|
|
السلام عليكم ..
بنات انا محتاره بموضوعي وابي رايكم وشوركم ..
انا متزوجه صار لي 5 شهور .. طبعا زواج اهل واهو مايصير لنا ..
من اول يوم وانا ملاحظه على زوجي مو صوبي ما احسه معرس واليوم عرسه ومستانس بعروسته و حياه جديده ..
لا احس الوضع عنده عااادي جدا لدرجه مخلي فونه شغال و يطقطق بالبيبي ..!!
حتى ما رضى يصور معاي و طرد المصورات ..
مو مدح فيني بس مافيني عيب ولاني شينه او بطه او جسمي مو حلو الحمدلله ..
واسلوبه جدااا جاف معاي مع اني والله مدللته ومحترمه اهله اصبح على راس امه وامسي على راسها ..
واهله يموتون فيني وانا اموت فيهم معتبرتهم اهلي ..
الا هو مادري شفيه معاي ..!!
والله يابنات مدخلني المطبخ من اول اسبوع من عرسي ولا قلت شي ومد ايده علي على سالفه تافهه وسكت وتحملت ولا شكيت ..
عمره ماجاب لي هديه ولا سفرني شهر عسل ولا دللني حالي حال اي عروس زوجها مستانس فيها ..
حتى مافيه رحمه .. مره طحت غشيانه عنده قلت ابي ماي دايخه قال اي مثلي انج دايخه عشان اروح اجيب لج ماي تبين تتامرين علي ..!!
انصدمت من اسلوبه معاي ليش يعاملني جذي وانا مو مقصره معاه ..
حتى اذا رحت عند اهلي مايتصل علي ابداااا بس اذا جا ياخذني يقول انا قريب جهزي نفسج ..
ولا مره اتصل قال مشتاق لج احبج وحشتيني ..
ماسمعت كلام الحب منه ولا عرفته ..
مع اني مغرقته كلام حب وطرش له اشعار وتصل عليه ويحقرني ..
جربت معا كل شي حتى ليالي حمر سويت ولا مره مدح ..
قصيت شعري وصبغته ولا علق ولا اي ردت فعل ..
بس ماخذني اطبخ له و اقعده لدوامه وجهز له وبس ..
اسم انج مرتي لا اكثر حب واحترام مافي ..
شفتوا كل هذا سكت عنه وطنشت
وقلت بيتعود علي وبتعود عليه وبغيره معا الايام بقربه مني اكثر ..
قبل شهرين اخذت تلفونه مع انه حاط قفل بس اهو حطه على الشحن وراح ينام و التلفون يبي له دقيقتين على مايتقفل ..
مسكته قبل لا تقفل الشاشه وفتشه ..
وانصدمممممممت من الي شفته ..
محادثته معا وحده يقول لها وينج ماجيتي الشيشه وهي تقول له ماقدرت وقال ورفيجتج وينها قالت مريضه قال لا سلامتها خل تجي بضمها عشان تطيب !!
وقال شرايج بالحبوب الي عطيتج جربتيهم ..!!
بنات انا عضامي ماشالتني مت بمكاني انهررررررت
وقرا محادثات ثانيه له معا بنات كلام ايباحي كلام ماقاله لي وانا معاه بالفراش !!
واخذ الفون وقطه بوجهه قلت هذي سوالفك وانا صابره عليك وساكته هذي اخرتها ..
ودني بيت اهلي ..
قال شكو تمسكين تلفوني وتشوفينه ..؟!!
قلت السالفه موسالفة تلفون ابيك توديني بيتنا ماراح اقعد لك يوم ..
قال روحي غيرج الف ..!!
وروح الم اغراضي ماتحملت معا شينه قوات عينه ..
ويجي قال تعالي خنتفاهم وروح قال هذي زله ورفيجي الي وزع البن مالي وهذيلا انا ماعرفهم ولا شفتها بس كلام ما كلام بالبيبي ..
قلت انت قاعده معاها تقول شرايج بالحبوب ..!!
اي حبوب الي تتكلم عنها حبوب شنو ..؟!
توهق قال اهي تدرس بالجامعه وعطيت رفيجي حبوب عشان يعطيها حبوب تسهرها عشان تدرس ..
