شسالفة الطق فى المدارس!!!

ولدى اولى ابتدائى يوميا يشكى من جميع المدرسات يطقونه! وجميع من بالصف معاه!ويوميا !

يطقونهم لما يبجون!بجميع الوسائل !بالعصا ..بالكتب ..على روسهم..بالدز.. اللى تبون ب

الشتم !!

والله احترت معاهم …كلمت الابلات …الوكيلات …ماكو فايده ..ولدى يكره المدرسه ويروح بالغصب..

الله يعينج حبيبتي

شوفي .. روحي للناظرة .. وقولي لهاأنا رايحة مراقب الابتدائي ..

وإن قدرتي جمعي جم ولية أمر وياج ولدها ينطق ..

ودشوا على الناظرة .. خلوها تدري شنو يصير

وتالي روحوا للمراقب … والله ينفضهم لج نفض

احنا سوتها عندنا ولية أمر .. ومراقبنا الابنتدائية مهدي العجمي .. فاتح بابه للكل

اهو بنفسه حضر مدرستنا .. ومصخر الاداره .. عشان أبلة مصرية طاقة بنية بأولى ابتدائي .. والبنت مو راضية تداوم .. والام وعليا كلمت الناظرة انها تغير صف بنتها لانها ما تحب الابلة وما تتعقد من المدرسة .. ما رضت الناظرة .. جان تروح للمراقب .. والحين المصرية ماشية على الصراط المستقيم .. وسمعنا انهم بيفسخون عقدها وبيسفرونها

وبلغينا عنج شنو يصير وياج

اي والله صااجة انا بصراحة داشة عرض لاني مو ولية امر بس انا طالبة بس ذاك اليوم كانو مدرسة ابتدائية قاعدين يتدربون عندنا بالمدرسة عااد شكلهم أولى ابتدائي ونعومات رااحت ابلتها وكفختها على راسها عاااد والله حراام البنت ما سوت شي بصراحة انا حتريت بقيت اروح اكلم الابلة…….. بس لا تسكتين رووحي كلمي الناظرة وهدديها

والله اهوو الطق ممنــووع .. ســاعات تيــيــني فتــرات ودي امــد ايــدي

بس امســك رووحي اتذكر انهم يــهال .. ســاعات يــكون فيه ضغط كبيـر اليهال كل واحد يحن من صوب

و يشيطنوون شـوفي يـاقلبي لاتنسـين ان الابله تدرس 30 طالب بالفصل و تخيلي هال 30 كل واحد بصـوب

الابله تمسـك منو وتخلي منـو .. و دامـ على قولتج كل يوم قاعدين ينطقون معنـاته الطق مو يـايـب نتيــجه شووفي الشطانه لي وين

الي يـهال مو خايفين من الطق و قاعدين يشـيطنوون كل يوم ..

أنــا وحده ضد الطــق و مــا أيد الطـق .. بس حبيــبـتي انتي روحي و قعدي مع الابـله و تفاهمي مـعاها بالطيــب ..

قوليـلها ادري شياطين والله يعيـنكم … بس ولدي صـار يكره ويكره و جذي كلميـها عادي و اهي بعدين بروحها تسـتحي على دمها

والله خواتى الله يعطيكم العافيه انا اشوف المدرسه كلها طقنى واطقك مدرسات وطلبه …واشوف البلا من

الاداره

يمه قلبي!!!!!!!!!!

صج عاد؟؟؟؟؟؟؟؟؟؟؟؟؟؟؟؟؟

اول مره ادري ان في ناس جذي .. ممكن مدرسة مدرستين .. بس مو المدرسة كلها!!!! ليش يطقون اليهال حرام عليهم .. اول و تالي هم اطفال لازم يتشيطنون .. و الله العظيم انا وحدة اذا زفيت تلميذة من تلميذاتي الوم نفسي طول اليوم .. مع اني ما اجرحهم .. بس مجرد خزة عشان ينردعون او اهددها بولي امرها!! و هم قلبي ينعصر و يضيق خلقي عليها .. اشلووووون الطق؟؟؟؟؟؟؟؟؟؟؟؟؟؟؟؟؟؟

للأمانة مره بس شفت وحدة من المدرسات لما كنت تربية عملية اسحبت ولد من هدومة و احتقرتها .. و الثانية مدرسة مصرية كانت تزف الصبيان و نفسها خاااااايسة عليهم اللهم يا كافي .. انا من القهر على عيالنا بغيت أشتكي عليها بالادارة !!! غير جذي ما شفت و لا سمعت

عالعموم حبوبة يحق لج تشتكين على المدرسة اللي تطق عيالج .. و لا تخافين من أحد

اختي نصيحة حاولي تسايسين الابلات عشان مايحطون الحرة بولدج
اونج تروحين التعليمية
بس غريبة كل المدرسات ليش اهم ماعندهم ضمير

المشكله فعلا بدوا يحطون الحره بولدى انا شلون اكلم كل ابله بروحها وهذا اسلوب الكل؟

ماادرى اذا كانوا الامهات الثانيات عندهم عادى يعنى …بس شلون التقى فيهم نشتكى جماعى عشان ما

تطيح براس ولدى المسكين؟!

غلططططططططططططط

إذا كل وحدة بتسايس المعلمات عشان لا يحطون على ولدها .. المشكله ما راح تنحل

أنا أقول وصليها لأكبر راس .. و لا تخافين من أحد .. خافي بس من رب العالمين ثم على وليدج

و على فكرة المعلمات و الإدارة إذا ياتهم نفضة من فوق راح يعملون ألف حساب لج و لباجي أولياء الأمور

كل إدارة تخاف على سمعة مدرستها .. فما راح يقدرون يسوون لولدج شي

و على فكرة أولى و ثانية و ثالثة ابتدائي ما فيهم رسووووب .. يعني لا تخافين!! انتي صاحبة حق .. فلا يردج شي

كلش كلش فضحيهم بالجرايد .. و الله خير جرايدنا تبي أي شي تكتب عنه!! هذا غير بعض القنوات التلفزيونية

و الله يكافي وليدج و عيالنا الشر

وصج مشكورين جميعا على ردودكم وافادتكم …سامحونى شوى متوتره صار لى يومين جنى اداوم بمدرستهم

الطق ممنوع لكن لازم تحصلين ابلات يطقون

ومدام المدرسه كلها تطق اكيد الخلل من الاداره

قولي للاداره انج مو سامحه لاحد يطق ولدج واذا انطق ولدي بشتكي بالمنطقه

اشوه انا بنات مو صبيان صج نعصب ونصرخ عليهم بس ما انطقهم

اخ ياقلبى والله يابنات الظاهر يمكن يالديره ماعندهم هالسوالف…تصدقون انى تونى العام طلعته من كيجى اجيال الباكستانيه ونفس الوضع …والله كانه معتقل مو مدرسه..والله بعيونى اللى راح ياكلها الدود طق على روسهم بالطابور جدام الناظر ..وكنت اشوفهم عيالنا وبنياتنا الكتاكيت بالروضه ونزلت دموعى …ولولا ظروف ماديه كان وديته ثنائيه اللغه المدرسه الوحيده اللى فيها اداره سنعه..والله مادرى وين وزارة التربيه عنهم..

شلون؟ مااعرف احد فيهم

معروف من نص شهر 4 تزيد شطانة الأولاد بسبب طول العام الدراسي وتزيد عصبية المعلمات ويحدث استنفار لنهاية العام ،،،أنا ولدي في أولى ومعاي بمدرستي وينطق من جميع المدرسات بالمسطرة ما راعوا الزمالة