جنطة المستشفى

السلام عليكم
بنات شنو اتحطون بجنطة المستشفى؟ ومن اي شهر المفروض اتكون زاهبه ؟ الي عندها خبره اتفيدنا بليز

مرحبا
اختي انا اشوف الافضل تزهبينها قبل لا دشين الشهر السابع
لان رفيجتي اولدت بالسابع وتوهقت بالمستشفى ماكانت مزهبه شي
انا اجهزها باخر السادس لان تعرفين ادا ثقلتي ماراح يكون لج خلق
اما التجهيزات اهم شي روب كشخه تلبسينا جدام اللي بيزورونج مع ملفع يناسبه وهم يكون مرتب توصين احد من خواتج تكوي لج قبل لاتجيبه المستشفى ويفضل ماتحطه بالجنطه علشان مايتعفس
طبعا سراويل قطن وشلحتين عالاقل قطن اللي تكون كامله مع الستيان وهم ادلاغات وشحاطات تكون دربه والكوتكس لاتنسينه الكبار وقميصين قطن مع ملفعين قطن وطبعا الفرشاة والمعجون والصابون وغسول الوجه اللي تنحط بالحمام تكرمين وفوطتين انا اخد الطقم 3فوط باحجام مختلفه وادا بتولدين بالحكومه لاتنسين علبه ديتول للحمام تكرمين لان حماماتهم ……… وعلب كلينكس لان اختي اولدت بالحكومه ارف
بعدشنو ياربي عموما انشالله البنات بيفيدونج ادا انا ناسيه شي
وكريم مرطب ومقلمه تحطين فيها مكياج ادا انتي حابه طبعا
الله يسهل عليج

السلام عليكم …

انا قبل فترة سالت هالسؤال … والحمدلله زهبتها من اول الثامن … بس اذا في شك ان الوحده تولد بالسابع المفروض تزهبها مبجر

محتويات جنطة المستشفى :

للأم :

غيارات داخليه عدد 4 عالاقل (سراويل قطنيه كبيرة الحجم) يعني اكبر من مقاسج
عدد 2 ستيان … للإحتياط ..
عدد 2 قميص نوم طويل .. وطويل الاكمام بعد … علشان اذا في رجال بيدشون
أو انج تاخذين معاج روب ساتر .
فوطة كبيرة و فوطة للرأس .. علشان لما تغسلين من بعد الولادة
نعال للحمام (أعزكم الله) ونعال للغرفة …
(لبس الاستقبال- قميص – شحاطه- شباصه او اي اكسسوار بتحطينه بشعرج)
مشط + استشوار + شبابيص مريحه
فرشاة اسنان .. وصابون وشامبو وليفه
فوط صحيه … حجم كبير جدا (حجم عمالقة

)
_______

اغراض للبيبي :

عدد 4 غيارات داخليه + اوفر اول 4 حبات
4 قطع قماط … + كفر ناعم للبيبي
كبابيس قطنيه لرأس البيبي 2 أو 3
عدد 5 سدريات …
فوطه ناعمة للاحتياط
حفاظات من نوعيه جيده … عموما بالمستشفى اهم راح يلبسونه
جيس البيبي لا تنسينه .. علشان لما تطلعون من المستشفى تحطينه فيه

الله يسهل علينا وعليج يارب العالمين

ماعرف :$

ادعيلي أحمل ادعيلي يالغاليه

نفسي بيبي

الله يسهل عليج

اب اب

انا تقريبا نفس كلام البنااااات بس فيييييييه اضافه لاتنسيييييييين الديباج الكشخه نفر واحد ولا تنسيييين المره عشان تشربين شوي منها اذا جاج احد عشااان ما يلتهب من العطووووورجرحج او شميها

بنات اتوقع هالعدد حق اللي بتولد قيصري بتقعد 4 او خمس ايام بالمستشفى..
بس الطبيعي يوم والثاني طالعه بالليل ماله داعي كل هالعفش كافي غيارين ..
والشعر ماينغسل بعد الولاده مباشره موزين للوالده هذا اللي نعرفه…الجسم ممكن تغسله بس الشعر لا..