قلت ماشاء الله خايف على مصلحتها بنت الشوارع ..!!
قال خلاس نسي وبمسح السته جدامج ..
ويمسحهم كلهم وانا للحين مو مرتاحه احس له علاقات معاهم ويشوفهم وقعد معاهم لانه دايم يطلع شاليهات و رفيجه عنده شقه يروح يقعد معاهم ويسهر بالعربي وضعه يشكك ..
زعلت من هالسالفه وقلت تخلي فونك بدون قفل قال اوكي والي تبينه يصير وانا اسفه والكل يغلط والانسان مو معصوم عن الغلط ومن هالكلام ..
رحت بيت اهلي ازورهم جا بالليل خذاني ومسكت تلفونه قال شتبين فيه قلت بشوفه قال خليه وان مسكتيه مره ثانيه كسرت ايدج .!!
قلت وين وعدك لي اليوم وكلامك قال انا مو جاهل عندج تحاسبيني قلت لج خلاص تبت ومسحتهم شتبين اكثر ..!!
قلت والله على نفسك هالشي بينك وبين ربك مو انا الي احاسبك بس حسبي الله ونعم الوكيل ..
وزعلت وقعدت عند اهلي 10 ايام وماقلت حق اهلي
ودخلت اهله بالموضوع وقلت لهم سالفته قالت امه اصبري ماعليه هذا طيش شباب و انتي بيدج تغيرينه قلت يايمه انا ماقصرت بشي ما استاهل الي يسويه فيني ..
قالت انا كلمت ابوه واهو بيكلمه ويتصرف معاه وانتي مرته وهذيلا بنات شوارع ماعليج منهم لايهمونج ..
وجا ياخذني من بيت اهلي ..
وتعدي السالفه وانا بقلبي جرح مابرى ..
وتلفونه صار كل حزه يدق ومكالمات وكله ويتنق ..
وقبل اسبوعين كان يتسبح وفي رقم يتصل عليه والاسم الي مسجله غريب يشكك و يدق اكثر من مره ..
وسجل الرقم ودق على اختي قلت لها اتصلي شوفي منو وتتصل وتطلع وحده ..!!
قالت لي اختي الحقي طلعت وحده السانها شطوله كلتني تقول منو انتي انا رقمي جديد و الله ان ماقلتي انتي منو لا اطلعج وطلع الي مطرشتج !!
ويطلع من الحمام ويرد عليها وانا بالغرفه اسمعه يقول اي اهم عندي ليش؟ لالا مستحيل متصلين عليك ماظن ويقول انزين جم الرقم .. لالا مو رقمهم يمكن احد غلطان ..
انا انصدمت بغيت اطيح من طولي ..
وسكت على هالسالفه وانا كارهته كله مابي اتطلق وشمت الناس فيني مابي الناس تقول توها متزوجه وتطلقت ماتمت سنه ..
وقبل اربع ايام كنت ابي فلوس عشان طالبه مطعم وبطل بوكه وحصل قطعه مستطيله لونها اخضر غامج على زيتي نفس الطين العجين الي يلعبون فيه الجهال ..
و ظرف صغير مكتوب عليه ورق لف زقاير فاخر ..!!
وتصل على اخوي اساله .. قال انتي وين حصلتي هالاشياء قلت ببوك زوجي ..
قال فلانه لمي اغراضج وتعالي الحين ..!!
قلت شنو شفيك .. قال هذا حشيش زوجج يحشش @@
الحين تجين لمي اغراضج وتعالي هذا الشي ماينسكت عنه ..
وسكره من اخوي وقعد افكر مادري شسوي كل يوم يصدمني بشي العن من الي قبله ..
غير انه يطق ابر هرمونات الي تنفخ العضلات وهذي بروحا تسوي بلاوي ..
واحد مو خايف على نفسه شلون بيخاف علي وبيحافظ علي وعلى بيته ..!!
ويروح دوامه وقلت اذا رد بخليه يوديني بيت اهلي وهناك يتفاهم معاهم ..
ونطره يرد وتصل عليه قلت وينك قال راد بدرب قلت اوك ..
وقعدت ارتب اغراضي المهمه الي باخذهم معاه البوم الصور و شريط العرس و ذهبي وملابسي الخاصه ..
