سؤال ضروري عن الصندوق المالي بالمدرسة

شخباركـــم …إن شاء الله طيبيــــــن…

بغيت أسأل عن الصندوق المالي بالمدرسة يعني شنو … ؟ لإن اليوم مسكوني الصندوق المالي

مع مدرسة رياضيــات وماأدري شنو المطلوب …

أبي منكم اللي تعرف أي شئ عنه ولو شئ بسيط تكتبه يمكن أستفيد منــــه …

ويعطيكم العافيه

هذي ميزانية المدرسه .. بس شنو وليش وشحقه وشلون مادري

ماعرف عنه شي لكن ضمني الامتياز انشالله

الصندوق المالي حبيبتي يعنى ميزانية المدرسة – محاسبة تحسبين زيادات ونقصاان يعنى كل اخر كوورس تسكرين الصندووق بعد مثلا ماتوزعين أرباح المقصف والفواتير ملووت المدرسة أنا مامسكوني ولامرة بس أحب هالمهنة

ماقصرتوا بنات على الردود ويعطكم العافيه
وبإنتظار باقي البنـــــات

هلا فيج حبيبتي والله يكون بعونج
انا ماسكة الصندوق المالي صار لي سنتين
بس اللي اعرفه ان اللي تمسكه وكيلة المدرسه ومايصير نعطيه معلمه
المهم الصندوق المالي ماله شغل بالمقصف هو ميزانية المدرسة اللي تنزل بحسابها ..انتي عليج تستلمين الفواتير وتدققين فيها واذا غير صالحة ترجعينها وبعدين تعبين السجلات الخاصه بالصندوق المالي …هذي شغله صعبه ولازم تجابلين احد يشرحها لج وجها لوجه.

بس ابي منج شغله…لاتوقعين على شي ماتعرفينه

تقبلي تحياتي

جكورة مسؤولية يا بنت ليش توافقين وبعدين بتشوفين فواتير وشغلات يمكن انتي تنصدمين منها يكتبون شي زيادة تعرفين تحايل علشان يوافق الصندوق المالي بالوزارة ويمكن يلزمونج بالتوقيع اذكر ايام روضتي القديمة كانت فية بلاوي ماحبينا نتكلم عنها تتعلق بالمالية لان البنات اللي شاهدات بيتوهقون ويصير تحقيق

ويا بنات هذي مسؤولية الوكيلة والناظرة انتوا مالكم دخل بهالامور ليش تحطون نفسكم بهالمواقف صار ما صار حطوها براسكم

والله يعينكم

الله يعينج ياقلبي واتمنى انج ترفضين هذا الشي عشان ترتاحين

صباح الخير بنات

انا قالولي ورفضت

وتفاجات اليوم قالت لي مدرسه ترا مسكوج الميزانيه انتي مسؤوله عن الصندوق المالي وانا ما اعرف ولا شي
بس اللي كانت اول ماسكه هالشغله قالت لي انا بساعدج
بس شفتوا اللعانه الحين رفضتها ويدبسوني فيها غصب
ومشكله اذا رفضتي شي بيحطون عليج
يالله تجربه والله يعينا انا وياج وكل وحده
نعتبرها تجربه ( نصبر روحنا )