شنو احسن مستشفى الصباح ولا العدان

شلونكم بنات

بنات ابيكم تساعدوني شنو احسن الصباح ولا العدان ويصير اذا طلبت عمليه القصريه يسوونها ولا لا بليز ساعدوني

أنا جربت الصباح ببجري الولاده للأمانه ماحسيت بشئ بس العنايه مو شئ ..والعدان إختي والدة عندهم تقول متسنعيــن..

انا جربت الصباح مرتين
اهيه زينة بس يبيلج واسطة وترى الخياط لج عليه يعني يخيطون الي شقوه بسسسسسسسس
واذا طلبتي قيصري مو بكيفج ابدا اهمة يقررون حتى لو تقعدين تطلقين جم يوم عادي عندهم بس اذا شافو البيبي تعبان لا سمح الله اكيد بيولدونج قيصري

مشكورين حبيايبي على الردودكم يعني مستشفى العدان احسن من الصباح

هلا حبيبتى تونى كنت بزور رفيجتى بالعدان من يومين ماشاء الله تمدحهم حيلل وصج فى عنايه من الطبيبة والسسترات كل شوي يمررون ومعاملتهم حلووةوبخصوص الخياط نظيفه وماتبين اما انج تختارين قيصرى هذا مو بكيفج ما يقدرون يولدونج قيصرى الا اذا كانت حالتج طالبه جذى لانهم يفضلون وراج بالتحاميل كمحاولات انهم يولدونج طبيعى اذا فى اى مشاكل لج او الجنين بيسوون قيصرى وبيكون تحت اشراف الاستشارى هذا اللى اعرف من رفيجتى

تسلمين ياقلبي طمنتيني اتوكل على الله واروح العدان

بصراحة انا زايرة وحدة والدة بالعدان تقول ان عنايتهم صايرة زينه..
وصار في اهتمام..وقالت انهم عطوها ابرة في الظهر..
وسامعة وايد ان عنايتهم صارت احسن من اكثر من وحدة..
والله يسهل عليج ان شاء الله……

والله لو أموووووت ما أولد بالعدان أو الصباح
يخرعوووون
لا خيااااط سنع
لا عناية سنعة
و فوق هذا ما يخلون أحد من أهلج يوقف معاج لإن المستشفياات الخاصة يخلون أهلج مثلا زوجج أو أمج أو إختج يقعدون عندج و إذا قربت الولادة يسئلوونج تبينهم يقعدوون عندج أو لأ؟
طبعا أنا لأ ما أحب أحد يوقف عندي …. بس حلو لما أحد يوقف معاج قبل الولادة
بصراحة لو أحط قرض على ظهري بس ما أولد بالحكووومي

و تولدين و تقومين بالسلاااااااااامة حلو ة

السلام عليكم ورحمة الله وبركاته

انا ولدت ثلاث مرات وكلهم قيصري طبعا مو بكيفي
الاولى بالراشد الثانية بلندن الثالة بالعدان
والله العظيم احسن عملية اللي بالعدان
وهذا طبعا من اكثر من سنة وكانت ولادة مبكرة وما شاء الله نظامهم وايد حلو سواء لي او للبيبي ..

والحين يقولون المبنى جديد وحلو …
الخاص بالولادة ..

والله يسهل لش ان شاء الله
بس دخول المستشفى حسب العنوان اذا تابعة للمنطقة تروحين اذا لأ ما يدخلونش يحولونش لمنطقتش … …

تسلمون حبيباتي انا منطقتي بالعدان يصير … حبيبتي مى الحلوة ابرة الظهر عطوج اياها ولاده طبيعية ولا قيصريه

حبيبتى ..رفيجتى اللى ولدت بالعدان عطوها ابرة الظهررر وهي والدة طبيعي..
بس اذا جربت العدان ان شاء الله اقولج..بس صراااحة انا اخاف من ابرة الظهرررر..

والله تطوروا العدااااااان اشوف اهني الاغلبية يمدحونه زين والله ان شاء الله يكون صج تغيروااا لانهم كانوا لوعه

الصباح كولاده ممتازه بس عاد الغرف عقب الولاده تسد النفس