ويتصل علي بعد 10 دقايق .. قلت الو مايرد الو الو مايرد علي بس اسمع صوت السياره ..
شوي والي يقول ديري باااالج لا يدعمونج السيارات ويضحك وصوت وحده شكلها بسياره الي جنبه تصارخ تكلمه بس مادري شتقول ..
شكله متصل بالغلط ..
انا اهني خلاص طفح الكيل ..
وسكره وتصل عليه و ابط كل شي بوجهه قلت انا تحملت شوالفك معا البنات وتحملت اهمالك لي وتحملت اشياء واااجد لي اهني وبس قال انتي شفيج ..
قلت شنو شفيني صرت تشتغل بالمرور ماشاء الله ديري بالج ولا يدعمونج .. خايف عليها ..!!
قال متى عن شنو تتكلمين انتي ..!!
قلت لا تنكر الله بين عليك وكشفك وانت الي متصل بالغلط ..
قال هذي وحده مسكره الشارع وبغت تندعم ..
قلت شوف انا تحملت الضيم وبما فيه الكفايه تكلمهم ببيتي وسكت ..
قال اكلم منو قلت انت اخبر منو تكلم .. البنت الي مسميها بو فلان بتلفونك حسبالك ما ادري بسوالفك ..؟!
قال اها انتي الي متصله عليها ..؟! @@
معا شينه قوات عينه .. قلت اي انا قال ولا بعد في سوالف واجد ساكته عنها
قال شنو اي سوالف ؟؟ قلت الله امر بستر ماراح اقول ..
قال لا قولي
قلت مابي اتكلم اسكت واجد احسن ..
قال انا راد البيت وبنتفاهم ..
قلت اوك تعال ..
ويجي قال انتي وحده مو متربيه وماتستحين تفتشين من وراي مسويه روحج الذيبه الي مايطوفها شي ..
قلت الحمدلله متربيه احسن تربيه وطالعه من بيت نظيف وانت الي سوالفك واضحه وضوح الشمس ..
قلت يا فلان انا زوجتك سترك وغطاك انا شاريتك مو بايعتك ولا بايعه بيتي بس الدرب الي تمشي فيه غلط واذا بتستمر فيه انا مالي قعده معاك .. انت بتضيع روحك ..
عصب وحمق وقال انت مالج شغل وانا رجال وعقلي براسي اسوي الي ابيه وعارف شسوي ..
وقال شنو الي الله امر بستر وماتبين تقولينه ..؟!
قلت ماراح اقول وعصصب وشك بروحه قال لا قولي ..
انا اهني خفت اقول له عن الحشيش و يقوم يطقني والي يسوي لي شي ..
واحد نفس هذا ينخاف منه ..
قلت له انت اطق ابر هرمونات قال بعد متعبثه بجنطة النادي ..؟؟
انتي ماتستحين و مو متربيه لو متربيه ماتجين خصوصيات غيرج ..!!
قلت انت زوجي مابينا خصوصيات .. قال انا ولامره جيت تلفونج والا فتشت بغراضج
قلت الحمدلله واثق مني لانك ماشفت علي شي بس انا شقول الي منصدمه منك و هدمت الثقه بينا ..!!
وقعد ابجي وقول حسبي الله ونعم الوكيل ..
قال روحي لمي اغراضج انا بروح الشاليه وانتي اقعدي يومين عند اهلج وفكري بالغلط الي سويتيه @@
شفت الحجي ضايع معاه سكت عنه ..ولميت اغراضي ورحت تخيلوا موديني بيتنا 12 بالليل !!
وحنا بطريج يسوي روحه طيب وحليو معاي واذا تلفونه اتصل يرد ويطول على الصوت يعني اسمعي ترى اكلم ربعي مو بنات ..
و وصلت بيتنا قال فكري عدل و ريحينا من المشاكل وخلينا نعيش نفس الناس
انا سكت مارديت عليه
قال انزل معاج جنطتج؟؟
اقول بلقلبي من متى .. قلت لا
وجيت عند اهلي وحصلهم قاعدين وقعد ابجييييي ولمهم ..
