شلون كانت حصة النشاط ووضع المدرسة اليوم؟

طبعاً اليوم كل المدارس حاشها حصة النشاط. احنا كانت بعد الحصة الخامسة. الله وكيلكم بنات

بعد ما خلصت الحصة الخامسة سمعنا الاذاعة والابلة تنادي البنات يوقفون طابور بالساحة. ولا تشوفين الازعاج واااااي

يمكن قعدنا نص ساعة علشان نوقفهم. البنات صايرين أشطن من الصبيان يصفقون والي تررقص وتغني والي يايبة بطاط

وككاو وبفك وعصير امبي والشمس بعز القايلة زين ما يصير فيج ضربة شمس. المهم طبعا مدرستنا ما تدري عن هالقرار

الا الصبح واكيد كل المدارس اتوقع توهقت وما مداها تقسم كل صف له نشاط معين. فتعالوا شوفوا اللخطبة والازعاج

كل شوي بنت داشة القسم. ابلة ابي نشاط كذا والي مجموعات بنات اييون يدشون القسم يقولون لي:

ابلة منال القلب بأي نشاط؟ أقولهم انا مو معطيني نشاط جان يقولون خلاص مانبي نسجل بأي نشاط..

بعدها الناظرة دشت علينا تقول مابي أي طالبة مو جودة برا الصفوف واذا ما يبون يسجلون راح نحط اسماءهم غصب طيب

عنهم. ومرت هالساعة مثل السنة والكل ضايع وفوضة وازعاج…….. مساكين المدرسات بدون استثناء تعبوا تعب

ودي مويضي تمر المدارس يوم الثلاثا وتشوف قراراها شسوى بالمدارس

احنا بما انا في قسم العربي عندنا انشطة وايد مثل:

خط الرقعة وفيه ابلتين

الصحافة وفيه ابلتين

المسرح وفيه ابلتين

الشعر العربي وفيه أبلتين

الإذاعة وتديره ابلة

انا ما نادوني ولا عطوني أي نشاط

وقلت احسن بعد فكة بس والله كسروا خاطري كل الابلات لانهم تعبوا اليوم
طبعا بعد ما طلعنا الساعة 2:00 امبيييييييييييي زحمة زحمة واااااااااااي دمعت وانا بالسيارة قلت خلاص ما راح اوصل

البيت اليوم الا مع اذان العصر… وعلى ما طلعت من الزحمة ووصلت بيتنا كانت الساعة 2:55 حاسبتها بالدقيقة

امبي كل ثلاثا بيصير جذي راح يصير فيني شي اكيد

وانتوا بنات شلون كان اليوم وياكم؟ ازعاج؟ عادي؟

ما أقول الا حسبي الله ونعم الوكيل حسبي الله ونعم الوكيل حوبة المدرسات والمدرسين ما راح تتعدى هالوزارة الي تطبق

أشد العقوبات على المعلم