حبيبتي لا تنسين اذا شريتي الروب راعي يكون ازرار كثار عشان الرضاعه واخذي الاسفنجات ملوت الصدر عشان لا يسرب شي وانتي عندج احد….وهم وقت الولاده لا تنسين عقد الزواج

ما ادري احسن قبل دشين التاسع

تصدقوووووووون تصرقعت انا مو بجر هذا الثانى بس خااااايفه اكثر من ايام بجري
بس والله كنت حاطه جنطتى على البركه والحمدلله لما احتجت خواتى ماقصروا يابولي اللي ناقص
اما بالنسبه بعلق على الاخت : حصونه واقولها ماتدرين شنو الظروف انا كنت مجهز غيارين على اساس بولد طبيعى وتعسرت ولادتى 3 ايام بعدها ولدت فاحتجت ملابس اكثر فاخذي اكثر مو مشكله احسن من يقصرج وتحتاسين

صاجه اختي السهالات من الله وانا للحين ماقالي الدكتور شنو وضع الحوض عندي قالي اول ماتدشين التاسع نقرر اذا كان بتولدين طبيعي ولا قيصريه والله يسهل علينا كلنا يارب…

زين بسألكم اللي تستقبل بالبيت لازم تحط كفر بالمستشفى بعد؟

على حسب الناس اللي بيزورونج
انا بالنسبه لي اهلى واهل زوجى يزورونى بالمستشفى فلازم احط
اما اذا بس مقربين خوواتج وحمواتج على راحتج بس احلى تحطين كقر خاص فيج
الله يسهل على الكل يااااااارب

انا عن نفسي احط
سشوار+بروش+مكياج وكريم +ديودرنت وعطرخفيف او الكريم اللي في ريحه +,شباصه مريحه ,,وشباصه كشخه
قميصين كشخه وقميص عادي مريح للنوم + نعال وانتو بكرامه +فوطه حجم متوسط حق استعمالج
ملابس داخليه سراوييل2 ستيان1
اذا تحبين تلبسين شلحة حططي .. بس انا ما البس
دلاغات2 بس غرف المستشفى غالبا دافيه يعني لاتحاتين البروده
انا ما كنت نايويه اسبح ,, بس لما قمت وصحصحت ,, حسيت اني معفنه من الولاده ماني قادرة اقعد ,, تحركت واكلت حسيت نفسي زينه .. جان اسبح والسستر ناطرتني عند الباب لاسمح الله احتياط وغسلت شعري وجسمي كله .. وسشورت شعري ماكو الا العافيه
ولا تنسين اييبولج شي حق الطلعه ,, عبايه ولفتها وفلات والا شحاطه .

والبيبي 4 ملابس كاملين ., فنيله والكبوس والمهاد والاوفر اول والسدريه
(المستشفى اللي ولدت فيه كانو يبدلونه صبح وعصر ,, كلشوي تي السستر تاخذله ملابس واتييب الوصخين)
الحاف +السليب باق+فوطه خفيفه يمكن يغسلونه ..وملابس البيبي ما تاخذ مكان عنونات
وانا كنت مقسمه كل بدله بجيس نايلون صغير وحاطتهم بالجنطه .. علشا اذا يت السستر اعطيها اياهم مرتبين ما انتخربط واهيه تحط الوصخين بالجيس واتردهم ,
انشاء الله ما نسيت شي ..
انا كنت ناسيه الجنطه ابكبرها ,, تهقون ازهبها من الحين لاني دشيت الثامن..؟

بنات الاوفر اول لو باخذ تقريبا 3 حق المستشفى اشلون على المهاد عادي يكون غير ولا لازم نفس الشي الصراحه انا بجر ودشيت الثامن ومو عارفه شي

يعطيكم الاعافية

انا شخصيا تسبحت بالمستشفى
لا وجايبة مجفف الشعر معاي!!

ملابس البيبي تقريبا اخذت 4او 5
كل تبان حطيه مع البدلة الكاملة ولفة وكبوس
السسترات يجون يبون تبديلة ويبدلون له
أخذت معاي كيس التقديم
غير كيس الاستقبال مال البيت
أحطه فيه عند زوار المستشفى

وملابسي
طبعا داخلية وفوط صحية
ومناشف كبيرة وصغيرة

قميص الاستقبال واحد بس أخذت مع ملفع
وأخذت تبديلتين لي
للنوم

أخذت لي شوية مكياج بس ماحطيته
مو مزاج مكياج

أغراض الحمام عزكم الله
معجون غسول وجه وفرشة اسنان
حتى شامبو وبلسم حجم صغير بس مااستخدمت البلسم

ونعال مكرم السامع للحمام
وشحاطة لج بالغرفة

عطر و مرة علشان عقب الولادة تحطينها بماي وتشربينها

الله يهون علينا

والله ذكرتوني باشياء ناسيتها

لا تنسون المره

…