، عقب حطيهم كلهم بالخلاط.

3-بطاط حلوه بالسبانخ و الارز
المقادير: بطاط حلوه مقشره و مقطعه
سبانخ (اذا طازجه تكفيج 7-10 ورقات سبانخ، لان ورقه السبانخ كبيره شوي، مغسوله عدل، اما اذا تستخدمين مجمده بشكل قالب، قصي قطعه كبر كف اليد بالسجين، واذا كانت مجمده بشكل كور اخذي3- 4 كور، و ترا المجمده تقريبا فيها فيتامينات كثر الطازجه)
شويه عيش مغسول و منقوع بماي دافي نص ساعه
الطريقه: تحطين البطاطا و العيش بجدر و تفوحينهم بماي طبعا، لما يستوون تحطينهم بالخلاط و تضيفين عليهم السبانخ الطازجه، اما اذا استخدمتي المثلجه، حطي البطاط و العيش و السبانخ و فوحيهم بعدين لما يستوون حطيهم بالخلاط.
(تقدرين تغيرين من العيش الى الشوفان)

4- شوربه الخظار: (من كتاب الدكتوره ريم)
المقادير: بطاطه مقشره و مقطعه
كوسا مقشره و مقطعه
جزره مقشره و مقطعه
ملعقه شوفان
الطريقه: تفوحين الخظار لما يستون ، بعدين تاخذينهم مع مايهم و تخلطينهم بالخلاط، و عقب ردي الخليط بالجدر و ضيفي الشوفان لمده 3 دقايق، و قدميه.
______________________________________________

خلصنا من وجبه الغدا، الحين وجبه العصر او المغرب او العشا، انتي حددي الوقت اللي تبين تعطين فيه البيبي هالوجبه، المهم انها ما تكون قبل نومه بالليل مباشره، لان قبل نومه بالليل افضل شي تكون الوجبه اهيا الحليب.
طبعا بهالوجبه بنركز على الفواكهه و تكون بنفس الطريقه، صنف واحد و تشوفين رده فعل البيبي، بعدين تبدين تخلطين نوعين او 3 انواع، و لج حريه الاختيار اذا تبين تقدمين الفاكهه فرش او مطبوخه، مثلا التفاحه، قشريها و قطعيها، الطريقه الاولى تحطينها بالخلاط مع شويه ماي، الطريقه الثانيه تطبخينها بشويه ماي بحيث انه الماي يغطي قطع التفاح ببصبع واحد بس و تفوحينها لمده 5-10 دقايق، و بعدين تحطينها بالخلاط و ممكن تضيفين شويه من ماي الفوح، و هالشي ينطبق على باجي الفواكهه: عرموط، تمر، مشمش، موز.
والحين هذي الوصفات:
1- التمر مع التفاح بالدارسين (هالوصفه من كتاب الدكتوره ريم بس انا مغيره شوي)

المكونات: تمر 5 حبات بدون النوى
(اهي حاطه بالكتاب 3 حبات بس انا احب ازيدهم)
تفاحه مقشره و مقطعه
ملعقه صغيره حليب بودر الاطفال
رشه صغيره دارسين ( بطرف القفشه)
الطريقه: تحطين التفاح بجدر مع شويه ماي و تخلينه يغلى على النار، بعدين تضيفين التمر و لما تحسينه ذاب طفي النار و حطي كل المكونات بالخلاط، و ضيفي عليهم قفشه الحليب و رشه الدارسين و خلطيهم.
(ساعات اذا ما عندي تفاح احط عرموط و تقريبا نفس الطعم)

2- الموز بالشوفان
المكونات: موزه مقشره و مقطعه
2 ملعقه شوفان
ملعقتين عصير برتقال
الطريقه: تحطين الشوفان بجدر و تضيفين ماي لما توصلين الكثافه المطلوبه (يعني يصيرر مثل كثافه السيريلاك)، و تحطين فوقه الموز و تطبخينه ما ياخذ 5 دقايق بعدين حطيهم بالخلاط مع عصير البرتقال و خلطيهم.

3- الروب بالموز و المشمش المجفف
المقادير: 4 ملاعق كبيره روب
موزه مقشره و مقطعه
حبتين مشمش مجفف منقوع بماي دافي لمده نص ساعه، (تقدرين تستبدلين المشمش بالكشمش)
الطريقه: تخلطين كل المكونات الخلاط.

4- العرموط مع الجبن و البسكوت (من كتاب الدكتوره ريم)
المقادير : عرموطه مقشره و مقطعه
جبن كيري قطعه
بسكوت اليهال انا استخدم ماركه ميلوبا، و احط 5 قطع
الطريق: تخلطين كل المكونات بالخلاط، تقدرين تضيفين ماي لما توصلين الكثافه اللي تبين.

الحين دور الدياي و اللحم، طبعا وايد ناس يعطيون اليهال الدياي و اللحم من السادس، و حتى بكتاب الدكتوره ريم، حاطه دياي و لحم لاكلات البيبي ابتداء من 6-9، بس انا بديت من نهايه السابع.
تقدرون على نفس الوصفات اللي حاطتهم بقسم الغدا، تضيفون الدياي او اللحم، يعني لما تحطين الاكله بالخلاط، قصي نتفه ديايه من غداكم، سواء من الصدر او الفخذ، و حطيها بالخلاط، و نفس الشي قطعه لحم من غداكم بس لا يكون فيه شحم.
و هذي وصفات اللحم و الدياي، تقدرون مره تسوون الوصفه باللحم و نفس الوصفه تردون تسوونها بالدياي: (هالوصفتين من كتاب الدكتوره ريم)

1- الدجاج بالسبانخ و البطاط
المكونات: 50 غ دجاج بدون جلد و عظم
225 غ سبانخ
بطاطا مقشره و مقطعه
الطريقه: يغلى الدجاج في 120 مل ماء مع روقه غار لا يستوي، عدين شيلي ورقه الغار، و حطي السبانخ و البطاط و طبخيه 25 دقيقه، عقب حطيهم بالخلاط.

2- اللحم مع الطماط و البطاط
المكونات: 50 غ لحم احمر خالي من الدهن و العظم
بطاطه مقشره و مقطعه
طماطه مقشره
ملعقه حليب اطفال بودر
الطريقه: تفوحين البطاطه لمه تستوي، عقب تحطينها بالخلاط مع الحليب، بعدين نضيف الطماطه، تفوحين قطعه اللحم لما تستوي، تضيفينها على خليط الطماط و البطاط.
___________________________________________
• اول الايام لما تعطين البيبي الاكل، راح يكون شي يديد عليه، فانتي قعدي معاه بروحكم بمكان هادي صكي التلفزيون، و راقبي تعابيره، و شوفي رده فعله، راح تتحمسين تطبخيله كل يوم.

• استخدمي القفاش المطاطيه مالت اليهال، موجودين اب مذركير، و كل محلات اليهال، لا تستخدموين القفاش العاديه الحديد.