وامي تبجي تقول الحمدلله الي الله وصلج لنا بالسلامه ولا قعدتي عند هالمحشش الي مايخاف ربه
خفنا يسوي فيج شي واحد عقله مو براسه ..
قلت ابيه يطلقني مستحيل اقعد معاه انا من الاول وانا متعذبه معاه ما ابيه ..
والحين اهو ما اتصل ولا شي مخليني على اساس افكر بالموضوع وانا ما ادري شسوي ..
اهلي يقولون راينا انج تطلقين منه وانتي بكيفج مانجبرج بس هذا الحل لان كل شي ينسكت عنه الا هالسوالف ..
انتوا شرايكم شسوي ابي حل ..؟
واذا وصلت لطلاق وجو اهله نقول لهم ولدكم يحشش والا نسكت عن الموضوع ونقول يطلقها وبس ..؟
اخاف اذا فضحناه تصير سوالف ومشاكل ويتبلون علي من القهر ..
والله احترت عطوني رايكم
الله يفرج همج موضوج كبير
ان شاء الله البنات اهنيه يساعدونج
و قولي حق اهلج السالفة فيها مخدرااات ، و الله باجر انتي و اهلج الي بتروحون فيها .
و انا اشوف الريال الي انتي ماخذته مووصاحي !! و لايصلح زوج ابداااا ،، الله يعينج و مالج الا الطلاق عشان تعيشين حياتج بامااان و طززز بكلام النااس اهم شي حيااتج .. انتي مرح تعيشين الا مرة و حدة و حرام تضيعين حياتج مع هالانسان
الله يستر عليج و يبعدج عن المشاكل .
انكرو وقالوا ولدنا مافيه شي وقالوا اذا بنتكم ماتبيه تقول ماتبيه بس لاتتبلى على ولدنا !!
وتصلت خالته و قعدت تدعي علي وتدعي على امي وتقول ولدنا مافيه شي ولا اهو راعي بنات لا تتبلون عليه !!
ماقول الا حسبي الله ونعم الوكيل بس ..
الله يبين الحق ..
بس والله مت من القهر وانا اقرا السالفه
شوفي مدامج توج ماحملتي خلاص الحياة قسمه ونصيب وهذا انسان محد يقدر يتعايش معاه
فوق شينه وقوات عينه يكلم ويواعد ويلعب ويغازل ويحشش وكلام قوي بين البنات معناته كل شي يسوي وياهم
وانتي على هالتحمل كله مومحترمج ؟!!!!!!
توج باول الطريج وحمدي ربج الله كشفه لج قبل لاتحملين او اتطولين عنده
ومالج شغل بكلام النااس كل واحد قاعد ابيته تتحملين كل هذا عشان الناس وتضيعين حياتج !!!
واهله لازم يعرفون عن سوالفه والحشيش بالذات
عشان لايحطون العيب فيج سوا الناس او اهله
خلاص خلج عند اهلج معززه مكرمه ولا هالاهانه
والله ان شاءالله يعوضج باللي احسن منه لاتضيعين عمرج وياه وتيبين ياهل وتبتلشين فيه !!!
لناس له ويورطونهم استخيري وتوكلي علي الله مع ان مايبيلها استخاره الطلاق لاتدشين بمنتهات وايد معاه ومع بنات الحرام وعيالج المستقبل هذا رايي
بس عادي ينقلج مرض من هالامراض الخبيثه !!
انا اقول تلاحقي على عمرج وافتكي منه دام مافي بينكم يهال
مغازلجي و دفش و مايحترمج وفوق هذا راعي مخدرات .. تكفين على شنو صابره افحميني !! وتقولين خايفه من كلام الناس وشماتتهم .. ليش انتي مسويه شي غلط علشان تخافين !!
هذا مومقدر النعمه وعباله ماخذج من الشارع مو من بيت اهلج معززه مكرمه
وشوفي حبيبتي .. حطي هالكلام ترجية باذنج ..
اذا انتي ماحطيتي قيمة واعتبار لنفسج لا تتوقعين انه يحترمج طول عمرج
وانتي حره
وأحمدي ربك انك ما جبتي عيال منه…اكيد ربي باغي لك الخير
،
وأهله و خالته…الله فوقهم ويأخذ حقك منهم
،
والله يكتب اللي فيه الخير لك
ويعوضك