|
|
شلونكم امهات …
و شخباركم … عساكم بخير …
أمهات …
أكيد كل انسان له عاده لايمكن يغيرها او خل نقول تعود عليها و صعب يغيرها …
و أكيد كل انسان له رد فعل معين في حالة الغضب و في حالة الفرح …
و اكيد بعد كل انسان له طقوس معينه يسويها قبل لا ينام … او قبل لا ياكل .. او اثناء الاكل …
و اكيد … كل ام و كل اب عياله يحبون يقلدونه …
بالشغلات الزينه و الشغلات الشينه …
شرايكم تقولولنا عن هالعادات و هالحركات …
اذا كانت زينه شلون نميتوها و ثبتوها و خليتوها عاده في اطفالكم من شن معينه …
و اذا كانت شينه شلون قدرتو تقطعونها او تخففونها …
بالنسبه لي …
عيالي يقلدون ابوهم بالعصبيه الزايده ….
ابوهم حيل حيل عصبي … و احس أني صرت عصبيه مثله و متنرفزه …
حتى بنتي لمن تتناجر مع اخوانها تقول نفس الكلام اللي اقوله ….
و من العادات اللي حسيت خذوها مني
ان لمن انام أغطي كل جسمي إلا الاقدام …
الحين عيالي جذي لمن ينامون لازم رجولهم طالعه !!!
زوجي ما يعرف ينام الا على التلفزيون …
اكتشفت ان ولدي الكبير ما يقدر ينام الا على التلفزيون …
يعني عالأخبار .. اهم شي احد يقرق عليه .. بس شوي شوي عودته يغير هالعاده الغير صحيه …
آنا و بالرغم من اني مصابه بالسكر ..
أمووووووت على الحلاو … و الكاكاو…
يعني هوايه الحلاو الجلي و الحلاو الطويل و اللي حاااامض ..
سويت فاكتوري هذا غرامي ..
عيالي صار عندهم عادي هالحلاو من كثر ما اشتري منه و آكل … يعني تواجده بالبيت مضمون و حتى بالسفر لازم أكون ماخذه منه و لازم أشضتري من الديره اللي رايحتلها هالحلاو ..
و أحسن عيالي صارو مدمنين حلاو و كاكاو مثلي …
بنتي … تحب الحيوانات مثلي …
ولدي … تعود من ابوه حب السيارات يعني من كثر ما يتابع زوجي السيارات و يشوفها و يروح الوكالات .. ولدي صار نفسه …
كل عيالي تعودو مني و من ابوهم عادة أن أول ما يقعدون من النوم ما ياكلون الريوق على طول لازم اول شاي ..
هاذا آنا و أبوهم جذي .. الريوق بعد الشاي و القهوه مو قبل …
ولدي سبحان الله ما يحب الكاتشب … طالع على عمه مستحيل ياكل كتشب…
بنتي طالعه على جدتهاام أبوها ما تحب الجبن ..
ولدي الصغير ما يعرف ينام إلا اذا غطى راسه بفوطه نفس جده !!
بنتي ما تاكل السانويش على طول .. لازم تقطعها و بعدين تاكلها . تعلمن هالعاده من جدتها أم زوجي
…
ولدي تعلم من أبوه ياكل صمون بطاط لوووووول
يالله بنات كل وحده
تحط مشاركتها … .gif "Eh S(8)")
لاننا سبحان الله نلقي عيالنا يشبهونا حتى بالاطباع مو بس شكل وملامح
انا احب اكل البارد مزاجى جذيه مااحب اكل مرق البطاط الا بارد وسبحان الله بناتى ماياكلونه الا بارد وعندى وحده من بناتى مسوسه وتحب تاخذ ادويه واتحب اتروح الطبيب والكل مستغرب بس اللى يعرف ابوها مايستغرب لان ابوها يموت على الادويه والطبيب وسواس ياكافي
بنتى الصغيره تبين اتقعدينها من النوم غطى اريولها تقعد على طول وهذى طبعا منى لانى مااواطن شي ينحط على ريولى تلقين متغطيه بس ريولى مكشوفه
بنتى الكبيره تموت على الاكترونيات نفس ابوها والثانيه صوتها دايم عالى وحنانه واتحب شغلات الصبيان نفسي بالضبط يوم كنت ياهل سبحان الله حتى طريقة كلامها وه ياحلاتى انا وجيناتى الوراثيه ههههههههههههههه
بس اكثر شي يضحك فى بناتى ان الوحده منهم لاضحكت جنها ضحكتى بالضبط حتى الصغيرونه تضحك مثل ضحكتى فدايم اهلى يعلقون على ضحك بناتى
الله يخلي لى ويخلي لج ياذهبيه ويكتب لنا وللجميع برهم ويعينا على تربيتهم
الحركات اللي زي ابوه العصبيه وحركه يسويها ابوه بحاجبه ولدي يسوي نفسه
الاشياء اللي مني انا ان اذا خفت او استحيت من احد اضحك ولدي زيي لما يخاف من شي يضحك ضحكه الخوف واذا استحى ضحكه غير نفسي وبعد اذا عصبت او بغيت شي اضرب رجلي بالارض ولدي يسوي نفسي مع انه سواها قبل لا يشوفني اسويها يعني مو قلدني لكن صار نفس الطبع فيه انا نومي مررررررررررره صعب واضرب رجلي بالارض وارفس برجولي قبل انام كثيييييييير صار ولدي نفسي
الله يحفظهم يارب ….
هالحركة حيل تضحكني 
ولدي الكبير حيل وسواسي نظافة مثلي بالضبط … و تلوع جبده من كل شي … و لما ينام لازم إيده تحت خده
ولدي الثاني نسخة ولد عمه بالطبع و الحركات و السوالف … حتى النومة ينامون مثل القنفذ يتكور و ينام
بنتي حركاتها مثل أبوها و عمامها لما يشوفون أمهم لازم يبوسونها … فهي لازم تبوس ابوها لما يقعد من النوم