شنو يعجبه الزوج بالزوجـه !! و شنو يهمـه أكثـر شي!! والحياة مثل الأفلام!! تعالو ياخبره

في وايد مفاهيم للحياه الزوجيه

بعضها يميل للخطأ لكنه ينجح !!
وبعضها يميل للصح لكنه يفشل !!

وبعضها يكون بين الصح والخطأ ويكون مرن ممكن انج تغيرين فيه مع تغير الزمن والوقت وهذا الناجح

—

انا بقولج رايي الشخصي

الزواج حياه مشتركه بين اثنين ( ذكر وانثى ) بدون ما ادش بالمستقبل بتكلم عن الحاضر

الذكر انسان عملي وجامد .. على ماعودتيه يسويلج
واكيد بما ان جامد فيبي منج العاطفه

انا ما اقول قعدي 24 ساعه لامته بس العاطفه تطلع حتى بنبره صوتج

وبنفس الوقت اللي اهو بحاجه فيه للعاطفه يبي يفرض سيطرته وشخصيته .. مثل الاسد باختصار

والانثى
عندها عاطفه جياااااااااشه << ركزي عليها متعوب عليها ترى لووووووووول
بس تبي الامان واللي غالبا تلاقيه بقوه شخصيه ريلها وحكمته واكيد صدره الوسيع لها

—

بعد قلبي

انا لو بقعد اقولج من اليوم لي باجر سوي ولا تسوين بكون غلطانه
لاني انا ماعرف شخصيه ريلج وشنو يحب وشنو مايحب

انتي اللي تعرفين هالشي

انا بقولج نقاط واتمنى تستفيدين منهم ..

1- ريلج على ماتعودينــه ..
سبق وقلت بموضوع من المواضيع ان الريال لما يدش بالحياه الزوجيه يختلف اختلاف كلي عن حياته العاديه لان داش حياه يديده
مايدري شنو المسموح وشنو الممنوع فيها فانتي تصرحين له بهالشي
واكيد من هالمنطق بتحددون اسلوب تفاهم حلو بينكم وبين بعض

مثلا تعودينه على السكوت في لحظات الغضب ليما كل واحد يهدى ويشرح موقفه للثاني
او مثلا تعودينه انج تنومينه انتي كل يوم
او مثلا تعودينه انج انتي اللي توكلينه بايدج
او تعودينه على ريحه معينه لكل وقت من اليوم

يعني السوالف الانثويه هذي
وطبعا بخصوص التعامل افضل ان تعاملكم يكون بـ كل احترام وتقدير وبنفس الوقت يغلبه التفاهم والحب
عشان باجر الحياه تمشي مع ضغوطاتها

ادري يمكن انتي تقولين شنو هالحياه الخياليه او البعض يقولون
بس ترى مو حياه مستحيله خاصه اذا ريلج انسان متفهم ووعارف الوضع

وبالنسبه للدراسه مافيها اي شي لادرستي ببيتج بس مثلا خلج معاه بالصاله قاعده او اذا كان بغرفه النوم خلج معاه
وافضل انج تكونين دارسه بوقت غيابه عن البيت ولما يرجع تبتدين تراجعين بس

اما بالنسبه للي يحبه واللي مايحبه

1- اكيد الريال يحب المرا بجميع شخصياتها
مايحب المرا اللي على طول دلوعه
اواللي على طول عبيطه
او اللي على طول دفشه
حلاتج تكونين مزيج من كل شي وكل شخصيه تطلعينها بوقتها المناسب
وقت العبط للعبط ووقت الضحك للضحك ووقت الجد للجد ووقت الدلع للدلع
والاكيد طبعا يحب المرا اللي توقف معاه

2- يحب المرا القنوعه
شوفي في ناس مايفرقون بين القناعه وبين الغباء

انا ماقولج صيري قنوعه يعني لاتشترين ولا تسوين ولا تفعلين

لالا سوي
بس بنفس الوقت حسسي ريلج ان لو اهو متوهق مثلا او مايقدر يسوي هالشي انتي اول وحده بتوقفين معاه
خلج له سند عشان يصير لج ذخر

3- اللسان الطويل هذا عامل كللش ما احبه بالعلاقه الزوجيه لان سبب رئيسي في تدمير اي شي حلو بالبيت فكلش ابتعدي عنه وطبعا اختيار الالفاظ جدا مهم

4- حبيه يحبج
حني عليه يحن عليج
عامليه بدلع يعاملج بدلع
الريال مثل ماتعطينه يعطيج
يمكن اهو عنده الدلع بس مستحي يدلعج
انتي لادلعتيه جنج تشجعينه انه يدلعج

