خبرتكم في تهيأة البنت لمرحلة البلوغ

بنتي رافضة موضوع البلوغ أو التحدث فيه مع ان صديقاتها بلغو قبلها وتحجبو ,, بس هي خايفه ومو متقبله شي عن هالأمر.. أحس بقلق إنها تصير لها ردت فعل إذا بلغت أو تنطوي أو ما تتحجب… لأني ناويه أحجبها بصراحه مسؤوليتها برقبتي..
وهي موضوع الحجاب عادي بس البلوغ مو راضيه نتكلم فيه. سولفولي عن خبراتكم بهالشي ,, كل اللي عندها بنت ومرت بهالمرحله تقوللي شصار لما بلغت وشلوون كان تصرفكم وردة الفعل. وشكرا..

مثل حالتى كنت منحرجه انا اكلمها مو العكس ههههههههههه

ولانه بنت اختى اللى كبرها بلغت وقالت لها سهلت على المهمه وتكلموا جدامنا عن البلوغ والحمد لله اختى الكبيره قالت لها عنه ريحتى من الاحراج

والزين انه ياخذونه بالمدرسه يعنى بس قوليها انه راح تصير كبير ويصير فيها مثل كل الحريم

وبس عليميها النظافه وقتها واشلون الاستخدام

الله يخلي لكم بناتكم

لا تحاتين تذكرين علاقتج مع الوالده كلنا جربناها في منا اللي ماعندها معلومه ونصدمت وفي اللي تعرف وماتكلمت
مايحتاج تكلمينها
في نفس اليوم اللي تبلغ فيه تقدرين تكلمينها اهم شي رتبي كلامج خاصه نقاط المهمه لراحتها ونظافتها
ورح ينكسر الحاجز اللي بينج وبينها صادقيها
انا بنت زوجي بلغت وهي كانت بزيارتها عندي لانها كانت بحضانة امها (طليقة زوجي) وانا كنت موجوده كانت بنت خجوله من الموقف اللي صار لها والخوف نادتني وتوريني …………….. انصدمت من جرائتها لكن كسبتها كصديقه وعلمتها واللحين انتقلت لحضانة ابوها وتعيش عندي ماتصورين الاسرار اللي بيني وبينها
الحمدالله والله يرزقني بالذريه الصالحه امين يارب العالمين

انا اقول مهدي لها وقولي لها كل شي راحيصير بصراحة ووضوح وفهميها انه الامر عادي وطبيعي والله خلقه فينا لانج لو قلتيلها نفس اليوم راح تنصدم ويمكن تكون نفسيتها تعبانه ويمكن ماتقولج تسال رفيجاتها وتعتمد على كلامهم وانتي ماتدرين شيقولون لها وشيعلمونها فلالاحسن انها تسمع منج انتي والحجاب خلي بقناعتها يعني حبة حبة

والله يخليها لج ويحفظها

تحياتي

أنا عن نفسي كلمتها وشرحت لها الوضع ولوعت جبدي كل يوم تسال يمه ما يتني يما متى تجيني وساعات تقعدني من عز نومي علشان تقول ترى احتمال اليوم تنزل انا حاسه في شى بينزل لالالالالالالالالالالالالاعت جبدي ياليتني ساكته وناطره لين تبلغ وبعدين يصييير خييير

اقولج لا تقولين لها لين تشوف بعينها لانها تجهلها وماتعرف الشي ليين تجربه
اسأل مجرب ولا تسأل طبيب

شوفي يا قلبي على ايم امي و امج ما كانوا يكلمونا بالموضوع و عادي درينا من رفيجاتنا او البنات اللي يمنا بنات عم او خاله

ما دام منحرجه اهي اتكلم لا تفتحين الموضوع معاها لانها تدري و عشان جذي منحرجه خليها مسحيه لا تيرعينها

و انا عن نفسي دريت من رفيجاتي و بنات عمي و لما يت لي كنت قاعده العب و شي بديهي رحت حق امي مخترعه و امي بكل برود اذكر ما طولت معاي قالت لي ادي كل الحريم اصير فيهم جذي و عطتني كوتكس و قالت اشلون احطها و عقبها كلمتني اشلون اغسل و اتنظف و حتي كان ظهر عقب الغدي قالت لي روحي نامي

