شوفوا السالفة اللي صارت لنا انا وزوجي

اكيد البعض قرى ازمتي بسبب سفر خدامتي المفاجئ ،، عاد ذاك اليوم قاعده احوس ابقسم تبادل الخبرات والتجارب جان القى موضوع فيه ارقام تلفونات لمكتب حاطين اعلانه ابجريدة 808080 انهم اييبون خدم بعقود اسبوعية او شهرية ودوامهم نص دوام
عاد انا استانست خذيت الرقم وعطيته لزوجي عشان يكلم المكتب

زوجي كلم المكتب ورد عليه كويتي يقولي كل شوي يقولي كلمة مرة عندنا مرة ما عندنا مرة ما ادري شنو
جان زوجي يقوله عطني مكانكم وانا ايي اشوف ،، جان يقوله الكويتي بالمكان الفلاني العمارة الفلانية على البحر

ثاني يوم زوجي دق بيسأل عن الجنسيات قبل لا نطق الطريج ونروح
جان يرد عليه مصري
قاله زوجي امس الكويتي اللي معاك قالي كذا وكذا ومكانكم كذا عندكم سيلانيات ؟؟ او هنديات ؟؟
جان يقوله اخذ الكلام مني انا اصلا احنا ما معانا كويتيين ومكانا ما يصير احد ايي يشوفه
قاله زوجي ليش بالله ما يصير ؟؟؟
قاله بس قولنا المواصفات بالتلفون والطلبات واحنا نوصلها عندك لي البيت
قاله زوجي انزين نبي نشوف اشكالهم شدرانا شنو شكلها اللي بتيوبونها عندنا ؟؟
جان يقوله المصري اطمنك وحده احلى من الثانية وخدمتهم فندقية
والمكان خاص فينا ومحد ايي يشوف اللي عندنا ،،

عاد زوجي اعتمد على كلام الكويتي لما قاله عن المكان ،، فسأل المصري مكتبكم من الساعة جم لي جم يفتح ؟؟؟
قاله من 8 إلى ال10 وشي بالليل
عاد لما قالي زوجي قلت له انا خبري المكاتب تسكر 8 هذول يفتحون 8 ؟؟؟؟؟
جان يقولي لا واطمنج يقولي خود الكلام مني وحده احلى من التنية

لووووول

عاد امس زوجي راح للعمارة اللي قال عنها الكويتي اللي كلمه اول مرة ( مع العلم المصري اول شي انكر انه يعرف الكويتي بعدين قال اي نسيت نسيت اعرفه )

يقولي ولا لقيت المكتب
يقولي ينيت وانا ادور عاد ماشالله زوجي ما يبقى داعوس ما يدله اسم الله عليه يعني مو نوعه غشيم ما يدل ولا ما يعرف ،، يقول لما ما ليقت ابهالعمارة قمت ادور بالعمارات اللي يمها ،، وقام يسأل ملوت الامن يقول قام يضحكون علي يقولون لي سمعت عن مكاتب خدم على البحر ؟؟؟؟؟
لا والمشكلة ان العمارة اللي قال عنها الكويتي لما دخلها زوجي يقولي مشبوهة كلها مكاتب صغيرة مطرفة بيبانها وشكلهم يخرع

عاد اخر شي قلت له خلني اكرف ولا ادخل بيتي اشكال مشبوهة اشكالهم تخرع وسالفتهم مشكوك فيها استغفرالله

القهر شلون حاطين بالجريدة هالأرقام
لا والاخ يقول لزوجي وحده احلى من الثانية وخدمتهم خدمة فنادق واذا يوا 3 مرات بالاسبوع من 4 العصر لي 9 بالليل نعطيهم 25 دينار ،، واذا يوا بشكل يومي من 4 الى ال9 نعطيهم 50 دينار بالأسبوع الواحد

بنات ديروا بالكم اذا انزءتوا نفسي بسوالف الخدم لا تاخذون الا من اماكن ثقة
هالمكان اللي سألنا عنه شكله ما وراه الا خراب البيوت