شرايكم بابلات العلمي بثانوية طاهره؟؟

السلام عليكم
شلوؤوؤونكم يا حلواااااات
حبيييت اسالكم عن ابلات الي يدرسوون القسم العلمي بثانوية طاهره حبيباات و لا شديدات يعني يسااعدوون و لا جعصااااااات هع
و ابي ردووكم بلييز

اهليييين حبيبتي ..

انا توني متخرجه من ثانوية الطاهره القسم العلمي وتخرجت بأمتياز الحمدالله ..
شوفي انا اقولج ..

انا بـ 11 ..

درستني ابله ايمان كيميا كانت ادرسني بعاشر .. شرحها لعاشر كان احسن من 11 بس تعطي درجات كامله وتساعدج
بالامتحان .. وما تحاسب على السوالف وهالشغلات .. انا دايما أخذ 50 من 50 بالكيميا عندها ..

الفيزيا درستني ابله حنان .. ما تحب احد يسألها تعطي واااااايد اوراق وتكتبج وااايد بس اذا درستني من الدفتر تييبين
بالأمتحان 35 من 35 .. شرحها يعني يحتاج مدرس خصوصي .. لكن تعطيج كل شي ايي بالأمتحان ..
تحب الشطار حيييل واهيا درستني بـ 11 و12 حبيبتي والله اموت فيها وتعطي درجات واذا بتنقص تنقص درجه بس
اكو ابله زهير اعتقد جذي اسمها .. شرحها اقوى من ابلة حنان وتعطي درجات وحبوبه ..

حبيبتي قسم الفيزيا عموما ً كله حبوب ويعطون درجات ويساعدون واذا انتبهتي وياهم تاخذين امتياز بالماده

ابله امنه الي اهيا رئيسة قسم الكيميا .. استغفر الله على شنو حاطينها رئيسة قسم !! .. كرهتني بالكيميا انسانه
ما تفهم كلش وايد تغلط واحنا نصحح لها .. مو حقانيه نهائي .. انا من عمري 100 بـ 100 بالكيميا من شفت ويه الابله
نزل مستواي صح كنت اخذ 95 بس كيميا 12 سهله حدها الأبله عنصريه بشكل خيااااااالي ..
يعني اذا طحتي عندها الله يعينج ..

قسم الرياضيات وما ادراك ما الرياضيات .. ابله حنان رياضيات كانت اتطقني ابله مستحيل تخليج تسرحين نهائيا ً
تصارخ وااايد بس تفهم حييييييل انا طلعت امتياز بالريضيات بـ 11 من دون مدرس ..
بس عصبيه حدها .. بس تظل حبوبه فديتها .. بس واايد تنقص عادي عنها تنقصج 4 درجات اذا كنتي كسلانه

ابلة ميرفت .. لو تذكرين السالفه الي صارلتها السنه الي طافت .. كل بنات 12 اشتكوا عليها وشالوها من كل 12 ما عدى صفي
12 ع 2 .. شوفي اهيا ما تفهم بس تحل معاج التمارين كلها .. يعني كل الكتاب محلول .. بس تييبين مدرس يفهمج والحل كله
بدفترج كانت تعطي من قلب .. ما تنقص درجات واايد حدها حدها درجه .. طيبه بس نااايمه حصتها تنوم ..

ابله ماري يا ناس هالانسانه عجيبه .. احبها حييييل درستني بـ 11 و12 .. تفهم 100 % انا كنت اخذ فول مارك بكل كورس ومن دون
مدرس ولا تعب تخليلج الأحياء على اساس انه قصه تفهمج اياه بطريقه عجيبه حصه ممتعه لأبعد درجه تسولف وتضحك وتفهم
وتعطي درجات كامله ..

ابله حنان جيولوجيا .. انسانه محترمه راقيه بالتعامل .. مادة الجيولوجيا ماده غثيثه صفنا بـ 11 كله اخذ 50 من 50
شرح الأبله عجييييب تبسط الماده بشكل حلو تخليج تعشقين الماده .. اسلوبها تعاملها شرحها كلها على بعضها خياااال ..

وبس

اتنمى افدتج حبيبتي اي اسأله ثانيه انتي سألي بس

مشكوووره حبيبتي و ما قصرتي بي انا حدي متردده انا مدرستي بالفحيحيل و احنا من سكانن عبدالله المبارك ف انصحوني بطاهره اروحلها و امس ابوي نقلتي فيها و انا بروح 12 علمي ف حدي خايفه تنصحيني اروح طاهره و انا مرتاحه و لا ارد لمدرستي احسن و اخاف اذا انتقلت و رحت طاهره اخاف ياثر على مستوااي بعدين صج قسم الرياضيات مو شي؟؟؟

اهااا نتي 12 على بالي تسألين عن 11 ..

شوفي ..

12 علمي سهل لأبعد درجه .. المواد حيييل خفيفه وممتعه والمواضيع شيقه وحلوه .. اذا كانت ميولج علمي
بتستمتعين ..