اذكر اني نمت نومه طويله من الخوف

لا تحاتينها اول ما تي لها بتي لج ركض اهني دورج انج اصيرين لها اخت يعني قوليلها ان لا احد يدري الا انتي و اهي و الحريم عادي يدرون و قربيها منج قوليلها اي شي تبين تعالي و بسويلج اللي تبينه اذا شي زين لج و بشوفين اشلون تندعس تحتج

هذا الطريقه اللي سوها امي و مرت عمي اما عمتي قالت حق بناتها قبل لا اتي لهم ما احب اغتاب بأحد عشان جذي راح اكتفي ان اقولج ان طريقتهم مع امهم ما فيها احترام و لا حيا كلش يعني و مو الشي اللي تربينا عليه بالكعس يراعه زايده عن اللزوم

وااااااااي فشله انا اصلا يوم بلغت كنت كبيره يعني عمري 16 فكنت اعرف من بنات عماتي ورفيجتي اصلا لو امي يايه مكلمتني جان تمنيت تنشق الارض وتبلعني واصلا لمه بلغت كلش ما قلت حق احد رحت الحمام تكرمون وناديت الشغاله قلت لها يبيلي كوتكس وغسلت وضبطت اموري وطلعت وعقبها بيوم دشت امي داري لقت كوتكس قالت مال منو هذا قلت لها مالي وبس اسكتت

مشكورين عالردود حبيباتي ما قصرتو .. أشوف الأغلبيه تقول أخلي الأمر لغاية ماتبلغ وهي اتييني تقولي أحسن .. وآنا باخذ بشورتكم .
اللي مضحكني من كلمتها وهي كل ماصار شي تقعد تتسحب وتتلصق وتظل ساعه يمي مادري شتبي.. وبعدين تسأل سؤال .. تخاف يتها وهي ماتدري ! ..
والله تكسر الخاطر حبيبتي … وبصراحه صج ماقصرتو ,,, شاكره لكم

انا من الحين احاتي هالموقف
لانه كان صعب بالنسبه لي

هم انا احاتي هالموققف ما دري اشلوون اتصرف مع ان انا لمحتلها شنو التغيرات اللي راح تصير

لا بنات لازم تقولون حق بناتكم

انا امي ماقالتلي وماكنت شي وكانت معزومه بيت رفيجتها دخلت الحمام شفتها يتني طلعت
ابجي اقولها راح اموت قاعده انزف

وضحكو علي

لازم تكلمون بناتكم انتي تعلمينها ولاتسمع من احد ثاني واللي بنتها يننتها على هالسالفه قوليلها انسيها وهيا اتيي بروحها

شوفي حبوبة انا عن نفسي بديت امهد لهم من المتوسط واقول لهم ان البنت علشان تصير مرة كبيرة وبعدين تجيب اعيال الله سبحانه وتعالى عطاها شي اسمه الدورة الشهرية وهو دم راح ينزل عليج كل شهر بس ترى الشي طبيعي وما يعور وما راح تصيرين حلوة وكبيرة وام اذا ما صار لج هالشي ان البنات كلهم راح تيهم الدورة الشهرية واحط لهم في جنط المدرسة جنيطة صغيرة مثل مالت المكياج اللي تنحط في جنطة اليد احط فيها تكرمين غيار وفوطتين صحية واعلمها شلون تحطها علشان لا ترتبك اذا جتها في المدرسة

شوفي حبيبتي بنتي الحين على وشك البلوغ بس ما خليتها قعدتها وفهمتها شنو يعني الدورة وليش ينزل الدم من المراه وان هذا رحمة من رب العالمين لأنه دم فاسد … وفهمتها شنو التغييرات اللي بتصير في جسمها وقتلها ترا عادي وكل وحده يصير لها هالشي وبنتي الحمدالله كانت متقبله الموضوع واصلا كانت بالأساس عندها فكره بس انا قتلها التفاصيل كلها … فلا تخلون بناتكم وماتقلولهم لازم تعلمونهم ماتدرين يمكن رفيجتها بالمدرسه تعلمها اشياء غلط او تخرعها وتقعد البنت تحاتي … بعدين بالمدرسه الحين يعلمونهم كل شي الحين بنتي بسادسه ذاك اليوم سوولهم ندوة وكانت اللي تحاضر دكتورة وعلموهم كل شي ولا بعد وزعوا عليهم علبه فيها كوتكس وفيها كتيبات ما شاء الله عليهم خوووش حركه .. بس نصيحه لازم تقعدين وياها وتعلمينها …