ساعدوني قبل لا يدش ولدي الروضه

السلام عليكم : انا ولدي عنده مشكله بالنطق ,كلامه نصه مفهوم ونصه لا وعنده جم حرف ما ينطقهم عدل ويطول اذا بغى يركب الجمل, ما ادري شسوي له ..؟ فاذا تعرفون دكتور او مكان متخصص لمشاكل النطق عند الاطفال ياليت تقولولي عنه, اخاف ادخل ولدي الروضه واهو على هالحال ويعيبون عله اليهال هناك ويتعقد الولد .
ساعدوني الله يخليكم ..

عادي لا تحاتين في شكثر مثل ولدك اختي ولدها عمر 4 سنوات وكانه هندي ما تفهمين منه ولا كلمه دخلته مدرسة النطق بس بالسعوديه والحين احسن الدكتور قال عادي في شكثر مثله شي طبيعي بس انا بصراحه ماعرف بالكويت ولاكنت ساعدتك او دخليه روضه خاضه عشان يعلمونه عدل والله يساعدك

بالنسبه للنطق اختى هذا شي عادي بالنسبة للى في سنه

بالعكس بالروضه لما يختلط بالاطفال راح يتطور النطق عنده بسرعه

أسألينى انا ياما دخلوا علينا اطفال صعبه نفهم منهم اللى يقولونه

وتخرجوا من عندنا يتكلمون شحلوهم

وثانيا اذا كانت فعلا المشكله واضحه معاه راح تحولج الاخصائيه الاجتماعيه او النفسيه لمتخصص بهالامور

اهوه الياهل يتعلم من باقي اليهال وترى خاصة اذا كان أول ياهل عندج (البجر) تلقين نطقه يتأخر ومايكون عدل بالبداية بس الثاني والثالث يتكلمون أسرع لأنهم يتعلمون من اخوانهم ..
ولو مدخلته حضانة جان تحسن .. بس عادي بالروضة بتحسين بالفرق بيتعدل كلامه لأنه بيقلد اليهال اللي معاه ..

ولو وحدة من البنات تعرف رقم اخصائي نطق خل تفيدنا ..
انا بنتي اسمالله عليها تتكلم وتقول كل شي بس عندها تأتأة ومو دايما يعني على النفسية مرات مسكينة واااايد اتأتئ تكسر الخاطر ومرات تتكلم عادي …
أخاف اهملها علبو تتعدل بروحها وتزيد عندها …

انا كنت امدخلته الحضانه البريطانيه, اسم الله عليه يستوعب ويقول الكلام بالانجليزي احسن من العربي والحين اذا ابي اعلمه على شي اقوله اياه بالعربي بس ما يفهمه ولا قلته له بالانجليزي يعرفه ويحفضه, بس للاسف ماكملت وياه الحضانه والحين هالسنه بدش الروضه, الاخصائيه هناك قالتلي لا تخافين كل اليهال جذي واحنا اصلا تيينا اخصائيه نطق حق اليهال الى عندهم مشاكل بالنطق واهي اتابعهم كل اسبوع فلا تخافين بس انا قمت احاتي واوسوس اخاف يقصون على بهالكلام , من جذي قلت خل اخذ رايكم.

لا تحاتين ان شاءالله بيتعلم النطق الصحيح مع اليهال بالروضه تو الناس على المحاتاة

‘طمنتوا قلبي الله يطمن قلوبكم انشاء الله ويريح بالكم قولوا امين.