الأبلات طيوبات لأبعد درجه .. حيييل يساعدون بالدرجات .. اكو ابلات ممتازات واكو ابلات مو شي .. يعني الرياضيات
ابله فاطمه وابلة حياة بس الزينات اما ابلة ميرفت الشرح مو زين بس تحل كل شي بالكتاب تساعدج وايد ..

الفيزيا كلهم يفهمون .. الكيميا ابلة ريم ممتازه لكن ابلة امنه استغفر الله .. الأحياء ابلة ماري تغنيج عن أي مدرس واهيا
تدرس 12 كلهم ..

شوفي حبيبتي 12 علمي شي طبيعي لازم تييبين مدرس .. شي اساسي ولا تقولين اكو بنات تخرجوا بدرجات ممتازه
بدون مدرس مستحيل ..

مدرس فيزيا راح تحتاجين " عندي خوش واحد اخذت 100 بالفيزيا معاه "
مدرس الكيميا ممتاز حده .. وشاطر ..
مدرس الرياضيات همن عجيب ..

انا كنت أييب هالثلاثه اضافة الي العربي لأني مو شي بالقواعد ..

وتخرجت امتياز وقبلوني كلية الهندسه ومعدلي وايد مرتفع الحمدالله .. موضوع الأبلات مو مهم دامها ابلة تعطيج درجات
والامتحانات القصيره سهله هذا الأهم ..

اما الشرح فـ الخصوصي يفيد بالواجب ..

مدرستنا ابلات ما يفهمون حييييل لكن يعطون وايد درجات ويساعدونج وااايد واذا عمدج ظرف يقدرونه .. يعني انا رفيجتي
على اخر السنه ضاع دفترها وابلة الرياضيات كانت تبي الدفاتر وعليهم 10 درجات البنت راحت عند الأبله وقالت دفتري ضاع
عطتها الـ 10 كامله بس قالت صوري من اي بنت علشان امتحان الفاينل ..

يعني مثل ما قلتلج من ناحية الدرجات والتعامل تمام من ناحية الشرح لازم مدرس خصوصي .. وهذا بكل مدارس الكويت
مو بس بمدرستنا

الله يوفقج حبيبتي ..

و اللله مدريي يا حيااتي لان في بناات يقولون ان قسم الكيمياء مجرماات و ما يسااعدوون و يسقطووون و البنات قليلات ادب يعني كلش حبطووني مره وحده بس انا ودي اقعد بمدرستي لان حدي متردده

الكيميا كلهم حبوبات بس ابلة امنه .. بس الشاطر يعدي صدقيني .. انا ابلة امنه كانت تكرهني ..
بس انا شاطره ما اخليها تمسك علي شي .. درجات كلها كامله كانت تنقصني على اتفه الأسباب بس ضليت امتياز بالكيميا
بس مشكلتي لساني طويل مو متعوده احد ينقص مني شي خصوصا ً انا اييب فل مارك بالأمتحان واهيا ما تعطيني درجات
كامله بالشفوي ..

بس الكل نجح بالكيميا بالنهايه .. الي يدرس ينجح والي يهمل يسقط قاعده معروفه بالعلمي .. من ناحية البنات قليلات
ادب بس عاشر .. 12 حبوبات ومحترمات بتحبينهم ..

بس تنصحيني اقعد بمدرستي لان الابلات يعرفوني و ابلاتي يهبلوون حيل و عارفين مستوااي و بعدين امتحان محافظة الاحمدي دايما سهله الحمدالله احسن لي من اني اروح طاهره و انا ما اعرف شلوون نظاامهم و على قولتج الابلات ما يفهموون و انا ابلاتي بالفحيحيل حيل يفهموون و معنها اخر سنه استحمل و الله يفرجها بس انا عندي اختي بترووح 10 ف اهي بتنتقل طاهره لانها اول سنه لها احسلها امن انا اخر سنه اخااف ياثر على مستووااي و انا الحمدالله شاطره و معدلي حلوو و مشكوووره حبيبتي و عسى ربي يوففقج و يين ما كنتي و تبشريني بتخرجج من الجاامعه بنسبه عالليه و تنقبليين باحسن مكاااان اميين يا رب العالمين و انا همن حاطه طمووح اني ادخل الهندسه بس يقولون هندسة الكويت صعبه و مدري شنو و يقولون 6 سنواات مو حلوه حق البنت و يمدحوون درااسة البحرينن و الله يوفقج

دامج خايفه خليج بمدرستج احسن .. تعرفين الأبلات والبنات وغيرهم ..
والله الهندسه بالكويت ما ادري لي الحين .. بس ركزي على القدرات اهم شي ..

مشكووره حبوبه و الله يوفقج انشااء الللله و قررت اني اقعد بمدرستي احسلي و ابركلي من الحوسه و بعدين اخر سنه يفرجها ربي انشاء الله

الله يوفقكم ان شاءالله

والله أبله أيمان الكيمياء مع أحترامي لها ما تعرف تشرح يعني أحس أنها تقرا الكتاب بس ما تشرح

اما أبله ماري تهبل