5- اذا طلبتج للفراش لاتقولين لا لو شنو كان
الفراش مو مكياج وقميص نوم وعطر
الفراش احساس
خلج معاه باحساسج وقت الفراش وبتشوفين اللي يسرج لان لو بالج مشغول صدقيني هذا اكثر شي بيضايقه وبيخليه مو مرتاح خاصه اذا حس انج مو مستمتعه

6- وحياتي الحياه الزوجيه مشاركه
شاركيه بكل مشاكلج وكل شي يصير وياج
انا ادري في ناس يقولون الريال ماينقال له كل شي
بس ليش

اذا انا ماففضفضت حق ريلي واعتبرته غريب .. لا الوم نفسي باجر لا صد عني بكل سهوله !!

بالعكس اخليه اقرب قريب ويشاركني بمشاكلي وكل شي يواجهني اصلا محد بيدور مصلحتي غيره

7- ساعات بتشوفينه متضايق
خليه ولاتسالينه كل شوي شفيك
عوديه اهو ايي لج ويفضفض لج بتقولين شلون بقولج عطيه حنان وحب وحسسيه انج اكثر وحده تخاف على مصلحته وتبي له الخير

8- الريال يوم تزوج مو معناته ان انفصل عن حياته الخارجيه ممكن تتفقين معاه على وقت معين يرجع فيه من الدوانيه اذا كل يوم يروح
او على يوم واحد بالويك اند يكون فيه مع ربعه طول اليوم
خليه يغير جو عشان نفسيته تتعدل لاتنسين هم اهو يداوم وضضغط وحاله فلازم يبيله استجمام

9- اذا ريلج على قده لاتضغطين عليه
الزواج مو بس رزه ومظهر الحياه الزوجيه مضمون
طول ما مضمونج حلو وفيه تفاهم صدقيني ماكو شي يخليج تنهمين وتتضايقين

10- لاتحسسين ريلج انه مو قد المسؤوليه وان مايقدر يصرف عليج
اذا صاده ضيق بالماده قولي له رب العالمين بيرزقنا والرزق من عنده ليش تتضايق
عطيه شوي تفاؤل مع ابتسامه صغيره منج تهدي باله وتطمنه لان في هالحاله اهو شغله الشاغل يكون ان خايف يقصر عليج بشي
انتي فهميه انج راضيه فيه حتى بتفصيره وهدي سره

11- وحبيبتي

بين الريال ومرته ماكو شي اسمه كرامه لانهم باختصار شخص واحد
ولا اكو شي اسمه مذله

اذا ذليتيه بيذلج
واذا حسستيه انه مو كفو بيحتقرج
واذا اهنتيه بيهينج

يعني لاتتوقعين ان اكو واحد هان مرته بدون سبب اكيد في شي من صوبها
واللي تقولج لا واهو الغلطان تاكدي دايم ان المرا مهما قالت سرها لغيرها فاكيد انها محتفظه بجانب اكبر من هالسر داخلها ومو مخليه احد يعرفه

12- بالنسبه لاهل زوجج كلش لاتحسسينه ان اكو مشاكل بينكم حتى لو كان بالصج في
اذا سالج مثلا شفيج مع فلانه قولي ماكو شي اليوم قاعدين نسولف
العيبه لاتطلع منج على اهله ديري بالج ولاتشتكين منهم عنده
حاولي تحلين مشاكلج معاهم او بطريقه غير مباشره عن طريقه اهو

13- بالنسبه لمشاكلج معاه
تاكدي حبي ان ماكو اي علاقه مع اي مخلوق مهما كان مافيها مشاكل
سواء بين البنت والام او البنت والريل اوالبنت والابو لازم اكو مشاكل
اللي بنصحج فيه تعلمي تحصرين مشاكلج معاه بدون ما احد يدري مهما كبرت المشكله لاتوصلينها لاهلج الا للضروره القصوى ودايم فكري لواني فكرت المشكله الاهلي وبعدين رديت لريلي شنو بتكون نظرتهم له !
وثانياً علميه انكم تحلون مشاكلكم بكل هدوء .. مو شرط نحل مشاكلنا بصراخ وهواش وطق ممكن كل واحد يقول رايه وقناعته والثاني يرد عليه يا اما يتنازل واحد منهم او الاثنين يوصلون لحل وسط

طبعا هذا كله اذا كان الزوج يحبج وشاريج وتحسين انه كفو ويستاهل

وبس قفلت ان شاء الله لاذكرت شي اكثر اكتبه لج