ديوانية الأبلات مشرفات الإذاعة المدرسية " نبي الهمة العالية "

السلام عليكم ورحمة الله وبركاته ….
حبيباتي مشرفات الاذاعة المدرسية نبي نتعاون تعاون حقيقي بالبرامج الاذاعية اللي تستاهل عشان ننشر بمدارسنا البرامج الصحيحة والمفيدة حسب المناسبات ونتبادل الأفكار واذا اي وحدة عندها استفسار او متوهقة نتساعد بمقدمة او كلمة وتنسيقات وغيره من أمور الاذاعة والاهم الاشرطة حبيباتي انا ودي تكون اذاعتي بس اناشيد بس ما ابيها اناشيد عادية يعني تكون مميزة اذا ممكن نعرف وين نحصلها؟ ياريت يكون في تفاعل كبير عشان الموضوع مهم للغاية

ياعيني عليكي وانا معاكي

ابي اسالك شنو راح تسيون بحفل القرقيعان

خوووووووووش موضوع
جزاج الله خير بنت الكويت

بالنسبة للأشرطة أنا رحت لمحل التسجيلات إلى بجمعيتنا وخذيت منه 7 لاأشرطة من أناشيد حلوة عن الام وعن القرقيعان وعن المدرسة، وشريط للعفاسي، وشريط احمد العجمي وماهر المعيقلي للقرآن.
واي شئ تبونه حاضر
مشرفة إذاعة

اي زين تسووون ،، هالتجمع حلوووو

وان شاء الله نبدأأأأ بشي جديد ومميز

ابي اسالكم اشلون توزعون البرامج على الابلات
قسم قسم
او كل ابلة لها بلانامج بروح
بليز ساعدوني

دودي

حبيبتي طبعي لج ورقة باسماء كل المدرسات
وحطي تواريخ ووزعيها عالاسامي

يعني جدول وفيه اسامي المدرسات وكل وحدة لها يومها بالتاريخ اللي تحددينها وفكي عمرج

وسوي لج نموذج حق البرنامج الاذاعي طبعيه وصوريه جم نسخة عطيها رئيسة كل قسم عشان يقولون حق مدرساتهم ويمشون عليه

وطلبو البرنامج من قبله ب3 ايام عشان لا تتوهقون

وسلامتكم

ويعطيكم العافية والله الاذاعة مسؤولية اشوة انا ما خذيتها هالسنة خليتها للدماء الجديدة على قولتهم ههههههههههههههه

والله انا استلمتها ويا رفيجتي

بس حدها صعبه

وتوني ببداية الطريق

قاعدة اتعلم
وخاااايفه حدي لانها مسؤولية

بس بسألكم الحين اللي تستلم الإذاعه يعطونها مناوبات الصبح واشراف بالفرص واحتياطات ؟؟؟

لان عطوني احتياط أمس

ضروروي فيدوني أبلات

وأكون شاكرة لكم

قوة أبلاااات حبيت أفيدكم في جدول المناسبات .. طلعته من النت وبعطيه بااجر لزميلتي اللي معاي بالإذاعه

جدول المناسبات والأعياد

الرقم المناسبة التاريخ
1 الإ سراء والمعراج 27 رجب
2 يوم محو الأمية العربي 8/9
3 عيد الفطر السعيد 1/10
4 يوم المعلم 5/10
5 يوم الطفل العربي 7/10
6 أ سبوع التخضير 15/10
7 الاحتفال بيوم الغذاء العالمي 16/10
8 يوم العربي للمكتبة المدرسية 18/10
9 يوم الأمم المتحدة 24/10
11 إطفاء أخر بئر نفط 6/11
12 اليوم العالمي التطوعي 5/12
13 يوم الأسرة العربية 7/12
14 الإعلام العالمي لحقوق الإنسان 10/12
15 يوم الشرطة العربية 18/12
16 يوم محو الأميه العالمي 8/1
17 الوقوف بعرفه 9 ذي الحجة
18 عيد الأضحى المبارك 10-12ذي الحجة
19 رأس السنة الهجرية 31/1
20 العيد الوطني للدولة الكويت 25/2
21 عيد التحرير 26/2
22 يوم المرور العالمي 16/3
23 يوم الأسرة 21/3
24 ذكرى تأسيس جامعة الدولة العربية 22/3
25 أسبوع المرور لدول مجلس التعاون الخليجي مارس
26 يوم الصحة العالمي 7/4
27 يوم البيئي الإقليمي 24/4
28 المولد النبوي الشريف 12ربيع الأول

ابلة خلود المفروض مايعطوكي شي
بس يمكن لانكم ابلاتين قالوا ماكو ضغط عليهم

مشكورة زيتونة حبيبتي
لاني فكرت اسوي لكل قسم اسبوع وافك عمري

ابلة خلود .. لا ما يعطونج لا مناوبة ولا احتياط ولا شي من الاساس حتى لو كنتوا عشر ابلات ماسكين الاذاعة .. وكيلتكم دايخة

::

بخصوص توزيع البرامج على المدرسات

في ورقة عند الوكيلة اللي يوقعون عليها الابلات لما تمر نشرة ..

اخذي نسخة .. وجدام اسم كل ابلة حطي التاريخ والشهر ..

وفي ورقة ثانية انتي تسوينها .. كتبي عليها ..

( مناوبات الاذاعة لشهر أكتوبر ) مثلا ..

ورصي الايام من 1 لي 30

وخليها 5 خانات

الخانة الاولي .. اليوم والتاريخ

الخانة الثانية .. اسم المُدرسة

الخانة الثالثة .. القسم

الخانة الرابعة .. مكان توقيع الابلة

الخانة الخامسة .. للملاحظات ..

وبعد ما يوقعون الابلات .. نسخي الورقة وعطي كل مدرسة اولى نسخة منها عشان تذكر مدرساتها .. وانهم لازم يسلمون البرنامج قبلها بيومين او 3 ايام

وفي عندي افكار إن شاء الله افيدكم فيها بعد

مشكورة ياقلبي

بنات حبايبى ابى شغلات عن يوم الطفل العالمى شتحطون فيييييه ؟؟
واكون شاكرتلكم ……..

للرفع وينكم